ޖަރުމަނުގެ އޮޓޯމޯޓިވް ކުންފުނި ވޯކްސްވެގަން ގްރޫޕް (ވީޑަބްލިއު) އާއި އެމެރިކާގެ އިލެކްޓްރިކް ވެހިކަލް އުފައްދާ ޓެސްލާގެ ވާދަވެރި ކުންފުނި ރިވިއަންއާ ދެމެދު 5.8 ބިލިއަން ޑޮލަރުގެ އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގެ ދަށުން ދެ ކުންފުނިން މުހިންމު ޓެކްނޮލޮޖީތައް ހިއްސާކުރުމަށް ވަނީ އެއްބަސްވެފައެވެ. މިއީ ދުނިޔޭގެ އިލެކްޓްރިކް ވެހިކަލްތަކުގެ ޑިމާންޑް ދަށްވަމުން އަންނަ އަދި ޗައިނާގެ ވާދަވެރިންގެ ވާދަވެރިކަން އިތުރުވަމުން އަންނަ ދަނޑިވަޅެއްގައި ވެފައިވާ އެއްބަސްވުމެކެވެ.

މި އެއްބަސްވުމުގެ ސަބަބުން ގެއްލުން ލިބެމުންދާ ރިވިއަން އަށް އަންނަ އަހަރު ނެރުމަށް ރޭވިފައިވާ އާރ2 މޮޑެލް ތައްޔާރުކުރުމަށް މުހިންމު ފައިސާގެ އެހީތެރިކަން ލިބިގެންދާނެއެވެ. އަދި ވޯކްސްވެގަން އަށް ރިވިއަންގެ ޓެކްނޮލޮޖީ އެ ކުންފުނީގެ އަމިއްލަ ވެހިކަލްތަކުގައި ބޭނުންކުރުމުގެ ފުރުސަތު ލިބިގެންދާނެއެވެ.

ދެ ކުންފުނީގެ ބަޔާނެއްގައި ބުނެފައިވާ ގޮތުގައި، މި އެއްބަސްވުމުގެ ދަށުން ވޯކްސްވެގަންގެ ފުރަތަމަ މޮޑެލްތައް ރިވިއަންގެ ޓެކްނޮލޮޖީއާ އެކު 2027 ވަނަ އަހަރު ކަސްޓަމަރުންނަށް ލިބެން ފަށާނެއެވެ. އަދި ދެ ކުންފުނީގެ ޑިވެލޮޕަރުންނާއި ސޮފްޓްވެއަރ އިންޖިނިއަރުން ކެލިފޯނިއާގައި އެއްތަނެއްގައި މަސައްކަތްކުރަން ފަށާނެއެވެ.

މި އެއްބަސްވުން ވެފައިވަނީ ވޯކްސްވެގަން ގްރޫޕުން ބޮޑެތި ޚަރަދު ކުޑަކުރުމުގެ ފިޔަވަޅުތަކެއް އަޅަން ތައްޔާރުވަމުންދާކަމުގެ އުންމީދުތައް އުފެދިފައިވާ ދަނޑިވަޅެއްގައެވެ. އަދި ރިވިއަން ވެސް ވަނީ އިލެކްޓްރިކް ވެހިކަލްތަކަށް ހުރި ޑިމާންޑް ދަށްވުމާ ގުޅިގެން ޚަރަދު ކުޑަކުރުމުގެ ފިޔަވަޅުތަކެއް އަޅަން ފަށައިފައެވެ.