ދިވެހި ސަރުކާރުން 65 އަހަރުން މަތީގެ ރައްޔިތުންނަށް މަހުން މަހަށް 5،000 ރުފިޔާގެ އިނާޔަތެއް ދެއެވެ. މިއީ އުމުރުން ދުވަސްވީ މީހުންގެ ދިރިއުޅުން ރަނގަޅުކޮށް، ދުވަސްވުމާ އެކު އަންނަ މާލީ ދަތިކަން ލުއިކޮށްދިނުމަށް ހަމަޖައްސާފައިވާ މާލީ އެހީގެ ނިޒާމެކެވެ. ނަމަވެސް، ރައީސް ޑރ. މުޙައްމަދު މުޢިއްޒުގެ ސަރުކާރުން މި ނިޒާމު އިސްލާހުކުރުމަށް ހުށަހަޅާފައިވެއެވެ. މީގެ މަޤްޞަދަކީ ހަމައެކަނި އެކަމަށް ބޭނުންވާ މީހުންނަށް އެލަވަންސް ދިނުމެވެ. މި އަމާޒުކުރެވިފައިވާ އުސޫލުގެ ދަށުން، ރައްޔިތުންގެ މާލީ ހާލަތު ވަޒަންކޮށް، މުއްސަނދި މީހުންނަށް ދޭ ފައިސާ ހުއްޓާލުން ހިމެނެއެވެ. މިގޮތުން، ބޭނުކަމީ ވަސީލަތްތައް އެންމެ އެކަށީގެންވާ ގޮތުގައި ބޭނުންކުރުމެވެ.

މި ބަދަލުގެ މައިގަނޑު މަޤްޞަދަކީ އިންސާފުވެރި މުޖުތަމަޢުއެއް އުފެއްދުމެވެ. ދިވެހި ރާއްޖެއަކީ އިޤްތިޞާދީ ތަފާތުތައް ދެމިއޮތް، އަދި މުޅި އާބާދީގެ ބޭނުންތައް ފުއްދުމަށް މަދު މާލީ ވަސީލަތްތައް ބޭނުންކުރަންޖެހޭ ޤައުމެކެވެ. އާމްދަނީ މަދުން ލިބޭ، ދުވަސްވީ މީހުންނަށް މާލީ އެހީ އަމާޒުކުރުމުން، މި ފައިސާއަށް ބަރޯސާވާ މީހުންނަށް އެ ފައިސާ ދެމެހެއްޓެނިވި ގޮތެއްގައި ލިބޭނެކަން ސަރުކާރުން ޔަޤީންކުރެއެވެ. 

މިހާރުގެ ނިޒާމުގައި، 65 އަހަރުން މަތީގެ ކޮންމެ ރައްޔިތަކަށް، އާމްދަނީ އަދި ދިރިއުޅުމުގެ ހާލަތަށް ބެލުމެއް ނެތި، ދުވަސްވީ މީހުންގެ އެލަވަންސް ލިބެއެވެ. މީގެ މާނައަކީ މި އެހީއަށް ބަރޯސާނުވާ ފައިސާވެރިންނަށް ވެސް މީގެ ފައިދާ ލިބޭކަމެވެ.

ސޯޝަލް މީޑީއާގައި މިކަމާ ގުޅިގެން ހިޔާލުފާޅުކޮށްފައިވާ ގިނަ ފަރާތްތަކުން ވެސް ވަނީ މިހާރު މަހުޖަނުންނާއި ރިޒޯޓްތަކުގެ ވެރިންނަށް އަދި ބޮޑެތި ވިޔަފާރިވެރިންނަށް ވެސް މިފައިސާ ލިބެމުންދާކަން ފަހާގަކޮށް އެކަމާ ނުރުހުން ފާޅުކޮށްފައެވެ.

މާލީގޮތުން ފުދުންތެރި މީހުންނަށް އެލަވަންސް ދިނުމަކީ އެންމެ ނިކަމެތި މީހުން އިތުރަށް ނިކަމެތި ކުރެވުމެވެ. މުއްސަނދި މީހުންނަށް ގިނަފަހަރު އާމްދަނީ ލިބޭ އެކި ގޮތްތައް ހުންނާތީ، އެމީހުން މި އެލަވަންސަށް ބަރޯސާނުވާއިރު، އާމްދަނީ ދަށް މީހުންނަށް މި އެލަވަންސަކީ އެމީހުންގެ ދިރިއުޅުމަށް ކޮންމެހެން ބޭނުން އެއްޗެކެވެ. މި ފައިސާ އަނބުރާ ނެގުމުން، ވަސީލަތްތައް އިންސާފުވެރިކޮށް ބެހި، އިޤްތިޞާދީގޮތުން ނިކަމެތި މީހުންނަށް ވަރުގަދަ އިޖްތިމާޢީ ރައްކާތެރިކަމެއް ލިބިގެންދާނެކަން ކަށަވަރުކުރެވޭނެއެވެ.

ދިވެހިރާއްޖެއަކީ، އެހެން ކުދި ޖަޒީރާ ޤައުމުތަކެކޭ އެއްފަދައިން، މަދު މާލީ އަދި ޤުދުރަތީ ވަސީލަތްތަކެއް ހުރި ޤައުމެކެވެ. ތަފާތުކުރުމެއް ނެތި އެލަވަންސް ދިނުމަކީ އާންމު ފައިސާއަށް ބުރަވާ ކަމެކެވެ. މި ފައިސާ ތަޢުލީމާއި، ޞިއްޙަތާއި، އަދި އުމްރާނީ ތަރައްޤީއަށް އިންވެސްޓްކުރެވިދާނެއެވެ. އުމުރުން ދުވަސްވީ މީހުންގެ އެހީ ބޭނުންވާ މިންވަރަށް ބަލައިގެން ދޭ ޤައުމުތަކުގެ މިސާލު ނަގައި، ދިވެހި ރާއްޖެއަށް ވެސް އެންމެ ބޭނުންވާ މީހުންގެ ދިރިއުޅުމުގެ ފެންވަރު ދަށްނުކޮށް، ޚަރަދު ކުޑަކުރެވިދާނެއެވެ.

އެލަވަންސް މަދުކުރުމުން ސަލާމަތްކުރެވޭ ވަސީލަތްތައް ތަރައްޤީގެ ޕްރޮގްރާމްތަކަށް ހަރަދުކުރެވިދާނެއެވެ. މިސާލަކަށް، ޞިއްޙީ ދާއިރާގެ ވަސީލަތްތަކާއި ޒުވާނުންނަށް އިޤްތިޞާދީ ފުރުޞަތުތައް އިތުރުކުރުމަށް އިންވެސްޓްކުރުމުން، ދުރު މުސްތަޤްބަލުގައި ދެމެހެއްޓެނިވި އިޤްތިޞާދީ ކުރިއެރުމެއް ލިބި، ބޭރުގެ އެހީ އާއި ދަރަންޏަށް ބަރޯސާވާ މިންވަރު ކުޑަކުރެވޭނެއެވެ.

ސިންގަޕޫރުގެ ސެންޓްރަލް ޕްރޮވިޑެންޓް ފަންޑް (ސީޕީއެފް) ނިޒާމުގެ ދަށުން ދުވަސްވީ މީހުންނަށް ފައިސާ ދެނީ އެމީހުންގެ އާމްދަނީ އާއި ކުރިން ދައްކާފައިވާ ފައިސާގެ މައްޗަށް ބިނާކޮށެވެ. ދުވަސްވީ، މުއްސަނދި މީހުންނަށް ލިބެނީ މަދު ފައިދާތަކެއް ކަމުގައިވާއިރު، އާމްދަނީ ދަށް، ދުވަސްވީ މީހުންނަށް އިތުރު އެހީ ލިބެއެވެ. އެހެންކަމުން ސިންގަޕޫރަށް އާބާދީގެ ތެރޭގައި ވަސީލަތްތައް ހަރުދަނާކޮށް ބެހުމުގެ ފުރުޞަތު ލިބެއެވެ.

ހަމަ އެހެންމެ އޮސްޓްރޭލިއާގެ އުމުރުން ދުވަސްވީ މީހުންގެ ޕެންޝަން ނިޒާމަކީ ވެސް މާލީ ހާލަތަށް ބަލައިގެން ދެވޭ އެއްޗެކެވެ. ޕެންޝަން ދިނުމުގައި އާމްދަނީ އާއި މުދަލަށް ބަލާތީ، ދުވަސްވީ، މުއްސަނދި މީހުންނަށް ލިބެނީ ކުޑަ އަދަދެކެވެ. މި އުސޫލުގެ ސަބަބުން އޮސްޓްރޭލިއާއަށް އާންމު ފައިސާ ސަލާމަތްކުރެވޭއިރު، އާމްދަނީ މަދުން ލިބޭ، އުމުރުން ދުވަސްވީ މީހުންނަށް މާލީ ރައްކާތެރިކަން ކަށަވަރުކޮށްދެވެއެވެ.

މި މިސާލުތަކުން ދައްކައިދެނީ، މީންސް-ޓެސްޓެޑް ވެލްފެއަރ އާ އެކު، ސަރުކާރުތަކަށް ދައުލަތުގެ މާލިއްޔަތަށް ބުރަ ނުވެ، ނާޒުކު ހާލަތުގައި ތިބި އުމުރުން ދުވަސްވީ މީހުންނަށް ވަރުގަދަ އިޖްތިމާޢީ ރައްކާތެރިކަން ފޯރުކޮށްދެވިދާނެކަމެވެ.

އާމްދަނީ ދަށް، އުމުރުން ދުވަސްވީ މީހުންނަށް ފައިސާ އަމާޒުކުރެވުމުން، އުމުރުން ދުވަސްވީ ރައްޔިތުންގެ މެދުގައި ފަގީރު ހާލަތުން އަރައިގަނެވޭނެއެެވެ. އާމްދަނީ ދަށް، އުމުރުން ދުވަސްވީ މީހުންނަށް ބޮޑެތި ނުވަތަ އެއްގޮތަކަށް ދެވޭ ފައިސާގެ އެހީގެ ފައިދާ ލިބި، އެމީހުންގެ ދިރިއުޅުމުގެ ފެންވަރު ރަނގަޅުވެ، އަދި ޢާއިލާގެ މެންބަރުންނާއި މުޖުތަމަޢުގެ އެހީއަށް ބަރޯސާވާ މިންވަރު މަދުކުރެވޭނެއެވެ.

މިގޮތަށް މިކަން ބަދަލުކުރެވި ސަލާމަތްކުރެވޭ ފައިސާ ޞިއްޙީ ނުވަތަ ތައުލީމީ ދާއިރާ އަށް ބަދަލުކުރެވިދާނެއެވެ. މިއީ އުމުރުން ދުވަސްވަމުންދާ އާބާދީއަކަށް ވަރަށް މުހިންމު ކަމެކެވެ. ރަނގަޅުކުރެވޭ ޞިއްޙީ ޚިދުމަތްތަކުން، އުމުރުން ދުވަސްވީ މީހުންނަށް، ޚާއްޞަކޮށް މާލީގޮތުން ނިކަމެތި މީހުންނަށް، ބޭނުންވާ ޞިއްޙީ ފަރުވާ ލިބޭކަން ކަށަވަރުކޮށްދޭނެއެވެ.

އަމާޒުކުރެވިފައިވާ އުމުރުން ދުވަސްވީ މީހުންގެ އެލަވަންސް ނިޒާމަކުން ދައްކުވައިދެނީ ސަރުކާރުން ހަމަހަމަކަމަށް އަހަންމިއްޔަތުކަން ދޭކަމާއި، އެހީ އެންމެ ބޭނުންވާ މީހުންނަށް އިސްކަންދޭކަމެވެ.