ކުރިއަށް އޮތް ހޫނު މޫސުމުގައި، އިންޑިޔާގެ ގިނަ ހިސާބުތަކަށް އާދަޔާޚިލާފަށް ހޫނުގަދަވާނެކަމުގެ އިންޒާރު އެ ޤައުމުގެ މޫސުމާބެހޭ އިދާރާއިން ދީފިއެވެ.

އެ އިދާރާއިން ބުނީ، ކުރިއަށް އޮތް ހޫނު މޫސުމުގެ ގިނަ ދުވަސްތަކުގައި އިންޑިޔާގެ ގިނަ ސްޓޭޓުތަކުގައި އާދަޔާޚިލާފަށް ހޫނުގަދަވާނެކަމަށް ލަފާކުރެވޭ ކަމަށެވެ.

މިދިޔަ ފެބްރުއަރީ މަހުން ފެށިގެން ވެސް އިންޑިޔާގެ ގިނަ ސްޓޭޓުތަކުގައި ވަނީ އެހެން އަހަރުތަކާ އަޅާބަލާއިރު ހޫނު ގަދަކަމަށް ރިޕޯޓުކޮށްފައެވެ.

އިންޑިޔާގައި ކޮންމެ އަހަރަކު ވެސް ހޫނުގަދަވުމުގެ ސަބަބުން އެތައް ސަތޭކަ މީހުން މަރުވެއެވެ. އަދި ގަދަހޫނުގެ ސަބަބުން ދަނޑުބިންތަކަށް ބޮޑެތި ގެއްލުންތައް ލިބި، ދަނޑުވެރިކަމުގެ ސިނާއަތަށް ވެސް އޭގެ ނޭދެވޭ އަސަރު ބޮޑެވެ.

މިދިޔަ އަހަރު އިންޑިޔާގެ ރާޖަސްތާނު ސްޓޭޓުގައި 50.5 ސެލްސިއަސްއަށް ހޫނުމިން އުފުލުނެވެ. މިއީ އިންޑިޔާގެ ތާރީޚުގައި މިހާތަނަށް އެންމެ ހޫނުގަދަ ދުވަސްކަމަށް މޫސުމާބެހޭ އިދާރާއިން ބުނެފައިވެއެވެ.

ހޫނުގަދަވުމުގެ ސަބަބުން މިދިޔަ އަހަރު އިންޑިއާ އިން 143 މީހަކު މަރުވި ކަމަށް ވެސް ކަމާގުޅޭ އިދާރާތަކުން ވަނީ ބުނެފައެވެ.