ENGLISH
03 އޭޕްރީލު 2025
އިނގިރޭސިވިލާތާއި މޮރިޝަސްއާ ދެމެދު ޗާގޯސްއާ ގުޅޭ އެއްބަސްވުމަކާ ގާތަށް
02 އޭޕްރީލު 2025
|
އެންމެ މަޤްބޫލު
ސަރަޙައްދީ ގޮތުން މުހިންމު، ޗާގޯސްގެ ޖަޒީރާ ރަށްތައް އިސްތިޢުމާރު ކޮށްފައިވާ، އިނގިރޭސިވިލާތުން އެ ރަށްތައް އަނބުރާ މޮރިޝަސް އާ ޙަވާލުކުރަން ވަރަށް ގާތަށް މިހާރު ދެވިފައިވާ ކަމަށް އިނގިރޭސި ސަރުކާރުން ބުނެފިއެވެ.
އެތައް ޒަމާނެއް ވަންދެން ކުރި މަޝްވަރާތަކަށް ފަހު އިނގިރޭސިވިލާތުން މިދިޔަ އޮކްޓޯބަރު މަހު އެއްބަސްވީ ކުރީގެ ކޮލޮނީއެއް ކަމަށްވާ ޗާގޯސް ރަށްތައް މޮރިޝަސްއާ ޙަވާލުކުރުމަށެވެ. ނަމަވެސް، އެ ޖަޒީރާގެ އެންމެ ބޮޑު ރަށްކަމަށްވާ ޑިއޭގޯ ގާސިއާ ނޫނީ ފޯޅަވަހީގައި ހިންގާ އެމެރިކާގެ އަސްކަރީ މަރުކަޒު އެ ރަށުގައި ބާއްވަން ވަނީ ޝަރުތުކޮށްފައެވެ.
އެކަމާ މެދު އެއްބަސްވުމަކަށް މިހާތަނަށް ނުދެވި އޮތީ، އެ ރަށަށް އިނގިރޭސިވިލާތުން ދޭ ބަދަލާމެދު މޮރިޝަސްއިން ހިތްހަމަނުޖެހޭތީއެވެ.
އިނގިރޭސިވިލާތުގެ ބޮޑުވަޒީރުގެ އޮފީހުން ބުނީ، މޮރިޝަސްއާ އެކު ކުރެވޭ މަޝްވަރާތައް ނިމި މިހާރު އޮތީ އެއްބަސްވުމެއް އެކުލަވައިލުމުގެ އެންމެ ފަހުގެ މަރުޙަލާގައި ކަމަށެވެ.
އަދި އެއްބަސްވުން އެކުލަވައިލުމުގައި އެމެރިކާގެ ރައީސް ޑޮނަލްޑް ޓްރަމްޕް އިތުރު ޚިޔާލެއް އިނގިރޭސިވިލާތުން ދެން ނުހޯދާނެ ކަމަށް މަޢުލޫމާތު ލިބިފައިވެއެވެ.
މޮރިޝަސްގެ ސަރުކާރުން ވެސް ވަނީ ޗާގޯސް އެއްބަސްވުން އެކުލަވައިލުމުގެ ފަހު މަރުޙަލާއަށް ދެވިފައިވާ ކަން ކަށަވަރުކޮށްދީފައެވެ.
ނަމަވެސް، މި އެއްބަސްވުމުގެ ދަށުން އިނގިރޭސިވިލާތުން މޮރިޝަސްއަށް ދޭ މާލީ ބަދަލުގެ ތަފްޞީލެއް ހާމަކޮށްފައެއް ނުވެއެވެ.
މޮރިޝަސްއިން ކުރިން ހާމަކޮށްފައިވާ މަޢުލޫމާތުތަކަށް ބަލާއިރު، ފޯޅަވަހި އިނގިރޭސިވިލާތަށް ކުއްޔަށް ދޭން އެއްބަސްވެފައިވަނީ 99 އަހަރަށެވެ. އަދި އިނގިރޭސިން ބޭނުންވާ ނަމަ، އެއްބަސްވުުމުގެ މުއްދަތު އިތުރު 40 އަހަރަށް އިތުރުކުރުމުގެ މާއްދާއެއް ހިމެނޭނެއެވެ.
އިނގިރޭސިވިލާތުގެ އިދިކޮޅު ފަރާތްތަކުން ބުނެފައިވާ ގޮތުގައި، މި އެއްބަސްވުމުގެ ދަށުން އެ ޤައުމަށް 18 ބިލިއަން ބްރިޓިޝް ޕައުންޑުގެ އަގެއް އަދާކުރަންޖެހެއެވެ. ނަމަވެސް، އެއީ ރަނގަޅު އަދަދެއް ނޫން ކަމަށް އިނގިރޭސި ސަރުކާރުން ވަނީ ބުނެފައެވެ.
އިނގިރޭސިވިލާތުން ޗާގޯސްގެ ރަށްތައް މޮރިޝަސް އާ ވަކިކޮށް، ޤާއިމުކުރި އަސްކަރީ މަރުކަޒު އެމެރިކާއަށް ކުއްޔަށް ދޭން ނިންމީ 1965 ވަނަ އަހަރު އެވެ.