ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ކުރިއަށް ގެންދާ 15 މައިގަނޑު މަޝްރޫޢު ފެށުމަށްޓަކައި "ޓްރާންސްފޯމިން ޓުމޯރޯ" ގެ ނަމުގައި ޚާއްޞަ ރަސްމިއްޔާތެއް ބާއްވައި، މި މަޝްރޫޢުތައް ރަސްމީކޮށް ރޭ އިފްތިތާޙުކޮށްފިއެވެ.

ހުޅުމާލޭ ސެންޓްރަލް ޕާކުގައި ބޭއްވި ރަސްމިއްޔާތުގައި މަޝްރޫޢުތައް އިފްތިތާޙުކޮށްދެއްވީ އިކޮނޮމިކް މިނިސްޓަރ މުޙައްމަދު ސަޢީދެވެ. މި ރަސްމިއްޔާތުގައި ހުޅުމާލޭގައި ހިންގާ ބޯހިޔާވަހިކަމުގެ އިތުރު މަޝްރޫޢުތަކާއި ރާއްޖެއަށް މުޅިން އަލަށް ތަޢާރަފުކުރާ މަޝްރޫޢުތައް ހިމެނޭ ގޮތަށް 15 މަޝްރޫޢެއް އިފްތިތާޙުކުރިއެވެ. އަދި ބައެއް މަޝްރޫޢުތަކުގެ މޮޑެލްތައް ވެސް ދައްކާލިއެވެ.

ރަސްމާލެ އިކޯ ސިޓީ

މި މަޝްރޫޢުތަކުގެ ތެރޭގައި ރައީސް ޑރ. މުޙައްމަދު މުޢިއްޒުގެ މެނިފެސްޓޯއާ އެއްގޮތަށް، ހުޅުމާލެ ހިމެނޭހެން އެޗްޑީސީގެ ބެލުމުގެ ދަށުގައިވާ ރަށްތައް ތަރައްޤީކުރުމަށް ރޭވިފައިވާ ގިނަ މަޝްރޫޢުތަކެއް ހިމެނެއެވެ. މީގެ ތެރޭގައި ބޯހިޔާވަހިކަމުގެ މައްސަލަ ޙައްލުކުރުމަށް ރަސްމާލެ ޕްރޮޖެކްޓާއި، ހުޅުމާލޭގައި ހިންގާ އިތުރު ދެ ސޯޝަލް ހައުސިންގ މަޝްރޫޢު، ރޯ ހައުސް މަޝްރޫޢު އަދި ބިންވެރިޔާ ސްކީމުން ގޯތި ލިބިފައިވާ ފަރާތްތަކަށް ޚާއްޞަކޮށްގެން ކުރިއަށްގެންދާ ޕްރީފެބް ގެތަކުގެ މަޝްރޫޢު ހިމެނެއެވެ.

މީގެ އިތުރުން، ހުޅުމާލޭގައި ޕާކިން އިމާރާތްތަކާއި، ރޭސިން ޓްރެކް، ޑްރިފްޓް ޓްރެކް، ގޯ-ކާޓް ޓްރެކް، ރޯލަރ ސްކޭޓިން އަދި ވޯޓަރ ތީމް ޕާކު ހިމެނޭ އައިލް އެޑްވެންޗަރ ޕާކެއް އެޅުމަށް ވެސް ވަނީ ރާވައިފައެވެ. އަދި ހުޅުމާލޭގައި ހިސްޓްރީ ސެންޓަރަކާއި ނޮލެޖް ޕާކެއްގެ އިތުރުން ގަލުފަޅުގެ ފަޅު ތެރޭގައި ހަދާ "ނޫވެލި" ލަގްޒަރީ ގެތައް އެޅުމުގެ މަޝްރޫޢު ވެސް ހިމެނެއެވެ.

މި ރަސްމިއްޔާތުގައި އައިލް އެޑްވެންޗަރ ޕާކުގެ ޑިޒައިން ކޮންސަލްޓަންސީ އަދި ތަނުގެ އޮޕަރޭޝަނަށް މުހިންމު ތަމްރީނުތައް ދިނުމާ ގުޅޭ އެމްއޯޔޫއެއްގައި ވެސް ސޮއިކުރިއެވެ. މި އެއްބަސްވުމުގައި ސޮއިކުރެއްވީ އެޗްޑީސީގެ މެނޭޖިންގ ޑިރެކްޓަރ ފަޒުލް ރަޝީދު އަދި ސިޓީ ޑިވެލޮޕްމަންޓްސް ޕްރައިވެޓް ލިމިޓެޑްގެ ޑިރެކްޓަރ ޑޭވިޑް ޕިއެރިސްއެވެ.