މުހިންމު ބަދަލުތަކަކާއެކު ޢީދު ބައިބަލާ ޗެލެންޖް 1446 ފެށުމަށް ފުރިހަމައަށް ތައްޔާރު ވެފައިވާކަމަށް، ބައިބަލާ އެސޯސިއޭޝަން އޮފް މޯލްޑިވްސްއިން ހާމަކޮށްފިއެވެ. ހު ހުޅުމާޅެ ފޭސް އެކެއްގައި ފަށަން ހަމަޖެހިފައިވާ މުބާރާތުގެ ގުރުނެގުން، މިދިޔަ ހޮނިހިރު ދުވަހު ބާއްވާފައިވެއެވެ.

ޖުމްލަ 29 ޓީމު ބައިވެރިވާ މިފަހަރުގެ މުބާރާތް ފަަށާނީ، އެންމެ ފަހުގެ ޗެމްޕިއަން ބުރު ސްޕޯޓްސް ކުލަބާއި، ޓީއެފްޓީ ބައްދަލުކުރާ މެޗުންނެވެ. މިދިޔަ އަހަރުގެ މުބާރާތުގެ ރަނަރަޕް، ކުލަބް ކާސިންޖީ، އެޓީމުގެ ފުރަތަމަ މެޗުގައި ނިކުންނާނީ ޓީނޭޖް ވެޓެރަންސްއާ ދެކޮޅަށެވެ.

މުބާރާތުގެ ގުރުނެގުމުގެ ހަފްލާގެ ތެރެއިން--ފޮޓޯ:ބައިބަލާ އެސޯސިއޭޝަން އޮފް މޯލްޑިވްސް

އިވެންޓް މެނޭޖަރ، ސްޓޭޖް ކޯ އިން މި މުބާރާތަށް ތައްޔާރުކުރާ ސެޓަޕަކީ، ރާއްޖޭގެ ކުޅިވަރުގައި މިހާތަނަށް ފެނިގެންދާނެ އެންމެ ފުރިހަމަ ސެޓަޕްކަމަށް ބައިބަލާ އެސޯސިއޭޝަނުން މައުލޫމާތުދެއެވެ. އަދި ހުރިހާ ގޮތަކުންވެސް މިފަހަރުގެ މުބާރާތް ވެގެންދާނީ މީގެ ކުރީ އަހަރުތަކަށްވުރެ ފޯރިގަދަ، ފެންވަރު ރަނގަޅު މުބާރާތަކަށް ކަމުގައިވެސް އެސޯސިއޭޝަނުން ބުންޏެވެ. 

ޓީމުތަކުންވެސް ދަނީ މިފަހަރުގެ މުބާރާތަށް ވަރަށް ފުރިހަމައަށް ތައްޔާރުވަމުންނެވެ. އެގޮތުން ބައެއް ޓީމުތަކުގެ ފަރިތަކުރުންތައް މިދިޔަ އަހަރުގެ މުބާރާތް ނިމުނުތަނާހެން ފެށިއިރު، ފާހަގަކޮށްލެވޭ ހަތަރު ޓީމަކުން ވަނީ ބޮޑު އަގުގައި، ބައިބަަލާގެ އެންމެ ހުނަރުވެރި ކުޅުންތެރިންގެ ސޮއި ހޯދާފައެވެ.

ހުޅުމާލެ ފޭސް އެކެއްގައި 6 ދުވަހުގެ މުއްދަތައް ކުރިއަށްދާ މުބާރާތުގެ ކަންކަން އެންމެ ފުރިހަމައަށް ގެންދިއުމަށްޓަކާ، ކުޅިބެލުންތެރިންގެ އަމަލުތައް ކުޅިވަރުގެ ރޫހާ އެއްގޮތް ބެހެއްޓުމަށް ބައިބަލާ އެސޯސިއޭޝަނުން އިލްތިމާސް ކޮށްފައިވެއެވެ. އަދި މިކަމަށް ހުރިހާ ޓީމުތަކުގެ އެއްބާރުުލުމަސްވެސް އެސޯސިއޭޝަނުން އެދިފައިވެއެވެ.

މިފަހަރުގެ މުބާރާތުގައި ބައިވެރިވާ ޓީމުތަކާއި އެސޯސިއެޝަނަށް، ސަރުކާރުން ބޮޑެތި އެހީތަކެއް ފޯރުކޮށްދީފައިވެއެެވެ. އަދި  ހުޅުމާލޭގައި މިމުބާރާތް ކުރިއަށްދާނީ ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ) ގެ ފުރިހަމަ އެހީތެރިކަމާއެކުގައެވެ.