ދިވެހިރާއްޖޭގެ މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އިންޑިއާގެ ރިޒާވް ބޭންކް (އާރްބީއައި) އާއެކު ހެދި 400 މިލިއަން ޑޮލަރުގެ ކަރަންސީ ސްވޮޕް އެއްބަސްވުމުގެ ދަށުން އެ ފައިސާ ނަގައިފިއެވެ.

މި ފިޔަވަޅަކީ ދައުލަތުގެ ބޭރު ފައިސާގެ ރިޒާވް ރަނގަޅު ކުރުމަށް އަޅާފައިވާ ފިޔަވަޅެކެވެ.

އެމްއެމްއޭއިން މައުލޫމާތު ދެއްވާފައިވާ ގޮތުގައި، މިދިޔަ އޮކްޓޫބަރު މަހު އެ އިދާރާއިން ވަނީ 120 މިލިއަން ޑޮލަރު ރާއްޖޭގެ ބޭންކުތަކުގައި އިންވެސްޓް ކޮށްފައެވެ. މި ނިންމުމުގެ މައިގަނޑު މަގުސަދަކީ އިންވެސްޓްމަންޓުން ލިބޭ ނަފާ އިތުރުކުރުމާއި، މާލީ ދާއިރާގެ ކުރިއެރުމާއި ހަމަޖެހުން ގާއިމުކުރުމާއެކު މުޅި އިގުތިސާދަށް ފައިދާވާނެ ގޮތަށް މިކަން ކުރުމެވެ.

މި ބަދަލުތަކާ ގުޅިގެން، ސެޕްޓެމްބަރު މަހު ނިމުނުއިރު 371.2 މިލިއަން ޔޫއެސް ޑޮލަރުގައި ހުރި އޮފިޝަލް ރިޒާވް އެސެޓްސް، އޮކްޓޯބަރު މަހު ނިމުނުއިރު 614.6 މިލިއަން ޔޫއެސް ޑޮލަރަށް އިތުރުވެފައިވެއެވެ. މީގެ އިތުރުން، އެ މުއްދަތުގައި އެހެން ފޮރިން ކަރަންސީ އެސެޓްސްގެ ގޮތުގައި 122.5 މިލިއަން ޔޫއެސް ޑޮލަރު ހުރިކަން އެމްއެމްއޭއިން ފާހަގަކޮށްފައިވެއެވެ.

އެމްއެމްއޭ އާއި އާރްބީއައިއާ ދެމެދު މި 400 މިލިއަން އެމެރިކާ ޑޮލަރު އަދި 30 ބިލިއަން އިންޑިއަން ރުޕީސްގެ ކަރަންސީ ސްވޮޕް ފެސިލިޓީ އެއްބަސްވުމުގައި ސޮއިކުރެވުނީ މިދިޔަ އޮކްޓޫބަރު މަހުގެ ކުރީކޮޅު، ރައީސް ޑރ. މުހައްމަދު މުއިއްޒު އިންޑިއާއަށް ކުރެއްވި ރަސްމީ ދަތުރުފުޅުގެ ތެރެއިންނެވެ.

ސަރުކާރުން މައުލޫމާތު ދެއްވާފައިވާ ގޮތުގައި، މި ސްވޮޕް ފެސިލިޓީއަކީ ކުރު މުއްދަތުގެ ފޮރިން އެކްސްޗޭންޖް ބޭނުންތަކަށް އެހީތެރިވާނެ ފިޔަވަޅެކެވެ. އަދި މި އެއްބަސްވުމުގެ ސަބަބުން އިންޑިއާ އާއި ދިވެހިރާއްޖެއާ ދެމެދު ކުރެވޭ ވިޔަފާރީގެ މުއާމަލާތްތައް އެ ގައުމަކަށް ނިސްބަތްވާ ފައިސާއިން ކުރުމަށް މަގުފަހިވެ، ދެ ގައުމުގެ ދޭތެރޭ ކުރެވޭ ވިޔަފާރި އިތުރުވެ ހަރުދަނާވާނެ ކަމަށް ސަރުކާރުން އުންމީދު ކުރައްވައެވެ.