ENGLISH

03 އޭޕްރީލު 2025

Advertisement

އީދުގައި ވެސް އިޒްރޭލުގެ ރަހުމްކުޑަ ޙަމަލާތައް ހުއްޓައިނުލި، ޣައްޒާގައި އެތައް ބަޔަކު ޝަހީދުކޮށްލައިފި

31 މާރިޗު 2025

|

ހަސަން އާމިރު

ފަލަސްތީނުގެ ޣައްޒާގައި ފިތުރު ޢީދު ފާހަގަކުރަން ވެސް ފުރުޞަތު ނުދީ، އިޒްރޭލުން ވައިގެ ޙަމަލާތައްދީ މައުސޫމް އެތައް ބަޔަކު ޝަހީދުކޮށްލައިފިއެވެ.

މިދިޔަ ޖެނުއަރީ މަހުގެ 19 ވަނަ ދުވަހުން ފެށިގެން ސުލްޙައިގެ އެއްބަސްވުމަކަށް ޢަމަލުކުރަމުންދަނިކޮށް، އިޒްރޭލުން މި މަހުގެ 18 އިން ފެށިގެން ވަނީ ޣައްޒާއަށް އަނެއްކާވެސް ޙަމަލާތައް ދޭން ފަށައިފައެވެ.

އޭގެފަހުން އިޒްރޭލުގެ އަނިޔާވެރިކަން ވަނީ އެތައް ދަރަޖައަކަށް މަތިކޮށްފައެވެ. އިޒްރޭލުން މިހާރު ދަނީ ހޮސްޕިޓަލުތަކާއި ގެދޮރު ގެއްލިފައިވާ މީހުން ތިބޭ ވަގުތީ ހިޔާތަކަށް ވެސް ގަސްދުގައި ޙަމަލާތައް ދެމުންނެވެ.

މިގޮތުން، އިޒްރޭލު ސިފައިން އިއްޔެ ވަނީ، ބަލި މީހުން ގޮވައިގެން ދަތުރުކުރަމުންދިޔަ އެމްބިޔުލަންސްތަކަކަށް ވެސް ޙަމަލާދީފައެވެ.

އެ ޙަމަލާތަކުގައި ފަލަސްތީނުގެ ރެޑް ކްރެސެންޓުގައި މަސައްކަތް ކުރާ 15 މީހަކު ވަނީ ޝަހީދުވެފައެވެ.

އިންސާނީ އެހީ ފޯރުކޮށްދޭ ޖަމްޢިއްޔާތަކުގެ މަސައްކަތްތެރިންނަށް އަމާޒުކޮށް ޙަމަލާދިނުން ބަލައިނުގަނެވޭނެކަމަށް ބައިނަލްއަޤުވާމީ މުޖުތަމަޢުއިން ވަނީ ބުނެފައެވެ.

ޣައްޒާއަށް އަލުން ޙަމަލާތައް ދޭން ފެށި ފަހުން، މިވީ ހަފްތާއެއްހާ ދުވަހުގެ ތެރޭގައި 1،000 އެއްހާ މީހުން ވަނީ ޝަހީދުކޮށްލައިފައެވެ.

އަދި އެ ސަރަޙައްދުތަކުން ފަލަސްތީނު ރައްޔިތުން ފައްސާލައި، އެ ސަރަޙައްދުތަކަށް އިޒްރޭލުން ދަނީ އަތްގަދަކޮށް، އިސްތިޢުމާރު ކުރަމުންނެވެ.

ޣައްޒާއަށް އެހީ ވެއްދުމުގެ މަގުތައް އިޒްރޭލުން ބަންދުކޮށްފައިވާތީ، ކުރިއަށް އޮތް މަދު ދުވަސްތަކުގައި ޣައްޒާގެ ރައްޔިތުން ބަނޑަށް ޖެހުމުގެ ބިރުވެރިކަން އިތުރުވެފައިވާ ކަމަށް ވެސް ފަލަސްތީނުގައި ހަރަކާތްތެރިވާ ބައިނަލްއަޤްވާމީ އެހީދޭ ޖަމާޢަތްތަކުން ދަނީ ތަކުރާރުކޮށް ބުނަމުންނެވެ.

މިގޮތުން، ޣައްޒާގެ ބޯޑަރު ސަރަޙައްދުތަކުގައި އެހީގެ ތަކެތި ބަރުކޮށްގެން ގިނަ އަދަދެއްގެ އުޅަނދުތަކެއް ތާށިވެފައިވާއިރު، އޭގައި ހުރި ގިނަ އަދަދެއްގެ ކާބޯތަކެތި މިހާރު ކުނިވެފައިވާ ކަމަށް ވެސް އެ ޖަމާޢަތްތަކުން ވަނީ ބުނެފައެވެ.

ޣައްޒާގައި ދިރިއުޅޭ ރައްޔިތުން މިހާރު ބޭނުންކުރަމުންދަނީ ދަޅުގައި ބަންދުކުރި ކާނާ އެކަންޏެވެ.

ގިނަ ޤައުމުތަކެއް މެދުވެރިވެގެން ޙަމަލާތައް ހުއްޓައިލަން އެއްބަސްވީ، އިޒްރޭލުން ހުއްޓުމެއް ނެތި ލާއިންސާނީ ޢުދުވާނުތައްދީ، ފަލަސްތީނުގެ ބައި ލައްކައެއްހާ މީހުން ޝަހީދުކޮށްލައި، ޣައްޒާގެ ގިނަ ސަރަޙައްދުތައް ސުންނާފަތިކުރަން ފެށިތާ 15 މަސް ފަހުންނެވެ.

އެއްބަސްވުމުގެ ފުރަތަމަ މަރުޙަލާގެ ދަށުން މިނިވަން ކުރާނެ ކަމަށް ބުނި ދިރިތިބި އަސީރުންނާއި ޤައިދީން ވަނީ މިނިވަންކޮށް ނިމިފައެވެ.

ނަމަވެސް، ދެވަނަ ފިޔަވަހީގެ ދަށުން ހަނގުރާމަ ދާއިމީކޮށް ހުއްޓާލައި، ޣައްޒާގެ ސަރަޙައްދުތަކުން އިޒްރޭލު ސިފައިން ފައިބަން ހިމަނާފައިވާތީ، އެކި ބަހަނާތައް ދައްކައިގެން އިޒްރޭލުން ވަނީ ދެވަނަ ފިޔަވަހި ފެށުމުގެ މަޝްވަރާ ވެސް ކުރަން ދެކޮޅު ހަދައިފައެވެ.

ކިޔުންތެރިންގެ ހިޔާލު