ސައިބަރ ކުށްތަކުން ރައްކާތެރިވުމަށް ޤައުމީ ފެންވަރުގައި މަސައްކަތްކުރަންޖެހޭ ކަމަށް ދާޚިލީ ސަލާމަތާއި ފަންނިއްޔަތާއިބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

ވަޒީރު މިހެން ވިދާޅުވީ ސައިބަރ އެކްސްޕޯ އިފްތިތާޙްކުރުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.

ވަޒީރު އިޙްސާން ވިދާޅުވީ މުޅި ދުނިޔެއަށް ބަލާއިރުވެސް، ސައިބަރ ސެކިއުރިޓީއަށް ހުރަސްއެޅި އިންޓަރނެޓް މެދުވެރިކޮށް ކުށްކުރާ މީހުންގެ ނިސްބަތް އަހަރުން އަހަރަށް އިތުރުވަމުންދާ ކަމަށެވެ. އަދި މިއާއެކު ލިބެމުންދާ މާލީ ގެއްލުން އެތައް ޓްރިލިއަން ޑޮލަރަށް އަރާފައިވާ ކަމަށް ވެސް ވަޒީރު ފާހަގަކުރެއްވިއެވެ.

މި ރަސްމިއްޔާތުގައި ވާހަކަފުޅުދައްކަވަމުން ކޮމިޝަނަރ އޮފް ޕޮލިސް ޢަލީ ޝުޖާއު ވިދާޅުވީ، ރާއްޖޭގައި އިންޓަރނެޓު މެދުވެރިކޮށް ކުރާ ކުށްތަކުގެ ނިސްބަތް އިތުރުވަމުންދާ ކަމަށެވެ. އަދި މީގެ ސަބަބުން ރައްޔިތުންނަށް އިޔާދަނުކުރެވޭ ބޮޑެތި ގެއްލުން ވަމުންދާކަން ފާހަގަކުރެއްވިއެވެ.

ސައިބަރ އެކްސްޕޯއަކީ ސައިބަރ ސްޕޭސްގެ ތެރޭގައި ހިންގަމުންދާ ކުށްތަކާއި އަދި އެކުށްތަކުން ރައްކާތެރިވުމަށް އީޖާދުކުރަމުންދާ އާ އުފެއްދުންތައް ދައްކާލުމަށް ބާއްވާ އެކްސްޕޯއެކެވެ. މި އެކްސްޕޯގައި ސައިބަރ ސެކިއުރިޓީގެ ދާއިރާއިން ޚާއްސަ ޗެލެންޖެއް ފަރުމާކޮށްފައިވާއިރު، މި ޗެލެންޖް ފުރިހަމަކުރާ ފަރާތްތަކަށް ޚާއްސަ އިނާމުތަކެއް ދޭން ހަމަޖެހިފައިވާ ކަމަށް ދިވެހި ފުލުހުންގެ ޚިދުމަތުން ބުނެއެވެ.