އިނގިރޭސި އެފްއޭ ކަޕްގައި ރޭ ކުޅުނު ކުއާޓާ ފައިނަލް މެޗުތަކުން މޮޅުވެ، ކްރިސްޓަލް ޕެލަސް އާއި ނޮޓިންގހަމް ފޮރެސްޓުން އެ މުބާރާތުގެ ސެމީ ފައިނަލުން ޖާގަ ހޯދައިފިއެވެ.

މިއީ މިދިޔަ ހަތަރު އަހަރުގެ ތެރޭގައި ޕެލަސް އިން ސެމީގައި ކުޅޭ ދެވަނަ ފަހަރެވެ. އަނެއްކޮޅުން، މިއީ މިދިޔަ 34 އަހަރުގެ ތެރޭގައި ފޮރެސްޓުން ސެމީގައި ކުޅޭ ފުރަތަމަ ފަހަރެވެ.

ފުލަމްގެ ކްރޭވަން ކޮޓެޖުގައި ކުޅުނު މެޗުން ޕެލަސް މޮޅުވީ 3-0 އިންނެވެ. މި މެޗުގައި ޕެލަސް އިން ޖެހި ތިން ލަނޑުގެ ތެރެއިން ދެ ގޯލް ކާމިޔާބުކޮށްދިނީ ފުރަތަމަ ހާފުގައެވެ. ޕެލަސް އަށް މި ދެ ލަނޑު ޖަހައިދިނީ އެބެރޭޗީ އެޒޭ އާއި އިސްމާއިލާ ސާރ އެވެ.

ފަހު ހާފުގައި ޕެލަސްގެ ތިންވަނަ ލަނޑުޖެހީ އެޑީ އެންކެޓިއާ އެވެ.

މި މުބާރާތުގައި ރޭ ކުޅުނު އަނެއް މެޗުގައި ފޮރެސްޓުން ވަނީ ޕެނަލްޓީ ޖަހައިގެން ބްރައިޓަން އެންޑް ހޯވް އެލްބިއަން ބަލިކޮށްފައެވެ.

މި މެޗުގެ ފުރިހަމަ ވަގުތު ހަމަވިއިރު ދެ ޓީމަށް ލަނޑެއް ނުޖެހި އެއްވަރުވުމުން، ޕެނަލްޓީ ޝޫޓްއައުޓްގައި ފޮރެސްޓް މޮޅުވީ 4-3 އިންނެވެ.