ENGLISH

03 އޭޕްރީލު 2025

Advertisement

ބަޔާން މޮޅުވެ، ލީޑު ދަމަހައްޓައިފި

30 މާރިޗު 2025

|

މުޙައްމަދު އަދުހަމް

ބަޔާނަށް ލަނޑުޖަހައިދިނުމަށްފަހު ކޭން އުފާ ފާޅުކުރަނީ. --ފޮޓޯ: ރޮއިޓާސް

ޖަރުމަން ލީގުގައި ރޭ ކުޅުނު މެޗުގައި ސެއިންޓް ޕައުލީ 3-2 އިން ބަލިކޮށް، ބަޔާން މިއުނިކު ތާވަލްގެ ކުރީގައި ހަ ޕޮއިންޓުގެ ލީޑު ދަމަހައްޓައިފިއެވެ.

މި މޮޅާއެކު، ބަޔާން ވަނީ 27 މެޗުން 65 ޕޮއިންޓް ހަމަކޮށްފައެވެ. ދެވަނައިގައި އޮތް ބަޔާ ލެވަކޫސަން އަށް 59 ޕޮއިންޓް ލިބިފައިވާއިރު، އެގާރަ ޕޮއިންޓް ފަހަތުން ތިންވަނައިގައި އޮތީ އެއިންޓްރަކްޓް ފްރެންކްފާޓް އެވެ.

ބަޔާންގެ އެލިއާންޒް އެރީނާގައި ކުޅުނު މެޗުގެ 17 ވަނަ މިނެޓުގައި އެ ޓީމުން ލީޑު ނެގީ ހެރީ ކޭންގެ ގޯލުންނެވެ. އޭގެ ދިހަ މިނެޓު ފަހުން، ސެއިންޓް ޕައުލީން އެއްވަރުކުރީ އެލިއަސް ސާދު ވައްދާލި ލަނޑުންނެވެ.

ދެވަނަ ހާފުގައި ޖަރުމަންގެ ވިންގް، ލެރޯއީ ސާނޭ ކާމިޔާބުކުރި ދެ ލަނޑާއެކު، ބަޔާނުން އަލުން ލީޑު ނެގިއިރު، އިތުރު ވަގުތުގެ ތެރޭގައި ސެއިންޓް ޕައުލީގެ ލާސް ރިޒްކާގެ ލަނޑުން އެ ޓީމު ފަރަގު ކުޑަކުރިއެވެ.

މި މެޗުން ބަލިވި ސެއިންޓް ޕައުލީ އޮތީ 15 ވަނައިގައެވެ. އެ ޓީމަށް ލިބިފައިވަނީ 25 ޕޮއިންޓެވެ.

މި މުބާރާތުގައި ރޭ ކުޅުނު އެހެން މެޗުތަކުގެ ނަތީޖާއަށް ބަލާއިރު، ބޮރޫޝިއާ މުންޗެންގްލަޑްބަކް އަތުން އާރްބީ ލީޕްޒިގު ބަލިވީ 1-0 އިންނެވެ. ވީއެފްބީ ސްޓުޓްގާޓް އަތުން ފްރެންކްފާޓް މޮޅުވީ ވެސް 1-0 އިންނެވެ.

ކިޔުންތެރިންގެ ހިޔާލު