އީގޯ ޓޫޑޯގެ އިރުޝާދުގެ ދަށުން ޔުވެންޓަސް ކުޅުނު ފުރަތަމަ މެޗުގައި ޖެނޯއާ އަތުން 1-0 އިން އެ ޓީމު މޮޅުވެއްޖެއެވެ.

ޔުވެންޓަސްގެ ދަނޑުގައި ކުޅުނު މެޗުގައި ފެނިގެންދިޔަ ހަމައެކަނި ލަނޑު، 25 ވަނަ މިނެޓުގައި ކާމިޔާބުކޮށްދިނީ ތުރުކީގެ ޒުވާން ކުޅުންތެރިޔާ، ކެނާން ޔިލްޑީޒް އެވެ.

ކުރިން، ޔުވެންޓަސް އަށް ކުޅުނު ކްރޮއޭޝިއާގެ ޑިފެންޑަރު، ޓޫޑޯ ވަނީ އަންދްރެއާ ޕީރްލޯގެ އިރުޝާދުގެ ދަށުން ކުޅުނުއިރު އެ ޓީމުގެ އެސިސްޓެންޓް ކޯޗެއްގެ ގޮތުގައި މަސައްކަތްކޮށްފައެވެ.

މި ސީޒަނުގައި ޔުވެންޓަސްގެ ކޯޗުކަމާ ހަވާލުވި ތިއާގޯ މޮޓާ، މަގާމުން ވަކިކުރީ މިދިޔަ ހަފްތާގެ ތެރޭގައެވެ. ތިން އަހަރުގެ ކޮންޓްރެކްޓެއްގައި ސޮއިކުރި މޮޓާ ވަކިކޮށްފައި މިވަނީ މަގާމުގައި ހޭދަކުރިތާ ނުވަ މަސް ތެރޭގައެވެ. އެއީ، އެ ކުލަބުގެ ނަތީޖާތައް ދަށްވެ، ދިން ބައެއް ޓާގެޓްތަކަށް ވާސިލްނުވެވުމުންނެވެ.

ރޭގެ ނަތީޖާއާއެކު، ޔުވެންޓަސް އުޅެނީ ފަސްވަނައިގައެވެ. އެ ޓީމަށް ލިބިފައިވަނީ 30 މެޗުން 55 ޕޮއިންޓެވެ. ހަތަރު ވަނައިގައި އުޅޭ ބޮލޯނިއާއާ އެ ޓީމާ ދެމެދު ޕޮއިންޓެއްގެ ފަރަގެއް އޮތްއިރު، ތިންވަނައިގައި އޮތް އެޓަލާންޓާ އަށް އެއް މެޗު މަދުން ކުޅެގެން ލިބިފައިވަނީ 58 ޕޮއިންޓެވެ.

ލީގުގެ އެއްވަނައިގައި އުޅޭ އިންޓަރ މިލާނަށް ލިބިފައި ވަނީ 64 ޕޮއިންޓެވެ. ނަޕޯލީ ދެވަނައިގައި އޮތީ 61 ޕޮއިންޓާއެކު އެވެ.

މި މުބާރާތުގައި ރޭ ކުޅުނު އަނެއް މެޗުގައި ލެއްޗޭގެ ދަނޑުގައި އޭއެސް ރޯމާ މޮޅުވީ 1-0 އިންނެވެ.