ENGLISH

03 އޭޕްރީލު 2025

Advertisement

ބިންހެލުމުގައި މިޔަންމާ، ތައިލެންޑުން މަރުވި މީހުންގެ އަދަދު 1،600 އަށް، މީހުން ހޯދުމުގެ މަސައްކަތް ކުރިއަށް

30 މާރިޗު 2025

|

ހަސަން އާމިރު

ދެކުނު އިރުމަތީ އޭޝިޔާގެ މިޔަންމާއަށް އައި ބާރުގަދަ ބިންހެލުމުގައި މަރުވި މީހުންގެ އަދަދު 1،600 އަށް އަރާފައިވާއިރު، ވެއްޓިފައިވާ އިމާރާތްތަކުގެ ދަށުން މީހުން ހޯދުމުގެ މަސައްކަތް އަދިވެސް ދަނީ ކުރެވެމުންނެވެ.

މިޔަންމާގެ ސަގާއިންގް ސަހަރުގެ ހުޅަނގު އުތުރަށް ބިންހެލުން އައީ 7.7 މެގްނިޓިޔުޑްގެ ބާރުމިނުގައެވެ. އެ ބިންހެލުމުގެ 12 ވަރަކަށް މިނެޓުފަހުން، 6.4 މެގްނިޓިޔުޑްގެ ބާރުމިނުގައި އެ ސަރަޙައްދު ކައިރިއަށް އިތުރު ލޮޅުމެއް ވެސް ވަނީ އައިސްފައެވެ.

އެ ބިންހެލުމުގައި އެތަކެއް އިމާރާތެއް ވެއްޓި، މަގުތަކުގެ ބިންގަނޑު ކަނޑައިގެން ގޮސް، ބްރިޖުތައް ވެސް ވަނީ ވެއްޓިފައެވެ.

ބިންހެލުމުގެ އަސަރު އެންމެ ބޮޑަށް ކޮށްފައިވަނީ، 1.7 މިލިއަން މީހުން ދިރިއުޅޭ މެންޑަލޭ އަށެވެ.

މިޔަންމާގެ އަސްކަރީ ސަރުކާރުން ބުނީ، މިހާތަނަށް 1،644 މީހުން މަރުވެފައިވާ ކަމަށާއި، 3،400 އަށް ވުރެ ގިނަ މީހުން ޒަޚަމްވެގެން ފަރުވާދެމުންދާ ކަމަށެވެ.

މީގެއިތުރުން، 139 މީހަކު ގެއްލިގެން ރިޕޯޓުކޮށްފައިވާ ކަމަށް ވެސް ބުނެފައިވެއެވެ.

ބިންހެލުމުގައި ގިނަ ސަރަޙައްދުތަކުން މުއާސަލާތީ ޚިދުމަތް ކެނޑިފައިވާތީ، ލިބުނު ގެއްލުންތަކާއި މަރުވި މީހުންގެ އަދަދު ރިޕޯޓުކުރުމުގައި ވެސް ބޮޑެތި ދަތިތައް ވަނީ ކުރިމަތިވެފައެވެ.

މި ކާރިސާގެ އަސަރު އެންމެ ބޮޑަށް ކޮށްފައިވާ ހަ ސަރަޙައްދެއްގައި ކުއްލި ޙާލަތު އިޢުލާނުކޮށްފައިވާއިރު، މިޔަންމާގައި މިހާރު ވެރިކަން ކުރަމުންދާ އަސްކަރިއްޔާއިން ވަނީ ބައިނަލްއަޤުވާމީ އެހީތެރިކަމަށް އެދިފައެވެ.

އިންޑިޔާ، ޗައިނާ އަދި އެމެރިކާއާ އެކު ދުނިޔޭގެ ގިނަ ޤައުމުތަކުން ވަނީ އެހީތެރިކަން ފޯރުކޮށްދޭނެ ކަމަށް ބުނެފައެވެ.

އެ ބިންހެލުމުގެ ލޮޅުން، އިންޑިޔާ އާއި ޗައިނާއަށް ވެސް ކޮށްފައިވާއިރު، އޭގެ އެންމެ ބޮޑު އަސަރެއްކޮށްފައިވަނީ އަވަށްޓެރި ތައިލެންޑަށެވެ.

ތައިލެންޑުގެ ވެރިރަށް ބެންގްކޮކްގައި އުސް އިމާރާތްތަކަށް ލޮޅުން އަރައި، ހަދަމުންދިޔަ 30 ބުރީގެ އިމާރާތެއް ވަނީ ވެއްޓިފައެވެ. އެ ހާދިސާގައި މަރުވި މީހުންގެ އަދަދު 17 އަށް އަރާފައިވާ ކަމަށް ކަމާގުޅޭ އިދާރާތަކުން ވަނީ ބުނެފައެވެ.

އެ އިމާރާތުގެ ދަށުވެފައި 100 އަށް ވުރެ ގިނަ މީހުން ތިބި ކަމަށް ބެލެވޭއިރު، އެ މީހުން ހޯދުމުގެ މަސައްކަތް އަދިވެސް ދަނީ ކުރެވެމުންނެވެ.

ކިޔުންތެރިންގެ ހިޔާލު