ފަހު ހާފުގައި ފްރާންސްގެ ތަރި، ކީލިއަން އެމްބާޕޭ ވައްދާލި ލަނޑާއެކު، ލެގަނޭސް އަތުން ފަހަތުން އަރައި 3-2 އިން ރެއާލް މެޑްރިޑް މޮޅުވެއްޖެއެވެ. 

މި މޮޅާއެކު، ރެއާލް ވަނީ ލީގުގެ އެއްވަނައިގައި އުޅޭ ބާސެލޯނާއާ ޕޮއިންޓުގެ ގޮތުން އެއްވަރުކޮށްފައެވެ. އެންމެ ކުރީގައި އުޅޭ ބާސެލޯނާ އަށް 28 މެޗުން ލިބިފައިވަނީ 63 ޕޮއިންޓެވެ. އެއް މެޗު އިތުރަށް ކުޅެގެން ރެއާލަށް ވެސް މިއަދަދަށް ޕޮއިންޓް ލިބިފައިވާއިރު، ބާސެލޯނާ އަށް ކުރިލިބެނީ ފައިދާ ގޯލްގެ ތަފާތުންނެވެ. ތިންވަނައިގައި އުޅޭ އެތުލެޓިކޯ މެޑްރިޑަށް ލިބިފައިވަނީ 57 ޕޮއިންޓެވެ.

ރެއާލްގެ ދަނޑުގައި ކުޅުނު މެޗުގެ 32 ވަނަ މިނެޓުގައި އެ ޓީމުން ލީޑު ނެގީ ލިބުނު ޕެނަލްޓީއަކުން އެމްބާޕޭ އެވެ. މިއީ ޕެނަލްޓީ އޭރިޔާ ތެރެއިން ރެއާލްގެ އާރްދާ ގުލާ އަށް ލެގަނޭސްގެ ކުޅުންތެރިއަކު ކުރި ފައުލަކަށް ރެފްރީ ދިން ޕެނަލްޓީއެކެވެ.

ރެއާލުން ލަނޑު ޖެހިތާ މިނެޓެއްގެ ތެރޭގައި ލެގަނޭސް އަށް އެއްވަރުކޮށްދިނީ ޑިއެގޯ ގާސިއާ އެވެ. އަދި އޭގެފަހުން، ފުރަތަމަ ހާފު ނިމުމުގެ ކުރިން، ޑެނިއަލް ރާބާގެ ގޯލުން ލެގަނޭސް ވަނީ ނަތީޖާ 2-1 އަށް ބަދަލުކޮށްލައިފައެވެ.

ދެވަނަ ހާފުގެ ކުޅުން ފެށިތާ ކުރީކޮޅު، ރެއާލަށް އެއްވަރުކޮށްދިނި ޖޫޑް ބެލިންހަމް އެވެ. އަދި، އޭގެފަހުން، މެޗު ނިމެން 14 މިނެޓަށްވެފައިވަނިކޮށް އެމްބާޕޭ، ރެއާލް މޮޅުކޮށްދިނީ ފޮނުވާލި ހިތްގައިމު ހިލޭޖެހުމަކުންނެވެ. މިއީ މި ސީޒަނުގައި ރެއާލަށް އޭނާ ޖަހައިދިން 33 ވަނަ ގޯލެވެ. މީގެތެރެއިން، 22 ގޯލް ޖަހާފައި ވަނީ ލީގުގައެވެ.

މި މެޗުން ބަލިވި ލެގަނޭސް އޮތީ 18 ވަނައިގައެވެ. އެ ޓީމަށް ލިބިފައިވަނީ 27 ޕޮއިންޓެވެ.

ލީގުގައި ރޭ ކުޅުނު އަނެއް މެޗުގައި އެސްޕަންޔޯލްގެ ދަނޑުގައި އެ ޓީމު ވަނީ 1-1 އިން އެތުލެޓިކޯއާ އެއްވަރުކޮށްފައެވެ.