ދިވެހިރާއްޖޭގެ ތާރީޚުގައި ކުޅިވަރުގެ އެންމެ ގިނަ މަޝްރޫޢުތަކެއް ހިންގުމަށް އެއް ދުވަހެއްގައި ސޮއިކޮށް، ކުޅިވަރާއި ހަށިހެޔޮކަމާ ބެހޭ ވުޒާރާ އިން ސަރުކާރުގެ ތިން ކުންފުންޏަކާ އެ މަސައްކަތްކުރުމަށް މިއަދު ހަވާލުކޮށްފިއެވެ.

އެގޮތުން، ކުޅިވަރުގެ 77 މަޝްރޫއެއް ހިންގުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ ލިމިޓެޑް (އެމްޓީސީސީ)، ފެނަކަ ކޯޕަރޭޝަން ލިމިޓެޑާއި ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އާއެކު މިއަދު ވަނީ ސޮއިކޮށްފައެވެ.

ފެނަކައާއެކު މިއަދު ސޮއިކުރެވުނު 28 މަޝްރޫޢުގެ އެއްބަސްވުމުގައި ކުޅިވަރު ވުޒާރާގެ ފަރާތުން ސޮއިކުރެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އެވެ. ފެނަކައިގެ ފަރާތުން ސޮއިކުރެއްވީ މެނޭޖިން ޑިރެކްޓަރ ރިޓަޔާޑް މުޙައްމަދު ނަޖާހު އެވެ.

އަދި އާރުޑީސީއާއެކު ސޮއިކުރި 23 މަޝްރޫޢުގެ މަސައްކަތްކުރުމަށް ކުޅިވަރު ވުޒާރާގެ ފަރާތުން ވަޒީރު ރާފިޢު ސޮއިކުރެއްވިއިރު، އާރްޑީސީގެ ފަރާތުން އެއްބަސްވުމުގައި ސޮއިކުރެއްވީ މެނޭޖިންގ ޑިރެކްޓަރ ބްރިގޭޑިއަރ ޖެނެރަލް (ރިޓަޔާޑް) އަލީ ޒުހެއިރު އެވެ.

މިއަދު އެމްޓީސީސީއާއެކު ސޮއިކުރެވުނު އެއްބަސްވުންތަކުގައި ކުޅިވަރު ވުޒާރާގެ ފަރާތުން ވަޒީރު ރާފިޢު ސޮއިކުރެއްވިއިރު، އެމްޓީސީސީގެ ފަރާތުން ސޮއިކުރެއްވީ ޑެޕިއުޓީ ކޮމިޝަނަރ އޮފް ޕޮލިސް (ރިޓަޔާޑް) އަހުމަދު ސައުދީ އެވެ. އެ ކުންފުނިން ވަނީ 26 މަޝްރޫޢެއްގައި ސޮއިކޮށްފައެވެ.

މި އެއްބަސްވުންތަކުގެ ދަށުން އައުޓްޑޯ ޖިމް، ފިޓްނަސް އެންޑް ރެކްރިއޭޝަން ސެންޓަރުތައް، ފުޓްސަލް ދަނޑުތައް، ފުޓްބޯޅަ ދަނޑުތައް، ބެޓްމިންޓަން ކޯޓު އަދި ވޮލީބޯޅަ ކޯޓުތައްވެސް ރާއްޖޭގެ ހުރިހާ ހިސާބެއްގައި ތަރައްޤީކުރުމަށް ވަނީ ހަމަޖެހިފައެވެ.

ދެ އަހަރުގެ ތެރޭގައި ކުޅިވަރުގެ ތެރެއިން ރައްޔިތުންނަށް އުފާވެރިކަން ގެނެސްދީ، ދުޅަހެޔޮ ހަށިހެޔޮ މުޖުތަމަޢުއެއް ބިނާކޮށް، މޮޅެތި ކުޅުންތެރިން އުފެއްދުމަށް މަގުފަހިކޮށްދެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންފައިވާ ވަޢުދުފުޅު ފުއްދުމަކީ ކުޅިވަރާއި ހަށިހެޔޮކަމާ ބެހޭ ވުޒާރާގެ އަމާޒެކެވެ.