ފީފާ ވޯލްޑް ކަޕް ކޮލިފައިންގެ ނަތީޖާތައް ދަށް ވުމުން ބްރެޒިލްގެ ކޯޗުގެ މަގާމުން ޑޮރިވާލް ޖޫނިއާ ވަކިކޮށްފިއެވެ.

އުމުރުން 62 އަހަރުގެ ޑޮރިވާލް ޖޫނިއާ، މަގާމުން ދުރުކޮށްފައިމިވަނީ 14 މަސްދުވަހަށް ފަހު އެވެ.

ބްރެޒިލްގެ ފުޓްބޯޅަ ފެޑެރޭޝަނުގެ ރައީސް، އެޑްނާލްޑޯ ރޮޑްރިގޭސް، ގައުމީ ޓީމުގެ ކޯޗުގެ މަގާމުން ޑޮރިވާލް ޖޫނިއާ ވަކިކޮށްފައިމިވަނީ، ކޮލިފައިންގައި ބޮޑު ތަފާތަކުން ވާދަވެރި އާޖެންޓީނާ އަތުން ބަލިވިތާ ތިން ދުވަސް ފަހުންނެވެ. މިއީ ވޯލްޑް ކަޕް ކޮލިފައިންގައި ބްރެޒިލްގެ އެންމެ ދެރަ ނަތީޖާއެވެ.

ބްރެޒިލްގެ ފުޓްބޯޅަ ފެޑެރޭޝަން (ސީބީއެފް) ގެ ރައީސް، ރޮޑްރިގޭސް ބުނީ، ގައުމީ ޓީމާއެކު ޑޮރިވާލް ޖޫނިއާގެ ދައުރު ނިމިފައިވާ ކަމަށެވެ.

"މިހާރުން ފެށިގެން ބަދަލުގައި އެހެން ކޯޗެއް ގެނައުމުގެ މަސައްކަތް މި ފެށީ،" ރޮޑްރިގޭސް ބުންޏެވެ.

ރޮޑްރިގޭސް ބުނީ، ބްރެޒިލްގެ ކޯޗުގެ މަގާމަށް ގެންނަ ފަރާތަކާ ގުޅޭގޮތުން މި ދުވަސްވަރު ގިނަ ވާހަކަތަކެއް ދެކެވެމުންދާ ކަމަށާއި، އެކަމަކު އޭގެތެރެއިން އެއްވެސް ވާހަކައަކީ ފުޓްބޯޅަ ފެޑެރޭޝަނާ ގުޅުންހުރި ފަރާތަކުން ދައްކާފައިވާ ވާހަކަތައް ނޫންކަން ޔަގީންކޮށްދޭ ކަމަށެވެ.

ޑޮރިވާލް ޖޫނިއާ އާއެކު ބްރެޒިލަށް ކާމިޔާބުކުރެވުނީ އެންމެ ހަތް މެޗެވެ. އަނެއް ހަތް މެޗުން އެއްވަރުވިއިރު، ދެ މެޗުން ބަލިވިއެވެ. އޭގެތެރެއިން، އެ ޓީމު އެންމެ ފަހުން ކުޅުނު ހަތަރު މެޗުގެ ތެރެއިން މޮޅުވީ އެންމެ މެޗަކުންނެވެ. ބްރެޒިލުން 25 ލަނޑުޖެހިއިރު، ބައިކޮޅަށް 17 ލަނޑު ވަދެފައިވެއެވެ.

މިދިޔަ އަހަރުގެ ކޮޕާ އެމެރިކާ ފުޓްބޯޅަ މުބާރާތުގެ ކުއާޓާ ފައިނަލާ ހިސާބުން ބްރެޒިލް ކެޓިއިރު، އަންނަ އަހަރު އުތުރު އެމެރިކާގައި ބާއްވާ ފީފާ ވޯލްޑް ކަޕްގެ ކޮލިފައިންގައި މިހާތަނަށް ކުޅުނު މެޗުތަކަށްފަހު ބްރެޒިލް އޮތީ ފަސްވަނައިގައެވެ. އެ މުބާރާތުން އޮޓޮމެޓިކް ޖާގަ ލިބެނީ ދެކުނު އެމެރިކާ ސަރަހައްދުގެ އެންމެ ގަދަ ހަ ޓީމަށެވެ.

ފަހުގެ މީޑިއާ ރިޕޯޓްތައް ބުނާގޮތުން، ބްރެޒިލްގެ ފުޓްބޯޅަ ފެޑެރޭޝަނުން އެ ގައުމުގެ ކޯޗުގެ މަގާމަށް ރެއާލް މެޑްރިޑްގެ ކޯޗު، ކާލޯ އަންޗެލޮޓީ ގެނައުމަށް އަދިވެސް މަސައްކަތްކުރާނެ އެވެ. އެކަން ކާމިޔާބުނުވެއްޖެނަމަ، އަލް ހިލާލްގެ ކޯޗު، ޖޯޖް ޖީސަސް ގެނައުމުގެ ފުރުޞަތު އެބައޮތް ކަމަށް ހަބަރުތައް ބުނެއެވެ.

ބްރެޒިލްގެ ފުޓްބޯޅަ ފެޑެރޭޝަނުން މީގެކުރީން ދެފަހަރެއްގެ މަތީން ވަނީ، އަންޗެލޮޓީ ގެނައުމަށް މަސައްކަތްކޮށްފައެވެ. އެއިން އެއްވެސް ފަހަރަކު އެކަން ކާމިޔާބުވާގޮތެއް ނުވިއެވެ.

ބްރެޒިލަށް ދެން އޮތީ ކޮލިފައިންގައި އަންނަ ޖޫން މަހު އެކުއޭޑޯ އާއި ޕެރަގުއޭއާ ދެކޮޅަށް ކުޅެން ޖެހޭ މެޗުތަކެވެ.