ޖަރުމަން ލީގުގައި ރޭ ކުޅުނު މެޗުގައި ބޯކުމް 3-1 އިން ބަލިކޮށް، އެންމެ ފަހުގެ ޗެމްޕިއަން، ބަޔާ ލެވަކޫސަން، ތާވަލްގެ ކުރީގައި އުޅޭ ބަޔާން މިއުނިކާ ދެމެދު އޮތް ފަރަގު ކުޑަކޮށްފިއެވެ.

މި ނަތީޖާއާއެކު، ލެވަކޫސަން ވަނީ ބަޔާންއާ ތިން ޕޮއިންޓާ ގާތަށް ޖެހިލައިފައެވެ. ބަޔާން އެއްވަނައިގައި އުޅެނީ 26 މެޗުން 62 ޕޮއިންޓް ހޯދައިގެންނެވެ. ލެވަކޫސަން ދެވަނައިގައި އޮތީ 59 ޕޮއިންޓާއެކު އެވެ. ތިންވަނައިގައި އުޅޭ މައިންޒް ވަނީ 45 ޕޮއިންޓް ހަމަކޮށްފައެވެ.

ލެވަކޫސަންގެ ދަނޑުގައި ކުޅުނު މެޗުގައި އެ ޓީމަށް ލީޑު ނަގައިދިނީ ސްޕެއިނުގެ މިޑްފީލްޑަރު، އަލެއިކްސް ގާސިއާ އެވެ. ބޯކުމް އަށް އެއްވަރުކޮށްދިނީ ފެލިކްސް ޕަސްލަކް އެވެ. ފުރަތަމަ ހާފު ނިމުނީ ދެ ޓީމު 1-1 އިން އެއްވަރުވެގެންނެވެ.

ފަހު ހާފުގައި ލެވަކޫސަންގެ އަނެއް ދެ ލަނޑު ޖަހައިދިނީ ވިކްޓޯ ބޮނިފޭސް އާއި އަމީން އަޑްލީ އެވެ.

މި މެޗުން ބަލިވި ބޯކުމް އޮތީ 16 ވަނައިގައެވެ. އެ ޓީމަށް ލިބިފައިވަނީ 20 ޕޮއިންޓެވެ.

މުބާރާތުގައި ބަޔާން ކުޅޭ މެޗުގައި އަމިއްލަ ދަނޑުގައި ނުކުންނާނީ ސެއިންޓް ޕައުލީއާ ދެކޮޅަށެވެ. މި މެޗު ފަށާނީ ރާއްޖޭގަޑިން 7:30 ގައެވެ.