އިންޑިއަން ޕްރިމިއަރ ލީގު (އައިޕީއެލް) ރޭ ކުޅުނު މެޗުގައި ޗެންނާއީ ސުޕަ ކިންގްސް އަތުން ރޯޔަލް ޗެލެންޖާސް ބެންގަލޫރު މޮޅުވެއްޖެއެވެ.

މިއީ ބެންގަލޫރުން ހޯދި ދެވަނަ މޮޅެވެ. މިހާތަނަށް ދެ މެޗުން މޮޅުވި ހަމައެކަނި ޓީމަކީ ވެސް ބެންގަލޫރެވެ. އަދި، މިއީ މިދިޔަ 17 އަހަރު ދުވަހުގެ ތެރޭގައި ޗެންނާއީގައި އެ ޓީމު އަތުން ބެންގަލޫރު މޮޅުވި ފުރަތަމަ ފަހަރުވެސްމެއެވެ.

ބެންގަލޫރުން މި މެޗު ކާމިޔާބުކުރީ 50 ލަނޑުންނެވެ.

އެމްއޭ ޗިޑަމްބަރަމް ސްޓޭޑިއަމްގައި ކުޅުނު މެޗުގެ ޓޮސް ދިމާވުމުން ޗެންނާއީ އިން ގަސްދުކުރީ ހޮވަން އަރާށެވެ. ބެންގަލޫރުން ކުޅެން އަރައި، 20 އޯވަރުގެ ތެރޭގައި ހަތް ވިކެޓަށް 196 ލަނޑު ހެދިއެވެ.

މި އިނިންގްސްގައި ބެންގަލޫރުން އެންމެ ރަނގަޅަށް ކުޅުނީ ކެޕްޓަން، ރަޖަތު ޕަތީދާރު އެވެ. އޭނާ ވަނީ 32 ބޯޅައިން 51 ލަނޑު ހަދައިފައެވެ. ދެން އެންމެ ރަނގަޅަށް ކުޅުނު ފިލް ސޯލްޓް 16 ބޯޅައިން 32 ލަނޑު ހެދިއިރު، ޓިމް ޑޭވިޑް ވަނީ ނުބައިނުވެ 8 ބޯޅައިން 22 ލަނޑު ހަދައިފައެވެ.

ޗެންނާއީ އިން އެންމެ ރަނގަޅަށް އުކީ ނޫރް އަހުމަދު ތިން ވިކެޓްނެގިއިރު، މަތީޝާ ޕަތިރާނާ ދެ ވިކެޓްނެގިއެވެ.

ރައްދުގައި ކުޅެން އަރައި، ޗެންނާއީ އަށް 20 އޯވަރުގެ ތެރޭގައި އަށް ކުޅުންތެރިން ނުބައިވެގެން ހެދުނީ 146 ލަނޑެވެ. ޗެންނާއީ އިން އެންމެ ރަނގަޅަށް ކުޅުނީ ކުރީގެ ކެޕްޓަން، މަހެންދްރަ ސިންގ ދޯނީ އެވެ. އޭނާ ވަނީ ނުބައިނުވެ 16 ބޯޅައިން 30 ލަނޑު ހަދައިފައެވެ. މީގެއިތުރުން، އެ ޓީމުގެ އޯޕަނިންގ ބެޓްސްމަން، ރަޗިން ރަވިންދުރަ 41 ލަނޑު ހެދިއެވެ.

ބެންގަލޫރުން އެންމެ ރަނގަޅަށް އުކީ ތިން ވިކެޓްނެގި ޖޯޝް ހޭޒަލްވުޑް އެވެ. އެ ޓީމުގެ ޔާޝް ދަޔަލް އާއި ލިއަމް ލިވިންގސްޓޯން ވެސް ދެ ވިކެޓް ނެގިއެވެ.

މެޗުގެ މޮޅު ކުޅުންތެރިއަކަށް ހޮވުނީ ބެންގަލޫރުގެ ކެޕްޓަން، ރަޖަތު ޕަތީދާރު އެވެ.