އިޒްރޭލުން އިސްތިޢުމާރުކޮށްފައި އޮންނަ ހުޅަނގު އައްސޭރީގައި ދިރިއުޅޭ، ޣައްސާން ޢަބްދުލް ބާސިތު އޭނާގެ އާއިލާ ގޮވައިގެން މިދިޔަ ހޯމަ ދުވަހު ގެއިން ނުކުތީ ތިމާގެ މީހެއްގެ ކައިރިއަށް ޒިޔާރަތްކޮށްލައި ރޯދަވީއްލުމަށެވެ.

ނަމަވެސް، އެރޭ ބާސިތުގެ އާއިލާއަށް ލިބުނީ، ޔަހޫދީންތަކެއް އޭނާގެ ގެއަށް ވެރިވެގަތްކަމުގެ ޚަބަރެވެ. ބާސިތު އެނބުރި އައިސް، ގެއަށް ވެރިވެގަނެގެން ތިބި މީހުންނާ ސުވާލެއް ކުރަން ވެސް ޔަހޫދީންގެ ސިފައިން ފުރުޞަތެއް ނުދިނެވެ.

އެ ޔަހޫދީންތައް ބާސިތުގެ ގެއަށް ވަދެ ތިބީ، ކޮންމެވެސް މީހެއްގެ އަތުން އެ ގެ ގަނެގެން ކަމަށް ބުނެއެވެ.

"ކޮންމެވެސް މީހެއްގެ އަތުން ގެ ގަތީކަމަށް އެ މީހުން [ޔަހޫދީން] މި ބުނަނީ. އެކަމަކު ކިހިނެއް އެހެންވާނީ؟ މި ގެ ވިއްކާކަށް ނުވެސް އުޅެން. އަދި ވިއްކުމުގެ ޤާނޫނީ ބާރެއް އެއްވެސް މީހަކަށް ދީފައެއް ވެސް ނޯންނާނެ،" މާޔޫސްވެފައިހުރި ބާސިތު އަލްޖަޒީރާ ނޫހަށް ބުންޏެވެ.

ޕަލަސްތީނުގެ ސަރަޙައްދެއްގެ ގޮތުގައި ކަނޑައަޅާފައިވާ ހުޅަނގު އައްސޭރި އިޒްރޭލުން އިސްތިޢުމާރު ކޮށްފައިވާ ކަމަށް ބައިނަލްއަޤުވާމީ ޤާނޫނުގެ ދަށަށް ފެތެއެވެ. އިޒްރޭލުގެ ޤާނޫނުތައް އެތަނަށް ނުހިނގާއިރު، އެ ސަރަޙައްދަށް އިޒްރޭލުގެ ރައްޔިތުން ބަދަލުކުރުމާއި ފަލަސްތީނުގެ ރައްޔިތުން ބޭރުކުރުމަކީ ބައިނަލްއަޤުވާމީ ޤާނޫނުތަކުގެ ދަށުން މަނާކަމެކެވެ.

ނަމަވެސް، ހުޅަނގު އައްސޭރީގައި 750،000 އިޒްރޭލު މީހުން ޣައިރު ޤާނޫނީ އާބާދީތައް ވަނީ ޤާއިމުކޮށްފައެވެ. އެކަމަށްޓަކައި ވަގު ގޯތީގެ ރަޖިސްޓްރީތައް ހައްދައިގެން، ފަލަސްތީނުގެ ރައްޔިތުންގެ ގެދޮރާއި ބިންތައް ދަނީ ފޭރެމުންނެވެ.

ވަގު ލިޔެކިޔުންތައް ހެދުމަކީ ހުޅަނގު އައްސޭރި ޔަހޫދީންގެ އަތްދަށު ކުރަން ބޭނުންކުރާ ހީލަތްތެރި އުކުޅުތަކުގެ ތެރެއިން އެއް އުކުޅެވެ.

ހަތިޔާރުއެޅި އިޒްރޭލު ސިފައިން ވާގިވެރިވެގެން، ޔަހޫދީން ދަނީ ފަލަސްތީނުގެ ނިކަމެތި ރައްޔިތުންގެ ގެދޮރާއި ދަނޑުބިންތަކަށް ގެއްލުން ދިނުމާއި، ޖަނަވާރުތަކާއި މުދާތައް ފޭރިގަތުމަކީ ވެސް ބޭނުންކުރާ އުކުޅުތަކެވެ.

ފަލަސްތީނުގައި ހަރަކާތްތެރިވާ މަދަނީ ބައެއް ޖަމްޢިއްޔާތަކުން ލަފާކުރާ ގޮތުގައި، ހުޅަނގު އައްސޭރީގައި ފަލަސްތީނުގެ ބިންތަކުގެ ތެރެއިން 14 ޕަސެންޓު އިޒްރޭލުން މިހާރު ވެސް ވަނީ ގަދަބާރުން ފޭރިގެންފައެވެ. މީގެތެރެއިން ބޮޑު ބައެއް އިސްތިޢުމާރުކޮށްފައިވަނީ، 2022 ވަނަ އަހަރު އިޒްރޭލުގެ މިހާރުގެ ސަރުކާރު ވެރިކަމަށް އައިފަހުންނެވެ.

ހުޅަނގު އައްސޭރިއަށް ވެރިވެގަތުމަށް ޔަހޫދީން ބޭނުންކުރާ އެންމެ ވަރުގަދަ އުކުޅަކީ އަނިޔާވެރިކަމެވެ. އެއީ އަމިއްލަ ގެދޮރުގައި ދިރިނޫޅެވޭ މިންވަރަށް އަނިޔާވެރިވެ، ބިރު ދައްކައި، ގެދޮރު ދޫކޮށް ފަލަސްތީނު ރައްޔިތުން ދިޔުމަށް މަޖުބޫރުކުރުވުމެވެ.

އެމެރިކާގެ ރައީސް ޑޮނަލްޑް ޓްރަމްޕް ދެވަނަ ދައުރަކަށް އިންތިޚާބުވެވަޑައިގެންނެވިފަހުން، އިޒްރޭލުގެ އަނިޔާވެރިކަން ވަނީ އެތައް ގުނައެއް އިތުރުވެފައެވެ. އެއާ އެކު، ފަލަސްތީނުގެ ބިންތައް ފޭރިގަންނަން ކުރާ މަސައްކަތުގެ ދުވެލި ވެސް ވަނީ ބާރުކޮށްލައިފައެވެ.