ދެކުނު އިރުމަތީ އޭޝިޔާގެ މިޔަންމާއަށް އިއްޔެ އައި ބާރުގަދަ ބިންހެލުމުގައި، ބޮޑެތި ގެއްލުންތައް ލިބި މިހާތަނަށް ހާހަކަށް ވުރެ ގިނަ މީހުން މަރުވެފައިވާ ކަމަށް އެ ޤައުމުގެ އަސްކަރީ ސަރުކާރުން ބުނެފިއެވެ.

އިއްޔެ މެންދުރުފަހުގެ ވަގުތެއްގައި ސަގާއިންގް ސަހަރުގެ ހުޅަނގު އުތުރަށް ބިންހެލުން އައީ 7.7 މެގްނިޓިޔުޑްގެ ބާރުމިނުގައެވެ. އެ ބިންހެލުމުގެ 12 ވަރަކަށް މިނެޓުފަހުން، 6.4 މެގްނިޓިޔުޑްގެ ބާރުމިނުގައި އެ ސަރަޙައްދު ކައިރިއަށް އިތުރު ލޮޅުމެއް ވެސް ވަނީ އައިސްފައެވެ.

އެ ބިންހެލުމުގައި އެތަކެއް އިމާރާތެއް ވެއްޓި، މަގުތަކުގެ ބިންގަނޑު ކަނޑައިގެން ގޮސް، ބްރިޖުތައް ވެސް ވަނީ ވެއްޓިފައެވެ.

މިޔަންމާގެ އަސްކަރީ ލީޑަރު މިން އާންގް ލައިންގް ވިދާޅުވި ގޮތުގައި، މި ހާދިސާގައި އެތައް ސަތޭކަ ބަޔަކު ޒަޚަމްވެގެން ދަނީ ފަރުވާދެމުންނެވެ.

އެ ބިންހެލުމުގެ ލޮޅުން، އިންޑިޔާ އާއި ޗައިނާއަށް ވެސް ކޮށްފައިވާއިރު، އޭގެ އެންމެ ބޮޑު އަސަރެއްކޮށްފައިވަނީ އަވަށްޓެރި ތައިލެންޑަށެވެ.

ތައިލެންޑުގެ ވެރިރަށް ބެންގްކޮކްގައި އުސް އިމާރާތްތަކަށް ލޮޅުން އަރައި، ހަދަމުންދިޔަ 30 ބުރީގެ އިމާރާތެއް ވަނީ ވެއްޓިފައެވެ. އެ ހާދިސާގައި މިހާތަނަށް ހަ މީހަކު މަރުވެފައިވާއިރު، އެ އިމާރާތުގައި މަސައްކަތް ކުރަމުންދިޔަ 100 އަށް ވުރެ ގިނަ މީހުން ހޯދުމުގެ މަސައްކަތް ދަނީ ކުރެވެމުންނެވެ.

ކުރިއަށް އޮތް ދުވަސްތަކުގައި ދެ ޤައުމުގައި ވެސް މަރުވި މީހުންގެ އަދަދު އިތުރުވާނެ ކަމަށް ކަމާގުޅޭ އިދާރާތަކުން ވަނީ ލަފާކޮށްފައެވެ.

މި ކާރިސާގެ އަސަރު އެންމެ ބޮޑަށް ކޮށްފައިވާ ހަ ސަރަޙައްދެއްގައި ކުއްލި ޙާލަތު އިޢުލާނުކޮށްފައިވާއިރު، މިޔަންމާގައި މިހާރު ވެރިކަން ކުރަމުންދާ އަސްކަރިއްޔާއިން ވަނީ ބައިނަލްއަޤުވާމީ އެހީތެރިކަމަށް އެދިފައެވެ.

ދާޚިލީ ހަނގުރާމައެއްގެ ތެރޭގައި އޮތް، މިޔަންމާގައި ސިއްޙީ އަދި އުމްރާނީ ވަޞީލަތްތައް ބަލިކަށިވެފައިވާތީ، މިފަދަ ކާރިސާއަކާ ކުރިމަތިލުމުގެ ޤާބިލުކަމެއް ނުހުންނާނެކަމަށް މާހިރުން ވަނީ ބުނެފައެވެ.