ENGLISH

04 އޭޕްރީލު 2025

Advertisement

މެންޗެސްޓަރ ސިޓީއާ ގުޅުންހުރި އެއްވެސް ބަޔަކަށް ކުލަބް ވޯލްޑް ކަޕްގެ ބޯނަސް ލިބިގެންނުވާނެ: ގާޑިއޯލާ

28 މާރިޗު 2025

|

މުޙައްމަދު އަދުހަމް

މެންޗެސްޓަރ ސިޓީގެ ކޯޗު، ޕެޕް ގާޑިއޯލާ. --ފޮޓޯ: ގެޓީ އިމޭޖަސް

އަންނަ ޖޫން މަހު ބާއްވާ ފީފާ ކުލަބު ވޯލްޑް ކަޕުން ލިބިދާނެ އެއްވެސް ބޯނަހެއް މެންޗެސްޓަރ ސިޓީގެ ކުޅުންތެރިންނާއި ސްޓާފުންނަށް ލިބިގެންނުވާނެ ކަމަށް އެ ޓީމުގެ ކޯޗު، ޕެޕް ގާޑިއޯލާ ބުނެފިއެވެ.

އެންމެ ފަހުގެ ޕްރިމިއަރ ލީގުގެ ޗެމްޕިއަން، ސިޓީން މި ފަހަރުގެ ސީޒަނުގައި ފޯމު ދަށްވެ، ދެރަ ނަތީޖާތަކެއް ނެރެފައިވުމުން އެ ޓީމަށް ލީގުގައި ގަދަ ހަތަރެއްގެ ރޭހުގައި ވެސް ވަނީ އުނދަގޫތައް ކުރިމަތިވެފައެވެ.

އިނގިރޭސި ލީގު ކަޕުން ކަޓާފައިވާއިރު، ސިޓީ އަށް މި ސީޒަނުގައި ޓްރޮފީއެއް ކާމިޔާބުކުރުމުގެ ކިރިޔާވެސް އުއްމީދެއް އޮތީ އެފްއޭ ކަޕުންނެވެ. އެ މުބާރާތުގެ ކުއާޓާ ފައިނަލުގައި އަންނަ އާދިއްތަ ދުވަހު ސިޓީން ނުކުންނާނީ ބޯންމައުތާ ދެކޮޅަށެވެ.

"މި ސީޒަނުގައި އަހަރެމެންނަށް ބޯނަހެއް ލިބިގެން ނުވާނެ. އަހަރެމެން ކާމިޔާބު ހޯދިޔަސް.. އެ ފައިސާ ލިބެންޖެހޭނީ ކުލަބަށް،" ގާޑިއޯލާ ބުންޏެވެ.

ދުނިޔޭގެ ފުޓްބޯޅައިގެ މައި އިދާރާ، ފީފާ އިން މި މަހުގެ ކުރީކޮޅު ބުނީ، އަންނަ ޖޫން މަހުގެ 14 އިން ޖުލައި މަހުގެ 13 އަށް އެމެރިކާގައި ކުރިއަށްދާ މުބާރާތަށް މުޅިއެކު އެއް ބިލިއަން އެމެރިކާ ޑޮލަރުގެ ފައިސާގެ އިނާމު ކަނޑައަޅާފައިވާ ކަމަށެވެ.

މުބާރާތުގެ އިނާމު ފައިސާ ކަމަށްވާ، އެއް ބިލިއަން އެމެރިކާ ޑޮލަރުގެ ގާތްގަނޑަކަށް ދެބައިކުޅަ އެއްބަޔަށްވާ މިންވަރު ބައިވެރިވާ 32 ކުލަބުގެ މެދުގައި ބަހާލާނެ އެވެ.

އެގޮތުން، ކޮންމެ ކުލަބަކަށް ލިބޭ އަދަދު ބިނާވެގެންވަނީ އެ ކުލަބެއްގެ ފެންވަރާއި ކޮމާޝަލް ކްރައިޓީރިއާގެ މައްޗަށެވެ. އެހެންކަމުން، މެންޗެސްޓަރ ސިޓީ އާއި ރެއާލް މެޑްރިޑް ފަދަ ކުލަބުތަކަށް މުބާރާތުގައި ވާދަކުރާ ކުދި ކުލަބުތަކަށް ވުރެ ނިސްބަތުން ބޮޑު އިންސައްތައެއް ލިބޭނެ އެވެ. މިއީ ފީފާ އާއި ޔުއެފާ ގުޅިގެން އެކުލަވާލާފައިވާ މޮޑެލްއެކެވެ.

ގާޑިއޯލާ ބުނީ، އިނާމުގެ ގޮތުގައި ކޮންމެ އެއްޗެއް ލިބުނުނަމަވެސް، ސިޓީއާ ގުޅުންހުރި އެއްވެސް ފަރާތަކަށް އެކައްޗެއްވެސް ދީގެން ނުވާނެ ކަމަށެވެ.

ގާޑިއޯލާ ބުނީ، މިހާރު ސިޓީން އަމާޒުހިފާފައި ވަނީ އެފްއޭ ކަޕްގެ ސެމީ ފައިނަލުން ޖާގަ ހޯދުމަށް ކަމަށެވެ.

ކިޔުންތެރިންގެ ހިޔާލު