އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ނުރުހޭ މީހުން މަޤާމުން ވަކިކުރަން ސުޕްރީމް ކޯޓުން ހުއްޓުވުމުން، އެ ކޯޓަށް ފަނޑިޔާރުން އައްޔަނުކުރުމަށް ޤާނޫނު ހަދާ މަޖިލީހަށް އޮންނަ ބާރު އިތުރަށް ފުޅާކޮށް ފާސްކުރި ޤާނޫނާ ދެކޮޅަށް އެތައް ހާސް ބަޔަކު މަގުތަކަށް ނުކުމެ މުޒާހަރާކުރަން ފަށައިފިއެވެ.

އިޒްރޭލުގެ ތާރީޚުގައި ވެސް ކަނާތު ފިޔައިގެ ފިކުރު އެންމެ ބޮޑު ސަރުކާރު ކަމަށްވާ ނަތަންޔާހޫގެ ސަރުކާރާއި ސުޕްރީމް ކޯޓުން މިހާރު ވެސް ވަނީ ބަންޑާރަ ނައިބު ގަލީ ބަހާރަވް-މިއާރާ މަގާމުން ވަކިކުރުމުގެ މަސައްކަތް ފަށައިފައެވެ. އަދި ދާޚިލީ ސަލާމަތީ އިދާރާގެ ވެރިޔާ ރޮނެން ބާ މަގާމުން ވަކިކުރި މައްސަލައިގައި ދެބަސްވުން ވަނީ ބޮޑުވެފައެވެ.

އިޒްރޭލުގެ ކޯޓުތަކަށް ފަނޑިޔާރުން މިހާރު ޢައްޔަނުކުރަނީ، ފަނޑިޔާރުންނާއި ޤާނޫނު ހަދާ މަޖިލީހުގެ މެމްބަރުންނާއި ބާ އެސޯސިއޭޝަންގެ މަންދޫބުން ހިމެނޭ ނުވަ މެމްބަރުންގެ ކޮމިޓީއަކުންނެވެ.

ނަމަވެސް، ޤާނޫނު ހަދާ މަޖިލީހުގެ އާ ދައުރާއެކު ޢަމަލުކުރަން ފަށާ އާ ޤާނޫނުގެ ދަށުން ކޮމިޓީގައި އަދިވެސް ނުވަ މެންބަރުން ތިއްބަސް، ސުޕްރީމް ކޯޓުގެ ތިން ފަނޑިޔާރުންނާއި ޖަސްޓިސް މިނިސްޓަރާއި އިތުރު އެހެން މިނިސްޓަރަކާއި ޤާނޫނު ހަދާ މަޖިލީހުގެ ކޯލިޝަނަށް ނިސްބަތްވާ އެއް މެމްބަރާއި ޤާނޫނު ހަދާ މަޖިލީހުގެ އިދިކޮޅު އެއް މެމްބަރާއި އާންމުންގެ ތެރެއިން ހޮވާ ދެ މެމްބަރުން ތިބޭނެއެވެ.

އިދިކޮޅު މެމްބަރުން މި ޤާނޫނު ފާސްކުރާ ވޯޓު ބޮއިކޮޓު ކުރުމުން، ނަތަންޔާހޫގެ ޕާޓީގެ މެމްބަރުންގެ ތާއީދާއެކު މި ޤާނޫނު ފާސްކޮށްފައިވަނީ 67 މެމްބަރުންގެ ވޯޓުންނެވެ. އިޒްރޭލުގެ ޤާނޫނު ހަދާ މަޖިލީސް ނުވަތަ ނެސެޓުގައި 120 މެމްބަރުން ތިބެއެވެ.

މިއީ ކޯޓުތަކަށް ނުފޫޒު ފޯރުވައި، އިޒްރޭލުގައި ޑިމޮކްރަސީ ކަފުންކުރެވުނު ނިންމުމެއްގެ ގޮތުގައި އިދިކޮޅުން ސިފަކޮށްފައިވާއިރު، އެ ޤާނޫނާ ދެކޮޅަށް އެތައް ހާސް ބަޔަކު މަގުތަކަށް ނުކުމެ ދަނީ މުޒާހަރާ ކުރަމުންނެވެ.