އުވާލުމަށް ނިންމާ ސިޔާސީ ޕާޓީތަކުގެ ކުލަޔާއި ނަމާއި ނިޝާން 5 އަހަރު ވަންދެން ބޭނުން ނުކުރެވޭ ގޮތަށް ގާނޫނަށް އިސްލާހު ގެނައުމަށް، މިހާރު މަޖިލީހުގައި އޮތް ސިޔާސީ ޕާޓީތަކުގެ ގާނޫނަށް އިސްލާހު ގެނައުމުގެ ބިލަށް އިތުރުކޮށްފިއެވެ.

މަޖިލީހަށް ހުށަހެޅި ބިލަށް ދެ އިސްލާހެއް ގެނައުމަށް ވަނީ، މި ބިލު ދިރާސާކުރުމަށް މިއަދު ބޭއްވި މުޅި މަޖިލީހުގެ ކޮމިޓީގައި ފާސްކޮށްފަ އެވެ.

އެގޮތުން، އުވާލާ ޕާޓީތަކުގެ ކުލަޔާއި، ނަމާއި، ނިޝާނާއި، ލޯގޯ، އަދި އެހެންވެސް ޕާޓީ ރަމްޒު ކޮށްދޭ އެއްޗެއް ކުރިއަށް އޮންނަ ފަސް އަހަރަށް ބޭނުން ނުކުރޭވެ ގޮތަށް ގާނޫނު އިސްލާހު ކުރުމަށް ހުށަހެޅުއްވީ ފަރެސްމާތޮޑާ ދާއިރާގެ މެންބަރު އަޝްރަފް ރަޝީދު އެވެ. އެ ހުށަހެޅުން ފާސްވީ 41 މެންބަރުންގެ ވޯޓުންނެވެ.

އޭގެއިތުރުން، ފަސް އަހަރަކުން އެއް ފަހަރު ގައުމީ ބައްދަލުވުމެއް ނުބާއްވާ ޕާޓީތައް އުވޭގޮތަށް މީގެ ކުރިން ގާނޫނުގައި އޮތް މާއްދާ އުވާލުމަށްވެސް މިއަދުގެ ކޮމިޓީން ފާސްކުރި އެވެ. އެ އިސްލާހު ފާސްވީ 39 މެންބަރުންގެ ވޯޓުންނެވެ.

މި އިސްލާހުތަކާއެކު މުޅި މަޖިލީހުގެ ކޮމިޓީން މިއަދު ވަނީ ސިޔާސީ ޕާޓީތަކުގެ ގާނޫނަށް އިސްލާހު ގެނައުމުގެ ބިލުވެސް ފާސްކޮށް ތަޅުމަށް ފޮނުވާފަ އެވެ. ބެލެވޭ ގޮތުގައި މާދަމާ ކޮމިޓީ ރިޕޯޓަށް ބަހުސްކޮށް ވޯޓަށް އަހާނެ އެވެ.

.