ސްޕެނިޝް ލީގުގައި ރޭ ކުޅުނު މެޗުގައި އޮސަސޫނާ 3-0 އިން ބަލިކޮށް، ބާސެލޯނާ އިން ތާވަލްގެ ކުރީގައި ތިން ޕޮއިންޓުގެ ލީޑެއް ނަގައިފިއެވެ.

މިއީ ހުރިހާ މުބާރާތެއް ހިމެނޭ ގޮތަށް ބާސެލޯނާ އިން ބަލިނުވެ ފުރިހަމަކުރި 19 ވަނަ މެޗެވެ. މިދިޔަ ޑިސެންބަރު މަހުގެ ފަހުން މެޗަކުން ބަލިވެފައިނުވާ ބާސެލޯނާ އަކީ މިވަގުތު ޔޫރަޕްގެ ގަދަ ފަސް ލީގުގެ ތެރެއިން މި އަހަރުގެ ތެރޭގައި ބަލިނުވާ ހަމައެކަނި ޓީމެވެ.

މި މޮޅާއެކު، ބާސެލޯނާ އެއްވަނައިގައި އުޅެނީ 28 މެޗުން 63 ޕޮއިންޓް ހަމަކޮށްގެންނެވެ. ދެވަނައިގައި އުޅޭ ރެއާލް މެޑްރިޑަށް 60 ޕޮއިންޓް ލިބިފައިވާއިރު، އެތުލެޓިކޯ މެޑްރިޑް ތިންވަނައިގައި އޮތީ 56 ޕޮއިންޓާއެކު އެވެ. ހަތަރުވަނައިގައި އޮތް އެތުލެޓިކް ބިލްބާއޯ އަށް ލިބިފައިވަނީ 52 ޕޮއިންޓެވެ.

ބާސެލޯނާގެ ދަނޑުގައި ކުޅުނު މެޗު ފެށިގެން 11 ވަނަ މިނެޓުގައި އެ ޓީމުން ލީޑު ނެގީ ފެރާން ޓޮރޭސްގެ ގޯލުންނެވެ. އޭގެ ދިހަ މިނެޓު ފަހުން، ބާސެލޯނާގެ ދެވަނަ ލަނޑު، ލިބުނު ޕެނަލްޓީއަކުން ކާމިޔާބުކޮށްދިނީ ޑަނީ އޮލްމޯ އެވެ.

ދެވަނަ ހާފުގައި ބާސެލޯނާގެ ތިންވަނަ ލަނޑު ޖަހައިދިނީ ޕޮލެންޑްގެ ފޯވާޑް، ރޮބަޓް ލެވަންޑޯސްކީ އެވެ. އޭނާ މި ލަނޑުޖެހީ ފާމިން ލޮޕޭޒްގެ ހުރަހެއްގެ އެހީގައެވެ. މިއީ ލީގުގައި އޭނާ ޖެހި 23 ވަނަ ގޯލެވެ.

މެޗުން ބަލިވި އޮސަސޫނާ އޮތީ 14 ވަނައިގައެވެ. އެ ޓީމަށް ލިބިފައިވަނީ 33 ޕޮއިންޓެވެ.

މި މެޗަކީ ކުރިން މި މަހުގެ 8 ވަނަ ދުވަހު ކުޅެން ހަމަޖެހިފައި އޮތް މެޗެކެވެ. އެ ދުވަހު ބާސެލޯނާގެ ޑޮކްޓަރު ކާލެސް މިނާރޯ ގާސިއާ ނިޔާވުމުން މެޗު ފަސްކުރީ އެވެ.

މި މުބާރާތުގައި ބާސެލޯނާ އަށް ދެން އޮތީ އަންނަ އާދީއްތަ ދުވަހު އަމިއްލަ ދަނޑުގައި ޖިރޯނާއާ ދެކޮޅަށް ކުޅެން ޖެހޭ މެޗެވެ.