ޔޫކްރޭނާއި ރަޝިޔާ އާ ދެމެދު ކުރަމުންދާ ހަނގުރާމަ ނިމުމަކަށް ގެނައުމަށް އެމެރިކާއިން އިސްވެ ކުރަމުންދާ މަސައްކަތުގައި، ރަޝިޔާއިން ހުށަހަޅާ ހުރިހާ ޝަރުތުތަކަށް އެމެރިކާއިން ދީލައިނުލާނެކަމަށް އުއްމީދު ކުރައްވާ ކަމަށް ޔޫކްރޭނުގެ ރައީސް ވޮލޮޑިމިޔަރ ޒެލެންސްކީ ވިދާޅުވެއްޖެއެވެ.

މިދިޔަ ހޯމަ ދުވަހު ސަޢުދީ އަރަބިއްޔާގައި ރަޝިޔާ އާއެކު ބޭއްވި އެންމެ ފަހުގެ މަޝްވަރާތަކަށްފަހު، އެމެރިކާއިން ބުނީ ކަޅު ކަނޑުގައި ޙަމަލާތައް މެދުކަނޑައިލަން ދެ ޤައުމުން ވެސް މިހާރު އެއްބަސްވެފައިވާ ކަމަށެވެ.

ކަޅު ކަނޑު ހުރަސްކޮށް ޔޫކްރޭނުގެ ގޮވާން ބޭރުކުރުން 2022 ވަނަ އަހަރުން ފެށިގެން ރަޝިޔާއިން އޮތީ ހުއްޓުވައިފައެވެ.

ނަމަވެސް، ޙަމަލާތައް ހުއްޓައިލުމުގެ މި އެއްބަސްވުމަށް ޢަމަލު ކުރަން ފަށާނީ، ހުޅަނގުގެ ޤައުމުތަކުން ރަޝިޔާގެ ދަނޑުވެރި އުފެއްދުންތަކާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް ލުއިކުރުމުން ކަމަށް ރަޝިޔާއިން ވަނީ ޝަރުތުކޮށްފައެވެ. އޭގެތެރޭގައި، ފައިސާގެ މުޢާމަލާތްތަކަށް ބައިނަލްއަޤުވާމީ ސްވިފްޓް ޕޭމަންޓް ސިސްޓަމް އަލުން އިޔާދަކޮށްދިނުން ވެސް ހިމެނެއެވެ.

އެމެރިކާ ސަރުކާރުން ނެރުނު ބަޔާނެއްގައި ބުނީ، ރަޝިޔާގެ ދަނޑުވެރި އުފެއްދުންތައް ދުނިޔޭގެ ބާޒާރަށް އަލުން ވާޞިލްވުމުގައި އެހީތެރިވެދޭނެ ކަމަށެވެ.

ނަމަވެސް، ވިލާތުގެ ޤައުމުގެ އިއްތިހާދު، އީޔޫން ބުނީ، ރަޝިޔާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކަށް ލުއި ދެވޭނީ، އެއްވެސް ޝަރުތަކާ ނުލައި، ރަޝިޔާއިން ހިފާފައިވާ ޔޫކްރޭނުގެ ސަރަޙައްދުތަކުން ފޭބުމުން ކަމަށެވެ.

ބޭރުގެ ބައެއް މީޑިޔާތަކަށް ދެއްވި އިންޓަވިއުއެއްގައި، ޒެލެންސްކީ ވިދާޅުވީ، ސުލްޙަ ޤާއިމުކުރަން އެމެރިކާއިން ކުރަމުންދާ މަސައްކަތް ޔޫކްރޭނުން ބަލައިގަންނަ ކަމަށެވެ.

ނަމަވެސް، އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރު ތެރޭގައި، ރަޝިޔާއިން ދައްކާ ވާހަކަތަކަށް ވަރަށް ބޮޑަށް ހެއްލިފައިވާ ކަމުގެ ބިރު އެބަ އޮތް ކަމަށް އޭނާ ވިދާޅުވިއެވެ.

މި މަޝްވަރާތަކުގެ ތެރެއިން އެމެރިކާއިން ހަޤީޤަތުގައި ބޭނުންވީ 30 ދުވަހަށް ޙަމަލާތައް ހުއްޓުވައިށެވެ. އެކަމަށް ޔޫކްރޭނު އެއްބަސްވެސްކުރުވިއެވެ. ނަމަވެސް، ޙަމަލާތައް ހުއްޓައިލަން ރަޝިޔާއިން ވަނީ ދެކޮޅު ހަދައިފައެވެ.