ENGLISH

03 އޭޕްރީލު 2025

Advertisement

ޣައްޒާގައި އަލުން ޢުދުވާނުތައް ފެށި ފަހުން 140،000 އަށް ވުރެ ގިނަ މީހުންގެ ގެދޮރު ގެއްލިއްޖެ: އދ.

27 މާރިޗު 2025

|

ހަސަން އާމިރު

ފަލަސްތީނުގެ ޣައްޒާއަށް އިޒްރޭލުގެ ލާއިންސާނީ ޢުދުވާނުތައް ދޭން ފެށި ފަހުން، 140،000 އަށް ވުރެ ގިނަ ފަލަސްތީނުގެ ރައްޔިތުންގެ ގެދޮރު ގެއްލިފައިވާ ކަމަށް އދ. އިން ބުނެފިއެވެ.

މިދިޔަ ޖެނުއަރީ މަހުގެ 19 ވަނަ ދުވަހުން ފެށިގެން ސުލްޙައިގެ އެއްބަސްވުމަކަށް ޢަމަލުކުރަމުންދަނިކޮށް، އިޒްރޭލުން މި މަހުގެ 18 އިން ފެށިގެން ވަނީ ޣައްޒާއަށް އަނެއްކާވެސް ޙަމަލާތައް ދޭން ފަށައިފައެވެ.

އދ.ގެ ޖަމްޢިއްޔާ އޯޗީއެޗްއޭއިން ބުނީ، ފާއިތުވި ނުވަ ދުވަހުގެ ތެރޭގައި، ޣައްޒާގައި ދިރިއުޅޭ 142،000 މީހުން ގެދޮރު ދޫކޮށް ދާން މަޖުބޫރުވެފައިވާ ކަމަށެވެ.

އެ ޖަމްޢިއްޔާއިން ބުނި ގޮތުގައި، ދިރިއުޅުމުން ސަލާމަތް ކުރެވުނު މަދު ތަކެއްޗާއެކު އޭގެ ތެރެއިން ގިނަ ބަޔަކު ތިބެންޖެހިފައިވަނީ މަގުމަތީގައެވެ. އަދި ކާބޯތަކެއްޗާއި ބޯހިޔާވަހިކަމެއް ނެތި، އެ މީހުން ތަހައްމަލް ކުރަމުންދަނީ ވަރަށް ނިކަމެތި ޙާލަތެއް ކަމަށް ވެސް އެ ޖަމްޢިއްޔާއިން ބުންޏެވެ.

ޣައްޒާގެ ސިއްޙީ ވުޒާރާއިން ބުނީ، ފާއިތުވި 24 ގަޑިއިރުގެ ތެރޭގައި އިޒްރޭލުގެ ޢުދުވާނުތަކުގައި އިތުރު 39 މީހަކު ޝަހީދުވެފައިވާ ކަމަށެވެ. މިގޮތުން، އިޒްރޭލުން ދަނީ ޣައްޒާގެ ޖަބާލިޔާ، ޚާން ޔޫނިސް އަދި ރަފާޙްއަށް ހުއްޓުމެއް ނެތި ޙަމަލާތައް ދެމުންނެވެ.

ޙަމާސް ޖަމާޢަތުގެ ހަނގުރާމަވެރިން ފިލައި ތިބި ކަމަށް ބުނެ، އިޒްރޭލުގެ ރަހުމްކުޑަ ޙަމަލާތައް ދެމުންދަނީ މީހުން ދިރިއުޅޭ ސަރަޙައްދުތަކަށެވެ.

އެއާއެކު، ޣައްޒާއަށް އަލުން ޙަމަލާތައް ދޭން ފެށި ފަހުން، މިވީ ހަފްތާއެއްހާ ދުވަހުގެ ތެރޭގައި 800 އެއްހާ މީހުން ވަނީ ޝަހީދުކޮށްލައިފައެވެ.

އަދި އެ ސަރަޙައްދުތަކުން ފަލަސްތީނު ރައްޔިތުން ފައްސާލައި، އެ ސަރަޙައްދުތަކަށް އިޒްރޭލުން ދަނީ އަތްގަދަކޮށް، އިސްތިޢުމާރު ކުރަމުންނެވެ.

ޣައްޒާއަށް އެހީ ވެއްދުމުގެ މަގުތައް އިޒްރޭލުން ބަންދުކޮށްފައިވާތީ، ކުރިއަށް އޮތް މަދު ދުވަސްތަކުގައި ޣައްޒާގެ ރައްޔިތުން ބަނޑަށް ޖެހުމުގެ ބިރުވެރިކަން އިތުރުވެފައިވާ ކަމަށް ވެސް ފަލަސްތީނުގައި ހަރަކާތްތެރިވާ ބައިނަލްއަޤްވާމީ އެހީދޭ ޖަމާޢަތްތަކުން ދަނީ ތަކުރާރުކޮށް ބުނަމުންނެވެ.

ގިނަ ޤައުމުތަކެއް މެދުވެރިވެގެން ޙަމަލާތައް ހުއްޓައިލަން އެއްބަސްވީ، އިޒްރޭލުން ހުއްޓުމެއް ނެތި ލާއިންސާނީ ޢުދުވާނުތައްދީ، ފަލަސްތީނުގެ ބައި ލައްކައެއްހާ މީހުން ޝަހީދުކޮށްލައި، ޣައްޒާގެ ގިނަ ސަރަޙައްދުތައް ސުންނާފަތިކުރަން ފެށިތާ 15 މަސް ފަހުންނެވެ.

އެއްބަސްވުމުގެ ފުރަތަމަ މަރުޙަލާގެ ދަށުން މިނިވަން ކުރާނެ ކަމަށް ބުނި ދިރިތިބި އަސީރުންނާއި ޤައިދީން ވަނީ މިނިވަންކޮށް ނިމިފައެވެ.

ނަމަވެސް، ދެވަނަ ފިޔަވަހީގެ ދަށުން ހަނގުރާމަ ދާއިމީކޮށް ހުއްޓާލައި، ޣައްޒާގެ ސަރަޙައްދުތަކުން އިޒްރޭލު ސިފައިން ފައިބަން ހިމަނާފައިވާތީ، އެކި ބަހަނާތައް ދައްކައިގެން އިޒްރޭލުން ވަނީ ދެވަނަ ފިޔަވަހި ފެށުމުގެ މަޝްވަރާ ވެސް ކުރަން ދެކޮޅު ހަދައިފައެވެ.

އޭގެ ބަދަލުގައި އިޒްރޭލުން ބޭނުންވީ، އެއްބަސްވުމުގެ ފުރަތަމަ ފިޔަވަހީގެ މުއްދަތު އިތުރުކުރާށެވެ. އެކަމަށް ޙަމާސްއިން އެއްބަސްނުވުމުން، އިޒްރޭލުން އެންމެ ފުރަތަމަ ވެސް ޣައްޒާއަށް އެހީ ވެއްދުމުގެ މަގުތައް ބަންދުކުރީއެވެ.

ކިޔުންތެރިންގެ ހިޔާލު