ސޫދާނުގެ ހުޅަނގުގައި އޮންނަ ދަރްފޫރު ސަރަޙައްދުގައި ހުރި ބާޒަރަކަށް ސޫދާނުގެ އަސްކަރިއްޔާއިން ވައިގެ ޙަމަލާއެއްދީ، އާންމުންގެ އެތައް ސަތޭކަ ބަޔަކު މަރައިލިކަމުގެ ތުހުމަތުކޮށްފިއެވެ.

ސޫދާންގައި ދާޚިލީ ހަނގުރާމަ ފެށުނީ ރެޕިޑް ސަޕޯޓް ފޯސަސް (އާރުއެސްއެފް)ގެ ސިފައިން 2023 ވަނަ އަހަރުގެ އޭޕްރިލް މަހު ވެރިރަށް ޚަރްތޫމަށް އަރައި، އެ ރަށް ހިފުމަށް ޙަމަލާ ދިނުމުންނެވެ.

އާރުއެސްއެފްގެ އަތްދަށުގައި ހުރި ސަރަޙައްދުތައް އަނބުރާ ހޯދަން، ސޫދާނުގެ އަސްކަރިއްޔާއިން ފަށާފައިވާ އޮޕަރޭޝަން ފާއިތުވި ހަފްތާއެއްހާ ދުވަހުގެ ތެރޭގައި ވަނީ ވަރުގަދަކޮށްފައެވެ.

މިގޮތުން، ސޫދާނުގެ އެކި ހިސާބުތަކަށް ވައިގެ މަގުން ވެސް ޙަމަލާ ދިނުން ވަނީ އިތުރުކޮށްފައެވެ.

ސޫދާނުގައި ހަރަކާތްތެރިވާ މަދަނީ ޖަމްޢިއްޔާތަކުން ބުނީ، ދަރްފޫރުގެ ބާޒާރަށް ދިން ޙަމަލާގައި ޒަޚަމްވި މީހުންގެ އަދަދު ވެސް އެތައް ސަތޭކައަށް އަރާ ކަމަށެވެ.

ނަމަވެސް، އާންމުން ގޮސްއުޅޭ ބާޒާރަކަށް އަމާޒުކޮށް ޙަމަލާދިންކަމުގެ ތުހުމަތު އަސްކަރިއްޔާއިން ވަނީ ދޮގުކޮށްފައެވެ.

ސޫދާނުގެ ދާޚިލީ ހަނގުރާމައިގެ ސަބަބުން، 30 މިލިއަނަށް ވުރެ ގިނަ މީހުން ޙާލުގައި ޖެހިފައިވާ ކަމަށާއި 12 މިލިއަނަށް ވުރެ ގިނަ މީހުން ގެދޮރު ދޫކޮށް ގޮސްފައިވާ ކަމަށް އދ.އިން ވަނީ ލަފާކޮށްފައެވެ. އެ ޤައުމުގެ ބައެއް ސަރަޙައްދުތައް ދަނީ ބަނޑުހައިހޫނުކަމާ ކުރިމަތިލަމުންނެވެ.