65 އަހަރުވެފައިވާ މީހުންގެ ތެރެއިން ފުދުންތެރި މީހުންނަށް އެ އިނާޔަތް ނުދޭ ގޮތަށް ހަމަޖައްސައި،  އަންނަ އަހަރުގެ އޭޕްރީލުން ފެށިގެން އެ އުސޫލަށް އަމަލުކުރަން ފެށުމަށް ސަރުކާރުން ނިންމައިފިއެވެ.

މިހާރު ޕެންޝަން ސްކީމްގައި އޮންނަ ގޮތުން، 65 އަހަރުވެފައިވާ ކޮންމެ މީހަކަށް އަސާސީ ޕެންޝަން ލިބޭނެއެވެ. ނަމަވެސް ގެނައި ބަދަލުތަކާއެކު ފޯރުންތެރިކަން ހުންނަ މީހުން މި ނިޒާމުން އެއްކިބާކޮށް، އަސާސީ ޕެންޝަން  ނުވަތަ "ޓާގެޓަޑް" ޕެންޝަނަކީ ބޭނުންޖެހިފައިވާ މީހުންނަށް އެކަނި ލިބޭ އިނާޔަތަކަށް ހެދުމަށް ވަނީ ކަނޑައަޅާފައެވެ. 

މި ބަދަލުގެ ސަބަބުން މިހާރު އުމުރުން ދުވަސްވީ މީހުންނަށް ދޭ ބޭސިިކް ޕެންޝަން އިނާޔަތުގެ ގޮތުގައި ދެ ބިލިއަނަށްވުރެ ގިނަ ރުފިޔާ ވަނީ 1.8 ބިލިއަނަށް ކުޑަ ކުރެވިފައެވެ. 

މި ބަދަލުތަކުގެ ސަބަބުން ދައުލަތުގެ ޕެންޝަނުގެ އިނާޔަތަށް ކުރާ ހަރަދުތައް ވަކި މިންގަނޑެއްގައި ހިފެހެއްޓި މަސައްކަތްތެރިންގެ މެދުގައި ހަމަ ހަމަ ގޮތެއްގައި ކުރިއަށް އޮތް ތަނުގައި ތަންފީޒު ކުރެވިގެންދާނެ ކަމަށް ވެސް ފިނޭންސް މިނިސްޓްރީއިން ވަނީ ފާހަގަކޮށްފައެވެ.

މީގެ އިތުރުން މި ނިޒާމަކީ ހައްޤުވެރިންނަށް ލިބޭ ޕެންޝަނަށް އަސަރުނުކޮށް، ސަރުކާރުގެ މާލީ ހާލަތު ރަނގަޅުކޮށް ރާއްޖޭގެ ފިސްކަލް ނިޒާމު ދެމެހެއްޓެނިވި ނިޒާމަކަށް ބަދަލުކުރުމަށް އެޅިގެންދާނެ މުހިންމު ފިޔަވަޅުތަކުގެ ތެރޭގައި ހިމެނޭ ކަމެއްގެ ގޮތުގައި ފިނޭންސުން ބުނެފައިވެއެވެ.