ފަލަސްތީނުގެ ޣައްޒާގެ ދެކުނާއި އުތުރުގެ މީހުން ދިރިއުޅޭ ސަރަޙައްދުތަކަށް އިޒްރޭލުގެ ރަހުމްކުޑަ ޙަމަލާތައް ދެމުންދާއިރު، އިއްޔެ އެކަނިވެސް 60 އަށް ވުރެ ގިނަ މީހުން ޝަހީދުވެފައިވާ ކަމަށް ޣައްޒާގެ ސިއްޙީ ވުޒާރާއިން ބުނެފިއެވެ.

މިދިޔަ ޖެނުއަރީ މަހުގެ 19 ވަނަ ދުވަހުން ފެށިގެން ސުލްޙައިގެ އެއްބަސްވުމަކަށް ޢަމަލުކުރަމުންދަނިކޮށް، އިޒްރޭލުން މި މަހުގެ 18 އިން ފެށިގެން ވަނީ ޣައްޒާއަށް އަނެއްކާވެސް ޙަމަލާތައް ދޭން ފަށައިފައެވެ.

ޣައްޒާގެ ސިއްޙީ ވުޒާރާއިން ބުނީ، ފާއިތުވި 24 ގަޑިއިރުގެ ތެރޭގައި އިޒްރޭލުގެ ޢުދުވާނުތަކުގައި 62 މީހަކު ޝަހީދުވެފައިވާ ކަމަށާއި، އޭގެތެރޭގައި ހަތް ކުޑަކުދިން ވެސް ހިމެނޭ ކަމަށެވެ.

އެއާއެކު، ޣައްޒާއަށް އަލުން ޙަމަލާތައް ދޭން ފެށި ފަހުން، މިވީ ހަފްތާއެއްހާ ދުވަހުގެ ތެރޭގައި 800 އެއްހާ މީހުން ވަނީ ޝަހީދުކޮށްލައިފައެވެ.

އިޒްރޭލުން ހުއްޓުމެއްނެތި ޣައްޒާގެ އެކި ހިސާބުތަކަށް ދެމުންދާ ޢުދުވާނުތަކުގައި އެތައް ހާސް ބަޔަކަށް ވަނީ ގެދޮރު ދޫކުރަން މަޖުބޫރުވެފައެވެ.

އަދި އެ ސަރަޙައްދުތަކުން ފަލަސްތީނު ރައްޔިތުން ފައްސާލައި، އެ ސަރަޙައްދުތަކަށް އިޒްރޭލުން ދަނީ އަތްގަދަކޮށް، އިސްތިޢުމާރު ކުރަމުންނެވެ.

ފަލަސްތީނުގެ މައުސޫމް ރައްޔިތުންނާ ދެކޮޅަށް އިޒްރޭލުން ހިންގާ ޖަރީމާތަކުގެ ރައްދުގައި، ޙަމާސްއިން އިޒްރޭލުގެ ބައެއް ސަރަޙައްދުތަކަށް ވަދެގަނެ، ކުއްލި ޙަމަލާތަކެއް ދިނީ، 7 އޮކްޓޯބަރު 2023 ވަނަ ދުވަހެވެ. އެ ޙަމަލާގެ ބަދަލުހިފުމަށް، އިޒްރޭލުން ޣައްޒާއަށް ދޭން ފެށި ޢުދުވާނުތަކުގައި މިހާތަނަށް 50،021 މީހުން ޝަހީދުވެފައިވާއިރު، އިތުރު 113،274 މީހަކު ޒަޚަމްވެފައިވާ ކަމަށް އެ ވުޒާރާއިން ބުންޏެވެ.

ގިނަ ޤައުމުތަކެއް މެދުވެރިވެގެން ޙަމަލާތައް ހުއްޓައިލަން އެއްބަސްވީ، އިޒްރޭލުން ހުއްޓުމެއް ނެތި ލާއިންސާނީ ޢުދުވާނުތައްދީ، ފަލަސްތީނުގެ ބައި ލައްކައެއްހާ މީހުން ޝަހީދުކޮށްލައި، ޣައްޒާގެ ގިނަ ސަރަޙައްދުތައް ސުންނާފަތިކުރަން ފެށިތާ 15 މަސް ފަހުންނެވެ.

އެއްބަސްވުމުގެ ފުރަތަމަ މަރުޙަލާގެ ދަށުން މިނިވަން ކުރާނެ ކަމަށް ބުނި ދިރިތިބި އަސީރުންނާއި ޤައިދީން ވަނީ މިނިވަންކޮށް ނިމިފައެވެ.

ނަމަވެސް، ދެވަނަ ފިޔަވަހީގެ ދަށުން ހަނގުރާމަ ދާއިމީކޮށް ހުއްޓާލައި، ޣައްޒާގެ ސަރަޙައްދުތަކުން އިޒްރޭލު ސިފައިން ފައިބަން ހިމަނާފައިވާތީ، އެކި ބަހަނާތައް ދައްކައިގެން އިޒްރޭލުން ވަނީ ދެވަނަ ފިޔަވަހި ފެށުމުގެ މަޝްވަރާ ވެސް ކުރަން ދެކޮޅު ހަދައިފައެވެ.

އޭގެ ބަދަލުގައި އިޒްރޭލުން ބޭނުންވީ، އެއްބަސްވުމުގެ ފުރަތަމަ ފިޔަވަހީގެ މުއްދަތު އިތުރުކުރާށެވެ. އެކަމަށް ޙަމާސްއިން އެއްބަސްނުވުމުން، އިޒްރޭލުން އެންމެ ފުރަތަމަ ވެސް ޣައްޒާއަށް އެހީ ވެއްދުމުގެ މަގުތައް ބަންދުކުރީއެވެ.