ENGLISH
03 އޭޕްރީލު 2025
ނޫސްވެރިއަކު ޝަހީދުކޮށްލައި، ޣައްޒާގެ ދެކުނުގެ ސަރަޙައްދުތައް ހުސްކުރަން އިޒްރޭލުން އަންގަނީ
25 މާރިޗު 2025
|
އެންމެ މަޤްބޫލު
އިޒްރޭލުން ފަލަސްތީނުގެ ޣައްޒާއަށް އެއްގަމާއި ވައިގެ މަގުން ދެމުންދާ ޢުދުވާނުތައް ވަރުގަދަކުރަމުންދާއިރު، ޣައްޒާގެ އުތުރަށް ދިން ވައިގެ ޙަމަލާއެއްގައި އަލްޖަޒީރާ ނޫހުގެ ނޫސްވެރިއަކު ޝަހީދުކޮށްލައިފިއެވެ.
މިދިޔަ ޖެނުއަރީ މަހުގެ 19 ވަނަ ދުވަހުން ފެށިގެން ސުލްޙައިގެ އެއްބަސްވުމަކަށް ޢަމަލުކުރަމުންދަނިކޮށް، އިޒްރޭލުން މިދިޔަ އަންގާރަ ދުވަހުން ފެށިގެން ވަނީ ޣައްޒާއަށް އަނެއްކާވެސް ޙަމަލާތައް ދޭން ފަށައިފައެވެ.
މިދިޔަ އަންގާރަ ދުވަހު ޣައްޒާއަށްދޭ ޢުދުވާނުތައް ފަށައި، އިޒްރޭލުން މިހާތަނަށް ވަނީ ފަލަސްތީނުގެ 500 އަށް ވުރެ ގިނަ މީހުން ޝަހީދުކޮށްލައިފައެވެ.
ޙަމާސް ޖަމާޢަތުގެ ހަނގުރާމަވެރިން ފިލައިތިބި ކަމަށް ބުނެ، އިޒްރޭލުގެ އަސްކަރިއްޔާއިން ދަނީ ޣައްޒާގެ އުތުރުގައި މީހުން ދިރިއުޅޭ ސަރަޙައްދުތަކަށް އަމާޒުކޮށް ވައިގެ ޙަމަލާތައް ދެމުންނެވެ.
އެ ޙަމަލާތައް ދިނުމުގެ ކުރިން، އިޒްރޭލުން ދަނީ އެ ސަރަޙައްދު ދޫކޮށް ދިޔުމަށް އާންމުންނަށް އަންގަމުންނެވެ.
މިފަދަ ޙަމަލާއެއްގައި، އަލްޖަޒީރާގެ ނޫސްވެރިޔާ ހުއްސާމް ޝަބާތު ޝަހީދުވެފައިވާ ކަމަށް އެ ނޫހުން ބުންޏެވެ. މިގޮތުން، ހުއްސާމް ޝަހީދުކޮށްލީ، އޭނާ ދަތުރުކުރަމުންދިޔަ ކާރަށް ދިން ޑްރޯން ޙަމަލާއެއްގައި ކަމަށް ވެސް ބުނެފައިވެއެވެ.
ޣައްޒާގެ ދިފާޢީ ވުޒާރާގެ ތަރުޖަމާނު މަހުމޫދު ބައްސަލް ވިދާޅުވީ، ހުއްސާމްގެ ކާރާ އެކު ޖުމްލަ 10 ވެހިކަލަކަށް އިޒްރޭލުގެ ޑްރޯން ޙަމަލާތައް އަމާޒުކޮށްފައިވާ ކަމަށެވެ.
އިޒްރޭލުން އޭނާ ޝަހީދުކޮށްލީ، ޙަމާސް ޖަމާޢަތުގެ ހަނގުރާމަވެރިއެއްގެ ތުހުމަތުގައި ކަމަށް ބައެއް މަސްދަރުތަކުން ބުންޏެވެ.
ޕަލަސްތީނިއަން ޖާނަލިސްޓް ސިންޑިކޭޓުން ވަނީ އިޒްރޭލުގެ މި ޙަމަލާއަކީ ޣައްޒާގައި މިހާރު ހިންގަމުންދާ ޖަރީމާތަކުގެ ހަޤީޤަތް ފޮރުވަން ރާވައިގެން ހިންގި ޓެރަރިސްޓު ޙަމަލާއެއްގެ ގޮތުގައި ސިފަކޮށްފައެވެ.
ޙާމާސް ނައްތާލުމުގެ ނަމުގައި އިޒްރޭލުން ޣައްޒާއަށް ދޭން ފެށި ލާއިންސާނީ ޢުދުވާނުތަކުގައި ތެރެއިން މިހާތަނަށް 200 އަށް ވުރެ ގިނަ ނޫސްވެރިން މަރާލާފައިވާކަން އެ ޖަމްޢިއްޔާއިން ފާހަގަކުރިއެވެ.
ފަލަސްތީނުގެ މައުސޫމް ރައްޔިތުންނާ ދެކޮޅަށް އިޒްރޭލުން ހިންގާ ޖަރީމާތަކުގެ ރައްދުގައި، ޙަމާސްއިން އިޒްރޭލުގެ ބައެއް ސަރަޙައްދުތަކަށް ވަދެގަނެ، ކުއްލި ޙަމަލާތަކެއް ދިނީ، 7 އޮކްޓޯބަރު 2023 ވަނަ ދުވަހެވެ. އެ ޙަމަލާގެ ބަދަލުހިފުމަށް، އިޒްރޭލުން ޣައްޒާއަށް ދޭން ފެށި ޢުދުވާނުތަކުގައި މިހާތަނަށް 50،021 މީހުން ޝަހީދުވެފައިވާއިރު، އިތުރު 113،274 މީހަކު ޒަޚަމްވެފައިވާ ކަމަށް އެ ވުޒާރާއިން ބުންޏެވެ.
ގިނަ ޤައުމުތަކެއް މެދުވެރިވެގެން ޙަމަލާތައް ހުއްޓައިލަން އެއްބަސްވީ، އިޒްރޭލުން ހުއްޓުމެއް ނެތި ލާއިންސާނީ ޢުދުވާނުތައްދީ، ފަލަސްތީނުގެ ބައި ލައްކައެއްހާ މީހުން ޝަހީދުކޮށްލައި، ޣައްޒާގެ ގިނަ ސަރަޙައްދުތައް ސުންނާފަތިކުރަން ފެށިތާ 15 މަސް ފަހުންނެވެ.
އެއްބަސްވުމުގެ ފުރަތަމަ މަރުޙަލާގެ ދަށުން މިނިވަން ކުރާނެ ކަމަށް ބުނި ދިރިތިބި އަސީރުންނާއި ޤައިދީން ވަނީ މިނިވަންކޮށް ނިމިފައެވެ.
ނަމަވެސް، ދެވަނަ ފިޔަވަހީގެ ދަށުން ހަނގުރާމަ ދާއިމީކޮށް ހުއްޓާލައި، ޣައްޒާގެ ސަރަޙައްދުތަކުން އިޒްރޭލު ސިފައިން ފައިބަން ހިމަނާފައިވާތީ، އެކި ބަހަނާތައް ދައްކައިގެން އިޒްރޭލުން ވަނީ ދެވަނަ ފިޔަވަހި ފެށުމުގެ މަޝްވަރާ ވެސް ކުރަން ދެކޮޅު ހަދައިފައެވެ.
އޭގެ ބަދަލުގައި އިޒްރޭލުން ބޭނުންވީ، އެއްބަސްވުމުގެ ފުރަތަމަ ފިޔަވަހީގެ މުއްދަތު އިތުރުކުރާށެވެ. އެކަމަށް ޙަމާސްއިން އެއްބަސްނުވުމުން، އިޒްރޭލުން އެންމެ ފުރަތަމަ ވެސް ޣައްޒާއަށް އެހީ ވެއްދުމުގެ މަގުތައް ބަންދުކުރީއެވެ.
ސުލްޙައިގެ އެއްބަސްވުން އަލުން އިޔާދަކޮށް، ޣައްޒާއަށް ދޭ ޙަމަލާތައް ވަގުތުން ހުއްޓައިލުމަށް ހުޅަނގުގެ ބޮޑެތި ޤައުމުތަކުން ވެސް އިޒްރޭލަށް ވަނީ ގޮވާލައިފައެވެ.
އަދި ޣައްޒާއަށް އަލުން އެހީ ވެއްދުމުގެ ފުރުޞަތު ދިނުމަށް ވެސް ބައިނަލްއަޤުވާމީ މުޖުތަމަޢުއިން ދަނީ ތަކުރާރުކޮށް ގޮވާލަމުންނެވެ.