ރަޝިޔާ އާއި ޔޫކްރޭނުން ކުރަމުންދާ ހަނގުރާމައިގައި ޙަމަލާތައް ހުއްޓައިލުމުގެ އެއްބަސްވުމަކަށް އެމެރިކާއާ އެކު މަޝްވަރާ ކުރުމުގެ ނަމުގައި، ރަޝިޔާއިން ދޭ ޙަމަލާތައް އިތުރަށް ވަރުގަދަކޮށްފައިވާ ކަމަށް ޔޫކްރޭނުން ތުހުމަތުކޮށްފިއެވެ.

އެމެރިކާ އާއި ޔޫކްރޭނުން ސައުދީ އަރަބިއްޔާގައި ކުރިއަށް ގެންދިޔަ މަޝްވަރާތަކަށްފަހު، އެމެރިކާއިން ހުށަހެޅި ގޮތަށް 30 ދުވަހަށް ޙަމަލާތައް ހުއްޓައިލަން ޔޫކްރޭނުން ވަނީ އެއްބަސްވެފައެވެ.

އެ ހުށަހެޅުމަށް ރަޝިޔާ ވެސް އެއްބަސްކުރުވަން އެމެރިކާ އިން ވަނީ ދެ ފަހަރެއްގެ މަތިން މަޝްވަރާތައް ބާއްވައިފައެވެ. މިގޮތުން، އެންމެ ފަހުގެ މަޝްވަރާތައް ބާއްވާފައިވަނީ މިދިޔަ ހޯމަ ދުވަހު ސައުދީ އަރަބިއްޔާގަ އެވެ.

އެތައް ގަޑިއިރަކަށް ދިގުދެމިގެންދިޔަ މަޝްވަރާތަކުގެ ތެރެއިން ވެސް، ރަޝިޔާއިން ވަނީ ޔޫކްރޭނުގެ އިރުދެކުނު ސަރަޙައްދުތަކަށް މިސައިލް ޙަމަލާތަކެއް ދީފައެވެ.

އެ ޙަމަލާތަކުގައި 65 މީހަކު ޒަޚަމްވެފައިވާ ކަމަށާއި އޭގެތެރޭގައި 14 ކުޑަކުއްޖަކު ހިމެނޭކަމަށް ޔޫކްރޭނުން ވަނީ ބުނެފައެވެ.

ޔޫކްރޭނުގެ ޚާރިޖީ ވަޒީރު އާންޑްރީ ސިބިހާ ވިދާޅުވީ ސުލްޙަ ޤާއިމުކުރުމުގެ "ހޮއި" ވާހަކަތައް ދެއްކުމުގެ ބަދަލުގައި ރަޝިޔާއިން މިފަދަ ޙަމަލާތައް ދިނުން ހުއްޓައިލަންޖެހޭ ކަމަށެވެ.

ރަޝިޔާގެ އޮފިޝަލުންނާ އެކު "އުފެއްދުންތެރި" މަޝްވަރާތަކެއް ކުރެވުނު ކަމަށް އެމެރިކާއިން ބުންޏަސް، ޙަމަލާތައް ހުއްޓައިލުމާ ގުޅޭ އެއްބަސްވުމާ ގާތަށް ވެސް ދެވިފައިނުވާ ކަމަށް މަސްދަރުތަކުން ވަނީ ބުނެފައެވެ.

އޭގެބަދަލުގައި، 12 ގަޑިއިރަށް ދިގުދެމިގެންދިޔަ މަޝްވަރާތައް ކުރިއަށްދިޔައީ، ބްލެކް ސީ ހުރަސްކޮށް ޔޫކްރޭނުގެ ގޮވާން ބޭރުކުރުމުގެ ހުއްދަ އަލުން ދިނުމާ ގުޅޭގޮތުން ކަން އެނގިފައިވެއެވެ.

ބްލެކް ސީ ހުރަސްކޮށް ޔޫކްރޭނުގެ ގޮވާން ބޭރުކުރުން 2022 ވަނަ އަހަރުން ފެށިގެން ރަޝިޔާއިން އޮތީ ހުއްޓުވައިފައެވެ.

އެކަމުގެ ބަދަލުގައި ރަޝިޔާއިން ބޭނުންވަނީ، ހުޅަނގުގެ ޤައުމުތަކުން ދަނޑުވެރި އުފެއްދުންތަކާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް ލުއިކުރުން ކަން އެނގިފައިވެއެވެ.

ރަޝިޔާއަށް ތުހުމަތުގެ އިނގިލި ދިއްކުރިޔަސް، ޔޫކްރޭނުން ވެސް ދަނީ ރަޝިޔާގެ އެކި ސަރަޙައްދުތަކަށް ޙަމަލާތައް ދެމުންނެވެ. މިގޮތުން، ޔޫކްރޭނުގެ 200 އަށް ވުރެ ގިނަ ޑްރޯން މިދިޔަ އާދީއްތަ ދުވަހު ހުއްޓުވާފައިވާ ކަމަށް ރަޝިޔާއިން ވަނީ ބުނެފައެވެ.