ދެކުނު ކޮރެއާގެ އިލެކްޓްރޯނިކް ކުންފުންޏެއް ކަމަށްވާ ސެމްސަންގ އިލެކްޓްރޯނިކްސްގެ ކޯ ޗީފް އެކްޒެކެޓިވް އޮފިސަރ، ހެން ޖޮންހް-ހީ އަވަހާރަވެއްޖެއެވެ.

ސެމްސަންގ އިލެކްޓްރޯނިކްސްގެ ކޯ ސީއީއޯ ހެން އަވަހާރަވީ ހާޓްއެޓޭކެއް ޖެހިގެން ކަމަށް ސެމްސަންގ ކުންފުނީގެ ތަރުޖަމާނަކު ނޫސްތަކަށްވަނީ ކަށަވަރުކޮށްދީފައެވެ. އަވަހާރަވިއިރު އޭނާގެ އުމުރަކީ 63 އަހަރެވެ.

މޮބައިލް ފޯނާއި އެހެން ބައެއް ބާވަތްތައް އުފައްދާ ސެމްސަންގްގެ ޑިޖިޓަލް އެޕްލައިންސް ޑިވިޝަންގައި އިސްކޮށް ހެން ހުންނެވި ހެން ސެމްސަންގް އިލެކްޓްރޯނިކްސްއާ ގުޅިވަޑައިގެންނެވީ 1988 ވަނަ އަހަރުއެވެ.

ދުނިޔޭގެ މަޝްހޫރު ޓީވީ އުފައްދާ ކުންފުންޏެއްގެ ގޮތުގައި ސެމްސަންގ ކުރިއެރުމުގައި އޭނާގެ ހިއްސާ ބޮޑެވެ. ދެކުނު ކޮރެއާގެ މި ކުންފުންޏަކީ ހެންގެ 40 އަހަރުގެ ކެރިއަރުގައި އެ ގައުމުގެ އެންމެ ބޮޑު އަދި އެންމެ ކާމިޔާބު ވިޔަފާރީގެ ގޮތުގައި ކުރިއަރައި، ގައުމީ އިގްތިސާދު ދުނިޔޭގެ އެކްސްޕޯޓް ޕަވާހައުސްއަކަށް ބަދަލުކުރުމުގައި އިސް ދައުރެއް އަދާކުރި ކުންފުންޏެކެވެ.

ސެމްސަންގް ވެފައިވަނީ ސްމާޓްފޯން މާކެޓުގައި، އެޕަލް އަދި ޝިއޯމީ ފަދަ ބްރޭންޑްތަކުގެ ބޮޑު ވާދަވެރިއަކަށެވެ.