ENGLISH
04 އޭޕްރީލު 2025
މުޒާހަރާތަކުގެ ތެރެއިން ތުރުކީވިލާތުގެ އިސްތަންބުލްގެ މޭޔަރު ޝަރީއަތް ނިމެންދެން ބަންދުކޮށްފި
24 މާރިޗު 2025
|
އެންމެ މަޤްބޫލު
ޚިޔާނާތުގެ ތުހުމަތުގައި ތުރުކީވިލާތުގެ އިސްތަންބުލް ސިޓީގެ މޭޔަރު، އިކްރާމް އިމަމޯލޫ ހައްޔަރުކޮށް، ޝަރީއަތް ނިމެންދެން ބަންދުކޮށްފިއެވެ.
އިމަމޯލޫ ހައްޔަރުކޮށްފައިވަނީ، އޭނާގެ ދިފާޢުގައި ތުރުކީވިލާތުގެ އެކި ސަރަޙައްދުތަކުގައި އާންމުންގެ ގިނަ ބަޔަކު ނުކުމެ، މުޒާހަރާކުރަމުން ދަނިކޮށެވެ.
ކޯޓު އަމުރެއްގެ ދަށުން ހައްޔަރުކުރުމުން، އިމަމޯލޫ ވަނީ މުޒާހަރާތައް ނުހުއްޓައި ކުރިއަށް ގެންދިޔުމަށް ގޮވާލައްވައިފައެވެ.
ތުރުކީވިލާތުގެ ރައީސް ރަޖަބް ޠައްޔިބް އުރްދުޣާންގެ ސިޔާސީ އެންމެ ބޮޑު ވާދަވެރިޔާގެ ގޮތުގައި ބެލެވޭ އިމަމޯލޫ ހައްޔަރުކުރުމާއެކު، މޭޔަރުގެ ޒިންމާތަކުން އޭނާ ވަނީ ވަގުތީ ގޮތުން އެކަހެރިކޮށްފައެވެ.
އިމަމޯލޫ ވަނީ އެ ތުހުމަތުތައް ދޮގުކުރައްވައި، އެއީ ސިޔާސީ ގޮތުން އޭނާގެ އަގުވައްޓައިލަން ސަރުކާރު އަޑީގައި އޮވެގެން ހިންގާ ޖަރީމާއެއްގެ ގޮތުގައި ސިފަކުރައްވައިފައެވެ.
އިމަމޯލޫ ޖަލަށް ލާފައި މި ވަނީ، ކުރިއަށް އޮތް ޢާންމު އިންތިޚާބުގައި ތުރުކީވިލާތުގެ މައި އިދިކޮޅު ސިޔާސީ ޕާޓީ، ރިޕަބްލިކަން ޕީޕަލްސް ޕާޓީ (ސީއެޗްޕީ) ތަމްސީލު ކުރައްވާނެ ކެނޑިޑޭޓުގެ ގޮތުގައި އޭނާގެ ނަން ފާސް ކުރުމަށް އެ ޕާޓީން ތައްޔާރުވަމުން ދިޔަ ދަނޑިވަޅެއްގައެވެ.
ތުރުކީވިލާތުގެ ޢާންމު އިންތިޚާބު ދެން އޮންނާނީ 2028 ވަނަ އަހަރުއެވެ. ފާއިތުވި 22 އަހަރު ތުރުކީވިލާތުގައި ވެރިކަން ކުރައްވާފައިވާ އުރްދުޣާން އަލުން އިންތިޚާބުގައި ވާދަކުރައްވަން ނިންމަވައިފި ނަމަ، އިންތިޚާބުގެ ތާރީޚު އަވަސް ކުރުމަށް ޤާނޫނު ހަދާ މަޖިލީހުގެ ރުހުން ހޯދަން ޖެހޭނެއެވެ. ސަބަބަކީ، ޤާނޫނީ ގޮތުން ރައީސްކަމުގެ މަޤާމުގައި ދެމިހުރެވޭނެ އެންމެ ދިގު މުއްދަތު އޭގެ ކުރިން އުރްދުޣާނަށް ހަމަވާނެތީއެވެ.