ފަލަސްތީނުގެ ހައްޤުގައި ހަރަކާތްތެރިވާ ޙަމާސް ޖަމާޢަތް ނައްތާލުމުގެ ނަމުގައި، 2023 ވަނަ އަހަރުގެ އޮކްޓޯބަރު މަހުން ފެށިގެން، އިޒްރޭލު ސިފައިން ޣައްޒާއަށް ދިން ލާއިންސާނީ ޙަމަލާތަކުގައި ޝަހީދުވި މީހުންގެ އަދަދު 50،000 އަށް ވުރެ އިތުރުވެފައިވާ ކަމަށް، ޣައްޒާގެ ސިއްޙީ ވުޒާރާއިން ބުނެފިއެވެ.

ފަލަސްތީނުގެ މައުސޫމް ރައްޔިތުންނާ ދެކޮޅަށް އިޒްރޭލުން ހިންގާ ޖަރީމާތަކުގެ ރައްދުގައި، ޙަމާސްއިން އިޒްރޭލުގެ ބައެއް ސަރަޙައްދުތަކަށް ވަދެގަނެ، ކުއްލި ޙަމަލާތަކެއް ދިނީ، 7 އޮކްޓޯބަރު 2023 ވަނަ ދުވަހެވެ. އެ ޙަމަލާގެ ބަދަލުހިފުމަށް، އިޒްރޭލުން ޣައްޒާއަށް ދޭން ފެށި ޢުދުވާނުތަކުގައި މިހާތަނަށް 50،021 މީހުން ޝަހީދުވެފައިވާއިރު، އިތުރު 113،274 މީހަކު ޒަޚަމްވެފައިވާ ކަމަށް އެ ވުޒާރާއިން ބުންޏެވެ.

މި ނަންބަރުތަކަކީ ހަމައެކަނި ސިއްޙީ ފަރުވާދޭ މަރުކަޒުތަކުގެ ތަފާސްހިސާބުތައް ކަމަށް އޮފިޝަލުން ވަނީ ބުނެފައެވެ. އިޒްރޭލުގެ ޙަމަލާތަކުގައި ވެއްޓިފައިވާ އިމާރާތްތަކުގެ ދަށުވެފައި އެތައް ބަޔަކު ތިބި ކަމަށް ލަފާކުރެވޭއިރު، 11،000 އެއްހާ މީހުން ގެއްލިފައިވާ ކަމަށް ރަސްމީ އިދާރާތަކުން ލަފާކުރެއެވެ.

އެހެންކަމުން، އިޒްރޭލުގެ ޢުދުވާނުތަކުގައި ޝަހީދުވި މީހުންގެ ހަޤީޤީ އަދަދު ބައިލައްކައަށް ވުރެ އިތުރުވާނެ ކަމަށް އިދާރާތަކުން ޤަބޫލުކުރެއެވެ.

މިދިޔަ ޖެނުއަރީ މަހުގެ 19 ވަނަ ދުވަހުން ފެށިގެން ސުލްޙައިގެ އެއްބަސްވުމަކަށް ޢަމަލުކުރަމުންދަނިކޮށް، އިޒްރޭލުން މިދިޔަ އަންގާރަ ދުވަހުން ފެށިގެން ވަނީ ޣައްޒާއަށް އަނެއްކާވެސް ޙަމަލާތައް ދޭން ފަށައިފައެވެ.

މިދިޔަ އަންގާރަ ދުވަހު ޣައްޒާއަށްދޭ ޢުދުވާނުތައް ފަށައި، އިޒްރޭލުން މިހާތަނަށް ވަނީ ފަލަސްތީނުގެ 500 އަށް ވުރެ ގިނަ މީހުން ޝަހީދުކޮށްލައިފައެވެ.

މި ހަނގުރާމައިގައި އިޒްރޭލުން ބޭނުންކުރަމުންދާ ރަހުމްކުޑަ އުކުޅުތަކުގެ ތެރެއިން، ޣައްޒާގައި ސިއްޙީ ފަރުވާދޭ މަރުކަޒުތަކަށް ގަސްދުގައި ޙަމަލާދީ، ދަނީ ސުންނާފަތި ކުރަމުންނެވެ.

މިގޮތުން، ޣައްޒާގައި ހުންނަ ހަމައެކަނި ކެންސަރު ހޮޕިސްޓަލަށް ބޮން އަޅައި ގޮއްވައިލުމަށްފަހު، އިޒްރޭލުގެ އަސްކަރިއްޔާއިން އިއްޔެ ވަނީ ޚާން ޔޫނިސްގައި ހުންނަ ނާޞިރް މެޑިކަލް ކޮމްޕްލެކްސަށް ވެސް ޙަމަލާދީ އެ ތަން ސުންނާފަތިކޮށްލައިފައެވެ.

އިޒްރޭލުން އިއްޔެ ވަނީ ޣައްޒާގެ ދެކުނުގައި ހުންނަ ޚާން ޔޫނިސްގެ އިތުރުން ރަފާޙްއަށް ވެސް ހުއްޓުމެއް ނެތި ވައިގެ ޙަމަލާތައް އަމާޒުކޮށްފައެވެ.

ގިނަ ޤައުމުތަކެއް މެދުވެރިވެގެން ޙަމަލާތައް ހުއްޓައިލަން އެއްބަސްވީ، އިޒްރޭލުން ހުއްޓުމެއް ނެތި ލާއިންސާނީ ޢުދުވާނުތައްދީ، ފަލަސްތީނުގެ ބައި ލައްކައެއްހާ މީހުން ޝަހީދުކޮށްލައި، ޣައްޒާގެ ގިނަ ސަރަޙައްދުތައް ސުންނާފަތިކުރަން ފެށިތާ 15 މަސް ފަހުންނެވެ.

އެއްބަސްވުމުގެ ފުރަތަމަ މަރުޙަލާގެ ދަށުން މިނިވަން ކުރާނެ ކަމަށް ބުނި ދިރިތިބި އަސީރުންނާއި ޤައިދީން ވަނީ މިނިވަންކޮށް ނިމިފައެވެ.

ނަމަވެސް، ދެވަނަ ފިޔަވަހީގެ ދަށުން ހަނގުރާމަ ދާއިމީކޮށް ހުއްޓާލައި، ޣައްޒާގެ ސަރަޙައްދުތަކުން އިޒްރޭލު ސިފައިން ފައިބަން ހިމަނާފައިވާތީ، އެކި ބަހަނާތައް ދައްކައިގެން އިޒްރޭލުން ވަނީ ދެވަނަ ފިޔަވަހި ފެށުމުގެ މަޝްވަރާ ވެސް ކުރަން ދެކޮޅު ހަދައިފައެވެ.

އޭގެ ބަދަލުގައި އިޒްރޭލުން ބޭނުންވީ، އެއްބަސްވުމުގެ ފުރަތަމަ ފިޔަވަހީގެ މުއްދަތު އިތުރުކުރާށެވެ. އެކަމަށް ޙަމާސްއިން އެއްބަސްނުވުމުން، އިޒްރޭލުން އެންމެ ފުރަތަމަ ވެސް ޣައްޒާއަށް އެހީ ވެއްދުމުގެ މަގުތައް ބަންދުކުރީއެވެ.

ސުލްޙައިގެ އެއްބަސްވުން އަލުން އިޔާދަކޮށް، ޣައްޒާއަށް ދޭ ޙަމަލާތައް ވަގުތުން ހުއްޓައިލުމަށް ހުޅަނގުގެ ބޮޑެތި ޤައުމުތަކުން ވެސް އިޒްރޭލަށް ވަނީ ގޮވާލައިފައެވެ.

އަދި ޣައްޒާއަށް އަލުން އެހީ ވެއްދުމުގެ ފުރުޞަތު ދިނުމަށް ވެސް ބައިނަލްއަޤުވާމީ މުޖުތަމަޢުއިން ދަނީ ތަކުރާރުކޮށް ގޮވާލަމުންނެވެ.

ކުރިއަށް އޮތް މަދު ދުވަސް ކޮޅެއްގެ ތެރޭގައި ޣައްޒާ ކާޑަށް ޖެހޭނެކަމުގެ ބިރުވެރި އިންޒާރު އދ.ގެ އެހީ ދޭ ޖަމާޢަތްތަކުން ވަނީ ދީފައެވެ.