ބޫޓާނާއެކު އެއްބާރުލުން އިތުރުކުރުމަށް މަޝްވަރާކޮށްފި އެވެ.

ބޫޓާންއާއި ރާއްޖެއިން މިކަމުގެ މަޝްވަރާކޮށްފައިވަނީ ރައީސް ޑރ. މުހައްމަދު މުއިއްޒު އަޒަރްބައިޖާންގެ ބަކޫއަށް މިއަދު ވަޑައިގަތުމަށްފަހު އެވެ.

ރައީސް މުއިއްޒު މި މަޝްވަރާ ކުރެއްވީ ކޮޕް29 ގެ ހަވާސާގައި ބޫޓާންގެ ބޮޑުވަޒީރު ޝެރިންގް ޓޮބްގޭއާއި ބައްދަލު ކުރުމުގެ ތެރެއިން ނެވެ.

އެ ދެ ލީޑަރުން ވަނީ ދެ ގައުމުގެ އެއްބާރުލުން އިތުރުކުރުމާ ބެހޭ ގޮތުން މަޝްވަރާކޮށް، ކޮޕް29 ގެ ތެރެއިން ދެމެހެއްޓެނިވި މުސްތަގުބަލެއްގެ ތަސައްވުރުތައް ހިއްސާކުރައްވާފަ އެވެ. އަދި ދެގައުމަކީ މޫސުމީ ބަދަލުތަކުން ގޮންޖެހުންތައް ކުރިމަތިވާ ގައުމެއްކަން ދެބޭފުޅުން ފާހަގަކުރެއްވި އެވެ.

އދ. ގެ ފްރޭމްވަރކް ކޮންވެންޝަން އޮން ކްލައިމެޓް ޗޭންޖް (ޔޫ.އެން.އެފް.ސީ.ސީ.ސީ)ގެ ދަށުން ބާއްވާ 29 ވަނަ ކޮންފަރަންސް އޮފް ދަ ޕާޓީޒް (ކޮޕް29) ގައި ބައިވެރިވެވަޑައިގަތުމަށް، ރައީސް ބަކޫއަށް ވަޑައިގަތީ މިއަދުގެ ވަގުތެއްގަ އެވެ.

އަޒަރްބައިޖާން ސަރުކާރުގެ އިސް އޮފިޝަލުން ވަނީ، ހައިދަރް އަލިޔޭވް ބައިނަލްއަގުވާމީ ވައިގެ ބަނދަރުން އެމަނިކުފާނަށް ހޫނު މަރުހަބާއެއް ދަންނަވާފަ އެވެ. ރައީސުލްޖުމްހޫރިއްޔާގެ މި ދަތުރުފުޅުގައި ދިވެހި ސަރުކާރުގެ މަތީ ފަންތީގެ ވަފުދެއް ބައިވެރިވެވަޑައިގަންނަ ވައެވެ. އޭގެ ތެރޭގައ ދުނިޔޭގެ ގަނޑުފެންގަނޑުތައް ވިރުމާއި ގުޅިގެން ކަނޑުގެ ލޮނުގަނޑު އުފުލުމުން ދިމާވާ ހިރާސްތަކުގެ ވާހަކަ ފާހަގަކޮށްފައި ވެއެވެ. އަދި ދުނިޔޭގައި އެންމެ ފުރަތަމަ ނެޓް ޒީރޯ ކާބަން ގައުމެއްގެ ގޮތުގައި ބޫޓާން ވުމަކީ ބޫޓާންއިން މޫސުމީ ބަދަލުތަކަށް އީޖާދީ ގޮތެއްގައި އަހުލުވެރިވާކަމުގެ ހެއްކެއްކަން ރައީސް ފާހަގަކުރެއްވި އެވެ. އަދި މޫސުމީ ބަދަލުތަކާއި ގުޅޭގޮތުން ގުޅިގެން އަޑު އުފުލާ، ދެ ގައުމުން ވަކާލާތުކުރަން ދެ ބޭފުޅުން މަޝްވަރާކުރެއްވި އެވެ.

މި ވާހަކަތަކާއި ވިދިގެން، ބޫޓާންގެ ބޮޑުވަޒީރުވެސް ވަނީ މޫސުމީ ކަންކަމުގައި ރައީސް ކުރައްވާ މަސައްކަތްޕުޅަށް ތައުރީފުކުރައްވާފަ އެވެ. އަދި ބޮޑެތި ގައުމުތަކުން މިކަމަށް ދޭ އަހައްމިއްޔަތުކަން ބޮޑުކުރުމަށް ކުދި ގައުމުތަކުން އަތުގުޅާލަން ޖެހޭ ކަމަށް އެމަނިކުފާނު ރައީސް މުއިއްޒު އަރިހުގައި ވިދާޅުވި އެވެ.

ކޮޕް29ގެ އެޖެންޑާގައި، އެންހޭންސްޑް ޓްރާންސްޕޭރެންސީ ނެޓްވަރކް ފުރިހަމަކުރުމަށާއި، ހުރިހާ މެންބަރުން ހިއްސާކުރާ މާލީ އައު ލަނޑުދަނޑިއެއް ކަނޑައެޅުމަށާއި، ބައިނަލްއަޤުވާމީގޮތުން އެއްބާރުލުންދިނުން އިތުރުކުރުމަށާއި، ނޭޝަނަލީ ޑިޓަރމައިންޑް ކޮންޓްރިބިއުޝަންސް (އެން.ޑީ.ސީ) ތަރައްޤީކުރުމުގައި ހުރި ގޮންޖެހުންތަކުން އަރައިގަނެވޭނެ ގޮތްތަކާމެދު މަޝްވަރާކުރުމަށް ސަމާލުކަން ދިނުމަށް ވަނީ ނިންމާފަ އެވެ.