ENGLISH

04 އޭޕްރީލު 2025

Advertisement

ޣައްޒާގައި ހުންނަ ހަމައެކަނި ކެންސަރު ހޮސްޕިޓަލު އިޒްރޭލުން ގޮއްވާލައިފި

23 މާރިޗު 2025

|

ހަސަން އާމިރު

ފަލަސްތީނުގެ ޣައްޒާގައި ކެންސަރަށް ފަރުވާދޭ ހަމައެކަނި ހޮސްޕިޓަލަށް އިޒްރޭލުން ބޮން އަޅައި، ގޮއްވާލައިފިއެވެ.

ޓަރކިޝް-ޕަލަސްތިނިއަން ފްރެންޑްޝިޕް ހޮސްޕިޓަލަށް ސީދާ އަމާޒުކޮށް ދިން ވައިގެ ޙަމަލާގައި، އެ އިމާރާތް އިޒްރޭލުން ވަނީ ބިމާހަމަކޮށްލައިފައެވެ. އެ ހޮސްޕިޓަލާ އިންވެގެން ހުންނަ މެޑިކަލް ސްކޫލް ވެސް އެ ޙަމަލާގައި ވަނީ ބޭނުންނުކުރެވޭ ވަރަށް ސުންނާފަތިވެފައެވެ.

އިޒްރޭލުން މި ހޮސްޕިޓަލް ގޮއްވާލާފައި މިވަނީ، ޣައްޒާގައި އޮތް ސުލްޙައިގެ އެއްބަސްވުން މުގުރާލައި، އެއްގަމާއި ވައިގެ މަގުން ޔަހޫދީ ފައުޖު އަރައިގަނެ، އަނެއްކާވެސް ޣައްޒާ ސުންނާފަތިކުރަމުންދާ ދަނޑިވަޅެއްގައެވެ.

ޣައްޒާގެ ސިއްޙީ ފަރުވާދޭ މަރުކަޒުތަކަށް ސީދާ އަމާޒުކޮށް އިޒްރޭލުން ދޭ ޙަމަލާތަކަކީ ފަލަސްތީނުގެ ނަސްލުހޭދަ ކުރުމަށް، ރާވައިގެން ހިންގާ ލާއިންސާނީ ޖަރިމާތަކެއްގެ ގޮތުގައި އދ.އިން ވެސް ވަނީ ސިފަކޮށްފައެވެ.

ޣައްޒާއަށް އެހީ ވެއްދުން ތާށިކުރުމުން، ތެޔޮ ލިބުން ދަތިވެ، ޓަރކިޝް-ޕަލަސްތިނިއަން ފްރެންޑްޝިޕް ހޮސްޕިޓަލް ރަނގަޅަށް ނުހިންގޭތާ އެތައް މަހެއް ވަނީ ވެފައެވެ.

އެކަށީގެންވާ ފަރުވާ ނުލިބި، އެ ހޮސްޕިޓަލުގައި ހަތަރު ބަލި މީހަކު މަރުވި ކަމަށް ސިއްހީ އިދާރާތަކުން ބުންޏެވެ.

އެ ހޮސްޕިޓަލު މިހާރު ބިމާހަމަވެފައިވާތީ، ޣައްޒާގައި ކެންސަރަށް ފަރުވާ ހޯދޭނެ އެއްވެސް ގޮތެއް ނެތް ކަމަށް ވެސް އެ އިދާރާތަކުން ބުންޏެވެ.

މިދިޔަ އަންގާރަ ދުވަހު ޣައްޒާއަށްދޭ ޢުދުވާނުތައް ފަށައި، އިޒްރޭލުން މިހާތަނަށް ވަނީ ފަލަސްތީނުގެ 500 އަށް ވުރެ ގިނަ މީހުން ޝަހީދުކޮށްލައިފައެވެ.

އޭގެތެރޭގައި ގިނައީ އަންހެނުންނާއި ކުޑަކުދިން ކަމަށް ޣައްޒާގެ ދިފާޢީ ވުޒާރާއިން ވަނީ ބުނެފައެވެ.

ކިޔުންތެރިންގެ ހިޔާލު