ސިފައިންނާއި ފުލުހުންގެ މެޑިކަލް ވެލްފެއާ ސްކީމް ޕްރައިވެޓް އިންޝުއަރެންސް ނިޒާމަކަށް ބަދަލުކުރުމަށް ނިންމައިފިއެެެވެ. މި ނިންމުން ނިންމާފައިވަނީ މިހާރުގެ ސްކީމުގެ ދަށުން ދައުލަތަށް ކުރަންޖެހޭ ބޮޑު ޚަރަދު ކުޑަކުރުމުގެ މަޤްޞަދުގައެވެ.

ފިނޭންސް މިނިސްޓްރީން ހާމަކުރި ބަޖެޓު ތަފްސީލުތަކުގައިވާ ގޮތުން، މިހާރުގެ މެޑިކަލް ވެލްފެއާ ސްކީމުގެ ދަށުން ސިފައިންނާއި ފުލުހުންނާއި އެ ފަރާތްތަކުގެ އާއިލާތަކަށް ބޮޑު ޚަރަދެއް ހިނގާ ކަމަށް ފާހަގަކޮށްފައިވެއެވެ. މި އަހަރު އެކަނި ވެސް ސިފައިންނާއި ފުލުހުންގެ އިންޝުއަރެންސަށް 322 މިލިއަން ރުފިޔާ ޚަރަދުކޮށްފައިވާ ކަމަށް ބުނެފައިވެއެވެ.

މިހާރުގެ ސްކީމުގައި ލިމިޓެއް ނެތުމާއެކު، ކޮސްމެޓިކް ޕްރޮސީޖަރތަކާއި ބައެއް ކޮންސިއުމަބަލްތައް ވެސް މި ސްކީމުގެ ދަށުން ލިބެމުންދާ ކަމަށް ފިނޭންސް މިނިސްޓްރީން ފާހަގަކޮށްފައިވެއެވެ. އެހެންކަމުން، ސިފައިންނާއި ފުލުހުންގެ އާއިލާތަކަށް ޕްރައިވެޓް އިންޝުއަރެންސް ޕެކޭޖެއް ހަމަޖައްސައި، ދައުލަތުން ޚަރަދުކުރަންޖެހޭ މިންވަރު ކޮންޓްރޯލްކުރުމަށް ނިންމާފައިވާ ކަމަށް މިނިސްޓްރީން ބުނެފައިވެއެވެ.

މި ބަދަލު ގެނައުމަށް ހަމަޖެހިފައިވަނީ އަންނަ އަހަރުގެ ކުރީކޮޅުގައެވެ. އަދި ޕްރައިވެޓް އިންޝުއަރެންސް ހަމަވުމަށްފަހު އާސަންދަ ނިޒާމުގެ ތެރެއިން ވެސް ސިއްޙީ ފަރުވާ ލިބޭނެ ކަމަށް ފިނޭންސް މިނިސްޓްރީން ހާމަކޮށްފައިވެއެވެ.

އޮޑިޓަރ ޖެނެރަލްގެ އޮފީހުން ނެރުނު ރިޕޯޓެއްގައި ފާހަގަކޮށްފައިވާ ގޮތުގައި، މިދިޔަ އަހަރު ސިފައިންނާއި ފުލުހުންގެ އިންޝުއަރެންސަށް ކަނޑައެޅި ބަޖެޓަށްވުރެ 35 ޕަސެންޓް އިތުރަށް ޚަރަދުކޮށްފައިވެއެވެ. އިތުރު އިންޝުއަރެންސްތަކަށް 179 މިލިއަން ރުފިޔާ ކަނޑައަޅާފައިވީ ނަމަވެސް، އަހަރު ނިމުނުއިރު އެ އަދަދު 241 މިލިއަން ރުފިޔާއަށް އަރާފައިވާ ކަމަށް އޮޑިޓް ރިޕޯޓުގައި ބަޔާންކޮށްފައިވެއެވެ.

ވޭތުވެދިޔަ ފަސް އަހަރުގެ ތެރޭގައި ސިފައިންނާއި ފުލުހުންގެ އިންޝުއަރެންސަށް ކުރާ ޚަރަދު ގާތްގަނޑަކަށް 40 ޕަސެންޓަށް އިތުރުވެފައިވާކަން ފާހަގަކުރެވެއެވެ. 2019 ވަނަ އަހަރު 148 މިލިއަން ރުފިޔާ ޚަރަދުކޮށްފައިވާއިރު، މިހާރު އެ އަދަދު ވަނީ ބޮޑުތަނުން އިތުރުވެފައެވެ.