ENGLISH

04 އޭޕްރީލު 2025

Advertisement

ލުބްނާނުގެ ސުލްޙައިގެ އެއްބަސްވުން ވެސް މުގުރާލައި، އިޒްރޭލުން ބޮން އަޅަން ފަށައިފި

23 މާރިޗު 2025

|

ހަސަން އާމިރު

ލުބްނާނާއެކު ހަދާފައިވާ ސުލްޙައިގެ އެއްބަސްވުމާ ވެސް އިޒްރޭލުން ޚިލާފުވެ، ލުބްނާނުގެ އެކި ސަރަޙައްދުތަކަށް ވެސް ވައިގެ ޙަމަލާތައް ދޭން ފަށައިފިއެވެ.

އިޒްރޭލާއި، ލުބްނާނުގައި ޙަރަކާތްތެރިވާ ހަނގުރާމަވެރި ޖަމާޢަތް، ޙިޒްބުﷲ އާ ދެމެދު އަހަރަކަށް ވުރެ ގިނަ ދުވަސް ވަންދެން ކުރަމުންދިޔަ ހަނގުރާމަ، އެމެރިކާ އާއި ފްރާންސް އިސްވެ އޮވެ، ހަނގުރާމަ ހުއްޓާލުމުގެ އެއްބަސްވުމެއް ޤާއިމުކުރީ މިދިޔަ ނޮވެމްބަރު މަހުގެ ތެރޭގައެވެ.

އިޒްރޭލުގެ އަސްކަރިއްޔާއިން ބުނީ، ލުބްނާނުގެ ދެކުނުގައި ހުރި ހިޒްބުﷲ ގެ އަސްކަރީ މަރުކަޒުތަކަކަށް އަމާޒުކޮށް ވައިގެ ޙަމަލާތައް ދީފައިވާ ކަމަށެވެ.

ލުބްނާނުގެ ސިއްޙީ ވުޒާރާއިން ބުނީ، އިޒްރޭލުގެ ޙަމަލާތަކުގައި މިހާތަނަށް ހަތް މީހަކު ޝަހީދުވެފައިވާ ކަމަށާއި އޭގެތެރޭގައި ކުޑަކުއްޖަކު ވެސް ހިމެނޭ ކަމަށެވެ. އެ ޙަމަލާތަކުގައި އިތުރު 40 މީހަކު ޒަޚަމްވެގެން ފަރުވާދެމުން އަންނަ ކަމަށް ވެސް އެ ވުޒާރާއިން ބުންޏެވެ.

އިޒްރޭލުން ލުބްނާނަށް އަލުން ޙަމަލާދޭން ފަށާފައިމިވަނީ، ފަލަސްތީނުގެ ޣައްޒާގައި އޮތް ސުލްޙައިގެ އެއްބަސްވުން ވެސް މުގުރާލައި، އެއްގަމާއި ވައިގެ މަގުން ޔަހޫދީ ފައުޖު އަރައިގަނެ، އަނެއްކާވެސް ޣައްޒާ ސުންނާފަތިކުރަމުންދާ ދަނޑިވަޅެއްގައެވެ.

މިދިޔަ އަންގާރަ ދުވަހު ޣައްޒާގައި ޢުދުވާނުތައް ފަށައި، އިޒްރޭލުން މިހާތަނަށް ވަނީ ފަލަސްތީނުގެ 500 އަށް ވުރެ ގިނަ މީހުން ޝަހީދުކޮށްލައިފައެވެ.

އޭގެތެރޭގައި ގިނައީ އަންހެނުންނާއި ކުޑަކުދިން ކަމަށް ޣައްޒާގެ ދިފާޢީ ވުޒާރާއިން ވަނީ ބުނެފައެވެ.

ކިޔުންތެރިންގެ ހިޔާލު