އަންނަ އަހަރުން ފެށިގެން ދައުލަތުގެ ހަރަދުގައި ހިލޭ ބޭސްފަރުވާ ކޮށްދޭ ނިޒާމު އާސަންދަ އަށް ކުރާ ހޭދަ ކުޑަކުރުމަށްޓަކައި އެންމެ މުއްސަނދިންގެ އަތުން ވަކި އަދަދެއް އެ ނިޒާމަށް ދައްކަންޖެހޭ ގޮތަށް ބަދަލު ގެންނަން ސަރުކާރުން ނިންމައިފިއެވެ.

ދައުލަތުން ދޭ ސަބްސިޑީ އާއި އެހީތަކުގެ ތެރެއިން އެންމެ ބޮޑު ހޭދައެއް ކުރަން ޖެހެނީ އާސަންދަ ނިޒާމަށް ކަމަށްވުމުން، އެ ނިޒާމު އެންމެ ދެމެހެއްޓެނިވި ގޮތަކަށް ހިންގުމަށްޓަކައި އަންނަ އަހަރު ބޮޑެތި ބަދަލުތަކެއް ގެންނަން ސަރުކާރުން ވަނީ ކަނޑައަޅައިފައެވެ.

އާސަންދައިގެ ހަރަދުތައް ދެމެހެއްޓެނިވި މިންގަނޑެއްގައި ހިފެހެއްޓުމަށްޓަކައި މުހިއްމު ދެ ބަދަލެއް އަންނަ އަހަރުގެ އޭޕްރީލް އިން ފެށިގެން ގެންނާނެއެވެ. އެ ބަދަލުތަކާ އެކު، އާސަންދަ އިން 600 މިލިއަން ރުފިޔާއާ ގާތް ކުރާ އަދަދެއް އާސަންދައިން ކުޑަ ކުރެވޭނެ ކަމަށް އަންނަ އަހަރަށް ލަފާކޮށް ރައްޔިތުންގެ މަޖިލިހަށް ހުށަހަޅާފައިވާ ބަޖެޓުގައި ފާހަގަކޮށްފައިވެއެވެ.

އަންނަ އަހަރަށް ލަފާކުރާ ބަޖެޓުގެ ތަފްސީލުގައިވާ ގޮތުން މަހަކު 60،000ރ. އަށް ވުރެ ބޮޑު އާމްދަނީއެއް ލިބޭ ނުވަތަ އިންކަމް ޓެކްސް ދައްކަންޖެހޭ މީހުންގެ އަތުން ވަކި އަދަދެއް ނަގަން ވަނީ ކަނޑައަޅައިފައެވެ. ފިނޭންސް މިނިސްޓްރީން ހާމަކުރިގޮތުގައި، އެ ކޮންޓްރިބިއުޝަންގެ ސަބަބުން، މުޅި ނިޒާމު ޕްރޮގްރެސިވް ކުރެވި، އެންމެ ފަގީރު ހާލުގައި އުޅޭ މީހުންނަށް މާލީ ބުރައަކާ ނުލައި ސިއްހީ ހިދުމަތްތައް ލިބޭކަން ކަށަވަރު ކުރެވޭނެ ކަމަށެވެ.

"މިއީ ދެކުނު ކޮރެއާ ފަދަ ތަރައްގީ ވެފައިވާ ގިނަ ގައުމުތަކުގައި ކާމިޔާބުކަމާ އެކު ތަންފީޒު ކުރަމުންދާ މޮޑެލްއެއް ކަމުގައިވާ އިރު ބައެއް ގައުމުތަކުން އެ ޕްރީ-ޕޭމެންޓް ނަގަމުން ދަނީ އިންކަމް ޓެކުހުގެ ފައިދާ ދައްކާ ވަގުތު ރެވެނިއު އޮތޯރިޓީއަށެވެ،" ބަޖެޓު ފޮތުގައި ވެއެވެ.

ފާމަސީތަކާއި ސަރުކާރުގެ ހޮސްޕިޓަލުތަކުން ހޯދާ ބައެއް ސިއްހީ ހިދުމަތްތަކަށް އެންމެ މުއްސަދިންގެ އަތުން ވެސް ކޯ-ޕޭ ނިޒާމެއް ތައާރަފް ކުރުމަށް ޕްލޭން ކޮށްފައިވެއެވެ. އެންމެ ގިނައިން އާމްދަނީ ލިބޭ މީހުން އައުޓްޕޭޝަންޓް ހިދުމަތްތައް ހޯދާ އިރާއި އެސެންޝަލް ނޫން ބޭސް ގަންނަ އިރު ބިލްގެ ވަކި މިންވަރެއް ކޮންޓްރިބިއުޝަނެއްގެ ގޮތުގައި ދައްކަން ޖެހޭ ގޮތަށް ބަދަލުކޮށް އަމަލު ކުރަން ވަނީ ނިންމައިފައެވެ. އެކަން ކުރާނީ އަމިއްލަ ޖީބުން އަހަރެއްގެ މައްޗަށް ގިނަވެގެން ހަރަދުކުރަން ޖެހޭނެ އެންމެ މަތީ މިންވަރުތައް ކަނޑައަޅައި، އެ އަދަދުގެ އިތުރަށް އަތުން ފައިސާ ދައްކަން ނުޖެހި މިހާރެކޭ ވެސް އެއްފަދައިން ހިދުމަތް ހޯދޭނެއެވެ.

ފިނޭންސް މިނިސްޓަރ ވިދާޅުވި ގޮތުގައި، ކޮންޓްރިބިއުޝަން އެމައުންޓާއި އަހަރެއްގެ ތެރޭގައި ގިނަވެގެން ހަރަދު ކުރަން ޖެހޭ އަދަދު ކަނޑައަޅާފައިވަނީ އާމްދަނީގެ ގިންތިއަށް ބަލައިގެންނެވެ. އިންކަމް ޓެކްސް ދައްކާ މީހުންނަށް ބަލައިގެން އެފަދަ ކޮންޓްރިބިއުޝަނެއް ނަގާއިރު އުމުރުން 18 އަހަރުން ދަށުގެ ކުޑަކުދިންނާއި 65 އަހަރުން މަތީގެ މީހުންނާއި ދިގު މުއްދަތަށް ފަރުވާ ހޯދަން ޖެހޭ ބަލިތަކަށް ފަރުވާ ހޯދާ މީހުން އިސްތިސްނާ ވާނެއެވެ.

އާސަންދަ ޙިދުމަތްދޭ އަމިއްލަ ތަންތަނުން ޙިދުމަތް ހޯދާނަމަ އާސަންދައިން ކަވަރުވާނީ ބިލްގެ ވަކި ވަރަކެށެވެ. ބާކީ ބާ ދައްކަންޖެހޭނީ ޙިދުމަތް ހޯދާ ފަރާތްތަކުންނެވެ. އާސަންދައިން ކަވަރު ކުރާ އަދަދު ޖުމްލަގޮތެއްގައި އެއްގޮތް ނަމަވެސް އަމިއްލަ ޖީބުން ދައްކަން ޖެހޭ ބައި އެކި ހޮސްޕިޓަލުތަކާއި ކްލިނިކްތަކުގައި ތަފާތެވެ.

 "އެކި ކަހަލަ މެޑިކަލް ޕްރޮސީޖާތަކަށް ކަނޑއަޅާފައިވާ އަގުގެ އިތުރުން އެކި ކަހަލަ ކޮންސިއުމަބަލް އާއި އެޑްމިޓް ކުރަން ޖެހޭ ހާލަތްތަކުގައި އެކަމުގެ ހަރަދުތަކަށް ބިލު ކުރެ އެވެ،" ފިނޭންސް މިނިސްޓްރީގެ ލިޔުމުގައިވެއެވެ.

ހޮސްޕިޓަލްތަކުން އާސަންދައިން ކަނޑާ އަދަދުތައް އެއްހަމަ ކުރުމުގެ އިތުރުން އެންސްޕާ މެދުވެރިކޮށް ފޯރުކޮށްދޭ މެޑިކަލް ވެލްފެއާ ނިޒާމަށްވެސް ބަދަލުތަކެއް ގެންނަން ވަނީ ނިންމައިފައެވެ.

އެންސްޕާ މެދުވެރިކޮށް އެންމެ މުއްސަދިންނަށް ހިދުމަތް ދޭ ނަމަ އެކަން ކުރާނީ އިންޓްރެސްޓް ފްރީ ލޯނެއްގެ ގޮތުގަ އެވެ.މަދުން އާމްދަނީ ލިބޭ މީހުންނަށް މިހާރެކޭ އެއްގޮތަށް ހިދުމަތްތައް ލިބޭނެ ކަމަށް ވެސް ފިނޭންސް މިނިސްޓްރީން ބުންޏެވެ.

މިދިޔަ އަހަރު އާސަންދައަށް ދައުލަތުން 2.6 ބިލިއަން ރުފިޔާ ހަރަދުކޮށްފައިވެއެވެ. އާސަންދައަށް މި އަހަރު ބަޖެޓް ކޮށްފައިވަނީ 1.9 ބިލިއަން ރުފިޔާއެވެ. މިދިޔަ އަހަރުތަކުގައި އާސަންދަ އަށް ކުރާ ހޭދަ އިންތިހާއަށް ބޮޑުވެފައިވާތީ، އެ ނިޒާމު ދެމެހެއްޓެނިވި ނިޒާމަކަށް ބަދަލު ކުރަން މާލީ އިދާރާތަކުން އަންނަނީ ލަފާ ދެމުންނެވެ.