ހަމާސްގެ ބަލުމުގެ ދަށުގައި ބާކީ ތިބި އަސީރުން މިނިވަންނުކޮށްފިނަމަ، ފަލަސްތީނުގެ ޣައްޒާގެ ބައެއް ސަރަޙައްދުތަކަށް ވެރިވެގަނެ، އިސްތިޢުމާރު ކުރާނެ ކަމުގެ އިންޒާރު ޔަހޫދީންގެ ދިފާޢީ ވަޒީރު ދީފިއެވެ.

އެއްގަމުން ސިފައިން ވަދެގަތުމުގެ އިތުރުން، އިޒްރޭލުން ދަނީ ހުއްޓުމެއް ނެތި ޣައްޒާގެ މީހުން ދިރިއުޅޭ ސަރަޙައްދުތަކަށް ވެސް ވައިގެ ޙަމަލާތައް އަމާޒުކުރަމުންނެވެ.

ޣައްޒާގެ ދިފާޢީ ވުޒާރާއިން ބުނީ، އިޒްރޭލުގެ ރަހުމްކުޑަ ޙަމަލާތަކުގައި މިހާތަނަށް 500 އަށް ވުރެ ގިނަ މީހުން ޝަހީދުވެފައިވާއިރު، އޭގެތެރޭގައި ގިނައީ އަންހެނުންނާއި ކުޑަކުދިން ކަމަށެވެ.

އިޒްރޭލުގެ ދިފާޢީ ވަޒީރު އިސްރާއީލް ކަޓްޒް ނެރުނު ބަޔާނެއްގައި ބުނީ، ޣައްޒާގެ ސަރަޙައްދުތައް ހިފުމުގެ އަމުރު ޔަހޫދީ ފައުޖުތަކަށް ދީފައިވާ ކަމަށާއި، އަސީރުން މިނިވަންކުރުން ލަސްކުރާނަމަ، އެ ސަރަޙައްދުތައް އިޒްރޭލުން އިސްތިޢުމާރު ކުރާނެ ކަމަށެވެ.

އިޒްރޭލުގެ ފައުޖުން މިހާރު ވެސް ވަނީ ޣައްޒާގެ ބައެއް ސަރަޙައްދުތަކުގައި ދިރިއުޅޭ ފަލަސްތީނުގެ ރައްޔިތުން ގެދޮރު ދޫކޮށް ދިޔުމަށް އަންގައިފައެވެ.

އިޒްރޭލުން ޣައްޒާއަށް އަނެއްކާވެސް ޙަމަލާދޭން ފަށާފައިމިވަނީ، މިދިޔަ ޖެނުއަރީ މަހުގެ 19 ވަނަ ދުވަހުން ފެށިގެން ސުލްޙައިގެ އެއްބަސްވުމަކަށް ޢަމަލުކުރަމުންދަނިކޮށެވެ.

ގިނަ ޤައުމުތަކެއް މެދުވެރިވެގެން ޙަމަލާތައް ހުއްޓައިލަން އެއްބަސްވީ، އިޒްރޭލުން ހުއްޓުމެއް ނެތި ލާއިންސާނީ ޢުދުވާނުތައްދީ، ފަލަސްތީނުގެ ބައި ލައްކައެއްހާ މީހުން ޝަހީދުކޮށްލައި، ޣައްޒާގެ ގިނަ ސަރަޙައްދުތައް ސުންނާފަތިކުރަން ފެށިތާ 15 މަސް ފަހުންނެވެ.

އެއްބަސްވުމުގެ ފުރަތަމަ މަރުޙަލާގެ ދަށުން މިނިވަން ކުރާނެ ކަމަށް ބުނި ދިރިތިބި އަސީރުންނާއި ޤައިދީން ވަނީ މިނިވަންކޮށް ނިމިފައެވެ.

ނަމަވެސް، ދެވަނަ ފިޔަވަހީގެ ދަށުން ހަނގުރާމަ ދާއިމީކޮށް ހުއްޓާލައި، ޣައްޒާގެ ސަރަޙައްދުތަކުން އިޒްރޭލު ސިފައިން ފައިބަން ހިމަނާފައިވާތީ، އެކި ބަހަނާތައް ދައްކައިގެން އިޒްރޭލުން ވަނީ ދެވަނަ ފިޔަވަހި ފެށުމުގެ މަޝްވަރާ ވެސް ކުރަން ދެކޮޅު ހަދައިފައެވެ.

އޭގެ ބަދަލުގައި އިޒްރޭލުން ބޭނުންވީ، އެއްބަސްވުމުގެ ފުރަތަމަ ފިޔަވަހީގެ މުއްދަތު އިތުރުކުރާށެވެ. އެކަމަށް ޙަމާސްއިން އެއްބަސްނުވުމުން، އިޒްރޭލުން އެންމެ ފުރަތަމަ ވެސް ޣައްޒާއަށް އެހީ ވެއްދުމުގެ މަގުތައް ބަންދުކުރީއެވެ.

ސުލްޙައިގެ އެއްބަސްވުން އަލުން އިޔާދަކޮށް، ޣައްޒާއަށް ދޭ ޙަމަލާތައް ވަގުތުން ހުއްޓައިލުމަށް ހުޅަނގުގެ ބޮޑެތި ޤައުމުތަކުން ވެސް އިޒްރޭލަށް ވަނީ ގޮވާލައިފައެވެ.

އަދި ޣައްޒާއަށް އަލުން އެހީ ވެއްދުމުގެ ފުރުޞަތު ދިނުމަށް ވެސް ބައިނަލްއަޤުވާމީ މުޖުތަމަޢުއިން ދަނީ ތަކުރާރުކޮށް ގޮވާލަމުންނެވެ.

ކުރިއަށް އޮތް މަދު ދުވަސް ކޮޅެއްގެ ތެރޭގައި ޣައްޒާ ކާޑަށް ޖެހޭނެކަމުގެ ބިރުވެރި އިންޒާރު އދ.ގެ އެހީ ދޭ ޖަމާޢަތްތަކުން ވަނީ ދީފައެވެ.