ENGLISH

04 އޭޕްރީލު 2025

Advertisement

މެސީ ނެތި އުރުގުއޭ ބަލިކޮށް، އާޖެންޓީނާ ކޮލިފައިވުމާ ގާތަށް

22 މާރިޗު 2025

|

މުޙައްމަދު އަދުހަމް

އުރުގުއޭ ކޮޅަށް ލަނޑުޖެހުމަށްފަހު އާޖެންޓީނާގެ ކުޅުންތެރިން އުފާ ފާޅުކުރަނީ. --ފޮޓޯ: އޭޕީ

ދެކުނު އެމެރިކާގެ ވޯލްޑް ކަޕް ކޮލިފައިންގައި މިއަދު އުރުގުއޭ 1-0 އިން ބަލިކޮށް، އާޖެންޓީނާ އިން އެ މުބާރާތަށް ކޮލިފައިވުމާ ގާތަށް ޖެހިލައިފިއެވެ.

މި މޮޅާއެކު، އާޖެންޓީނާ އުޅެނީ ކޮލިފައިންގ ގްރޫޕުގެ އެއްވަނައިގައެވެ. އެ ޓީމަށް 13 މެޗުން ލިބިފައިވަނީ 28 ޕޮއިންޓެވެ. ދެވަނައިގައި އޮތް އެކުއޭޑޯ އަށް 22 ޕޮއިންޓް ލިބިފައިވާއިރު، އެއް ޕޮއިންޓް ފަހަތުން ތިންވަނައިގައި އޮތީ ބްރެޒިލެވެ. އުރުގުއޭ އޮތީ 20 ޕޮއިންޓާއެކު ހަތަރު ވަނައިގައެވެ.

އާޖެންޓީނާ އިން ރޭގެ މެޗަށް ނުކުތީ އަނިޔާގައި ހުރި ކެޕްޓަން، ލިއޮނަލް މެސީ އާއި އިންޓަރ މިލާންގެ ފޯވާޑް، ލަޓާރޯ މާޓިނޭޒް ނުލައެވެ. މީގެއިތުރުން، ޑިފެންސްގެ މުހިއްމު ކުޅުންތެރިއެއް ކަމަށްވާ، މެންޗެސްޓަރ ޔުނައިޓެޑުގެ ޑިފެންޑަރު، ލިސަންދްރޯ މާޓިނޭޒް ވެސް މި ވަގުތު ހުރީ އަނިޔާގައެވެ.

އެސްޓާޑިއޯ ސެންޓެނާރިއޯގައި ކުޅުނު މެޗުގައި އާޖެންޓީނާ އިން ޖެހި ހަމައެކަނި ލަނޑު، 68 ވަނަ މިނެޓުގައި ކާމިޔާބުކޮށްދިނީ ތިއާގޯ އަލްމާޑާ އެވެ. މިި ލަނޑު ޖެހުމަށް އެހީތެރިވެދިނީ ހޫލިއަން އަލްވަރޭޒް އެވެ.

ރޭގެ މެޗުގެ އިތުރު ވަގުތުގެ ތެރޭގައި އާޖެންޓީނާގެ ވިންގ، ނިކޮލަސް ގޮންޒާލެޒް އަށް ސީދާ ރަތް ކާޑު ދެއްކުމުން އެ ޓީމު މެޗު ނިންމާލީ 10 ކުޅުންތެރިންނާއެކު އެވެ. މިއާއެކު، ކޮލިފައިންގައި ކުރިއަށް އޮތް ބްރެޒިލް މެޗުގައި އޭނާ އަށް ނުކުޅެވޭނެ އެވެ.

ބްރެޒިލްއިން އެ މެޗަށް ނުކުންނައިރު، އެންމެ ފަހުން ކޮލަމްބިއާއާ ދެކޮޅަށް ކުޅުނު މެޗުގައި ދެއްކި ރީނދޫ ކާޑާ ގުޅިގެން ބްރޫނޯ ގިމަރޭޝް އާއި ގެބްރިއަލް މަގާޅައެސް ވަނީ ސަސްޕެންޑްވެފައެވެ. މީގެއިތުރުން، އެ މެޗުގައި ބޮލަށް ލިބުނު އަނިޔާއަކާ ގުޅިގެން ބްރެޒިލްގެ އެއްވަނަ ގޯލްކީޕަރު، އެލިސަން ބެކާ އަށް ވެސް ނުކުޅެވޭނެ އެވެ.

އާޖެންޓީނާ އަށް އެ މެޗުން އެއްވަރުކޮށްލައިގެން އަންނަ އަހަރުގެ ފީފާ ވޯލްޑް ކަޕްގެ ޖާގައެއް ކަށަވަރުކުރެވޭނެ އެވެ.

ކޮލިފައިންގައި މިއަދު ކުޅުނު އަނެއް މެޗުގައި އެކުއޭޑޯ ވަނީ 2-1 އިން ވެނެޒުއެލާ ބަލިކޮށްފައެވެ.

ކިޔުންތެރިންގެ ހިޔާލު