ތޯމަސް ޓުޗެލްގެ އިރުޝާދުގެ ދަށުން ކުޅުނު ފުރަތަމަ މެޗުގައި އަލްބޭނިއާ އަތުން 2-0 ގެ ނަތީޖާއަކުން އިންގްލެންޑް މޮޅުވެއްޖެއެވެ.

ދެހާސް ސައްބީސް ވަނަ އަހަރުގެ ފީފާ ވޯލްޑް ކަޕް ކޮލިފައިންގައި އިންގްލެންޑް ކުޅުނު ފުރަތަމަ މެޗަކީ، 18 މަސްދުވަހުގެ ކޮންޓްރެކްޓެއްގައި އިންގްލެންޑްގެ ކޯޗުކަމާ ހަވާލުވި ޓުޗެލްއާ އެކު އެ ޓީމު ނުކުތް ފުރަތަމަ މެޗެވެ.

ވެމްބްލީ ސްޓޭޑިއަމްގައި ކުޅުނު މެޗު ފެށިގެން 20 ވަނަ މިނެޓުގައި އިންގްލެންޑަށް ލީޑު ނަގައިދިނީ އާސެނަލްގެ ޒުވާން ޑިފެންޑަރު، މައިލްސް ލުވިސް-ސްކެލީ އެވެ. އެ ޓީމުގެ މިޑްފީލްޑަރު، ޖޫޑް ބެލިންހަމް ދިން ހިތްގައިމު ޕާހަކުން ލުވިސް-ސްކެލީ ކާމިޔާބުކުރި މި ގޯލާއެކު ވަނީ ތާރީޚުގެ ތެރެއަށް ޖެހިލައިފައެވެ.

ރޭގެ މެޗުގައި ޖެހި ގޯލާ އެކު ލުވިސް-ސްކެލީ ވަނީ އިންގްލެންޑުގެ ޖާޒީގައި ކުޅުނު ފުރަތަމަ މެޗުގައި ލަނޑު ޖެހި އެންމެ ހަގު ކުޅުންތެރިޔާގެ ރެކޯޑް މުގުރާލައިފައެވެ. މި މެޗުގައި ލަނޑު ޖެހިއިރު ލުވިސް-ސްކެލީގެ އުމުރަކީ 18 އަހަރާއި 176 ދުވަހެވެ. ކުރިން، މި ރެކޯޑް އޮތީ މާކަސް ރެޝްފޯޑް އަތުގަ އެވެ.

މި މެޗުގައި އިންގްލެންޑުން ޖެހި ދެވަނަ ލަނޑު، 77 ވަނަ މިނެޓުގައި ކާމިޔާބުކޮށްދިނީ އެ ޓީމުގެ ކެޕްޓަން، ހެރީ ކޭން އެވެ. މި ލަނޑު ޖަހަން އެހީތެރިވެދިނީ ޑެކްލަން ރައިސް އެވެ. މިއީ އިންގްލެންޑަށް ކޭން ޖަހައިދިން 70 ވަނަ ގޯލެވެ.

ފީފާ ވޯލްޑް ކަޕް ކޮލިފައިންގައި އިންގްލެންޑް ހިމެނޭ ގްރޫޕް ކޭގައި ރޭ ކުޅުނު އަނެއް މެޗުގައި އެންޑޯރާގެ ދަނޑުގައި އެ ޓީމު އަތުން ލެޓްވިއާ މޮޅުވީ 1-0 އިންނެވެ.