ދެހާސް ހަތާވީސް ވަނަ އަހަރު ސައުދީ އަރަބިއްޔާގައި ބާއްވާ އޭޝިއަން ކަޕުގެ ކޮލިފައިންގައި އަންނަ އަންގާރަ ދުވަހު ފިލިޕީންސާ ދެކޮޅަށް ކުޅޭ މެޗަށް ދިވެހި ގައުމީ ފުޓްބޯޅަ ޓީމު މިއަދު ފުރައިފިއެވެ.

އޭޝިއަން ކަޕްގެ ކޮލިފައިންގ ބުރަށް ތައްޔާުރުވުމުގެ ގޮތުން ގައުމީ ފުޓްބޯޅަ ޓީމުން ވަނީ ވާދަވެރި އިންޑިއާއާ ދެކޮޅަށް ބައިނަލްއަގުވާމީ އެކުވެރިކަމުގެ މެޗެއް ކުޅެފައެވެ. މިދިޔަ ބުދަ ދުވަހު ކުޅުނު އެ މެޗުން ރާއްޖެ ބަލިވީ 3-0 އިންނެވެ.

މި މެޗަކީ ރާއްޖޭގެ ފުޓްބޯޅަ ސީޒަން ނުފެށި ދިގުލައިގެންގޮސް، ގައުމީ ޓީމުން ގިނަ ދުވަސްތަކެއް ވަންދެން މެޗެއްނުކުޅެ ތިބުމަށްފަހު ކުޅުނު މެޗަކަށްވުމުން، މެޗުގެ ނަތީޖާއަކީ ދެރަ ނަތީޖާއެއް ނޫން ކަމަށް ފުޓްބޯޅައިގެ ބައެއް ތަޖުރިބާކާރުން ފާހަގަކުރެއެވެ.

ރާއްޖޭން ވަނީ މީގެކުރިން ފިލިޕީންސާ ދެކޮޅަށް މެޗުތައް ކުޅެފައެވެ. އެގޮތުން ރާއްޖޭގައި 2014 ވަނަ އަހަރު ބޭއްވި އޭއެފްސީ ޗެލެންޖް ކަޕްގެ ސެމީ ފައިނަލުގައި 3-2 އިން މޮޅުވީ ފިލިޕީންސެވެ. އޭގެފަހުން ގަތަރު ވޯލްޑް ކަޕް ކޮލިފައިންގައި 2021 ވަނަ އަހަރު ފިލިޕީންސާ ރާއްޖެ ވާދަކުރި މެޗު ނިމުނީ 1-1 އިން އެއްވަރުވެގެންނެވެ. 

ކޮލިފައިންގ ބުރުގައި މި މަހުގެ 25 ވަނަ ދުވަހު ފިލިޕީންސްއާ ދެކޮޅަށް އެ ގައުމުގައި ކުޅުމަށްފަހު، އަންނަ ޖޫން މަހުގެ 10 ވަނަ ދުވަހު ރަށުން ބޭރުގައި އީސްޓް ޓިމޯއާ ދެކޮޅަށް ނިކުތުމަށް ހަމަޖެހިފައިވާއިރު، ރާއްޖޭގެ ތިންވަނަ މެޗުގައި އަންނަ އޮކްޓޫބަރު މަހުގެ ތެރޭގައި ތަޖިކިސްތާނުގައި އެ ގައުމުގެ ޓީމާ ބައްދަލުކުރާނެ އެވެ.

އޭޝިއަން ކަޕް ކޮލިފައިންގ ބުރުގައި އަމިއްލަ ދަނޑުގައި ކުޅޭ ފުރަތަމަ މެޗުގައި އޮކްޓޫބަރު 14 ގައި ރާއްޖޭގައި ތަޖިކިސްތާނާ ކުޅުމަށްފަހު، ފިލިޕީންސާ ދެކޮޅަށް ނޮވެންބަރު މަހުގައި ރާއްޖޭގައި ކުޅުމަށް ހަމަޖެހިފައިވާ މެޗަށްފަހު، ކޮލިފިކޭޝަން ބުރުގެ ފަހު މެޗުގައި އަންނަ އަހަރުގެ މާރިޗް މަހުގައި ރާއްޖޭގައި ބައްދަލުކުރާނީ އީސްޓް ޓިމޯއާ އެވެ.

ގައުމީ ޓީމުން މި ފަހަރުގެ އޭޝިއަން ކަޕްގެ ކޮލިފިކޭޝަން ބުރުގައި ކުޅުމަށް ހަމަޖެހިފައިވާ މެޗުތަކުގެ ކުރީން ކޯޗު، އަލީ ސުޒޭން ބުނީ، ރާއްޖެ ހިމެނޭ ގްރޫޕުގައި ރަށުން ބޭރުގައި ކުޅޭ ފުރަތަމަ ތިން މެޗުގައި ރަނގަޅު ނަތީޖާތަކެއް ނެރެވިއްޖެނަމަ، 2027 ވަނަ އަހަރު ބާއްވާ މުބާރާތުން ޖާގަ ހޯދުމުގެ ފުރުޞަތު ބޮޑުވެގެންދާނެ ކަމަށެވެ.