އިންގްލެންޑްގެ ކެޕްޓަން، ހެރީ ކޭން ގަބޫލުކުރާގޮތުުގައި އޭނާ އަށް ބެލޮންޑިއޯ އެވޯޑް ހާސިލްކުުރުމުގެ ފުރުޞަތު އެބައޮތް ކަމަށް ބުނެފިއެވެ.

އުމުރުން 31 އަހަރުގެ ކޭން ބުނީ، ބެލޮންޑިއޯ އެވޯޑް ކާމިޔާބުކުރުމުގެ ހުވަފެން ހަގީގަތަކަށް ހެދުމަށް އޭނާގެ ކުލަބު ބަޔާން މިއުނިކާއެކު ޓްރޮފީތަކެއް ހޯދަންޖެހޭނެ ކަމަށް ގަބޫލުކުރާ ކަމަށެވެ.

މީގެ 24 އަހަރު ކުރިން، 2001 ވަނަ އަހަރުގެ ބެލޮންޑިއޯ އެވޯޑް މައިކަލް އޮވެން ހޯދިފަހުން، އިނގިރޭސި ކުޅުންތެރިއަކަށް އެ މަގާމަށް އާދެވިފައެއް ނުވެއެވެ. އެހެންނަމަވެސް، ކޭން ދެކޭގޮތުގައި، ޓޮޓްނަމް ހޮޓްސްޕަރ ދޫކޮށް، 2023 ވަނަ އަހަރު ބަޔާން އަށް ބަދަލުވި ހިސާބުން އޭނާ އަށް ވެސް އެފަދަ އިންޑިވިޖުއަލް އެވޯޑެއް ހާސިލްކުރެވިދާނެ އެވެ.

އިނގިރޭސި ގައުމީ ޓީމަށް މިހާތަނަށް އެންމެ ގިނަ ލަނޑު ޖަހައިދީފައިވާ ކޭން ވަނީ މި ސީޒަނުގައި މިހާތަނަށް ބަޔާން އަށް ކުޅުނު 37 މެޗުގައި 32 ލަނޑުޖަހައި، އިތުރު 11 ގޯލް ޖެހުމަށް އެހީތެރިވެދީފައެވެ.

ކޭން ވަނީ ބަޔާން ފަދަ ބޮޑު ކުލަބެއްގައި ހުރުމުން ކުޅުން ކުރިއަށްވުރެ ބޮޑުތަނުން ރަނގަޅުވެ، މިހާރު ކުރިއަށްވުރެ އިތުބާރު ބޮޑުވެފައިވާއިރު، ޒިންމާތައް ނެގުމުގައި ވެސް އޭނާ އަށް އިތުރު ފުރިހަމަ ކަމެއް ލިބިފައިވާ ކަމަށް ބުނެފައެވެ.

އޭނާގެ ލަނޑު ޖެހުމުގެ ރެކޯޑާ ގުޅޭގޮތުން ގިނަ ބަޔަކު އެކަން ފާހަގަނުކުރި ނަމަވެސް، ކޭން ބުނީ، އެހެން މީހުން އޭނާގެ ހުނަރާއި ގާބިލުކަމާމެދު އުފައްދާ ސުވާލުތަކާމެދު މާބޮޑު ފަރުވާލެއް ނެތް ކަމަށެވެ. 

"ތަންކޮޅެއް އާދައިގެ ޓީމަކާ ދެކޮޅަށް ލަނޑު ޖެހުމަކީ ގިނަ ބަޔަކު އުއްމީދުކުރާ ކަމެއް. އެހެންވެ ކިތަންމެ ގިނަ ލަނޑު ޖެހިނަމަވެސް އެއީ މާބޮޑު ކަމެއް ނޫން،" ކޭން ބުންޏެވެ. 

ކޭންގެ ވާހަކަ ނިންމާލަމުން ބުނީ، މިހާރު އޭނާ އެ ދައްކަމުންދާ ކުޅުމަކީ އުމުރުން 25 އަހަރުގައި ދައްކާ ކުޅުން ނަމަ، މިހާރަށްވުރެ ހުރިހާ ގޮތަކުން ވެސް ހާލަތު ބަދަލުވާނެ ކަމަށާއި، މެޗުތަކުގައި ރަނގަޅު ކުޅުމެއް ދެއްކުމަށް އަބަދުވެސް ގަދައަޅާ މަސައްކަތްކުރާނެ ކަމަށެވެ.