ޔުއެފާ ނޭޝަންސް ލީގުގެ ކުއާޓާ ފައިނަލުގެ ފުރަތަމަ ލެގުގައި ރޭ ކުޅުނު މެޗުތަކުން ކުރީގެ ދެ ޗެމްޕިއަނުން ކަމަށްވާ، ފްރާންސާއި ޕޯޗުގަލް ބަލިވިއިރު، ސްޕެއިންއާ ނެދަލެންޑްސް ބައްދަލުކުރި މެޗު އެއްވަރުވެއްޖެއެވެ.

ރަށުން ބޭރުގައި ކްރޮއޭޝިއާ އަތުން ފްރާންސް ބަލިވީ 2-0 އިންނެވެ. ޑެންމާކް އަތުން 1-0 އިން ޕޯޗުގަލް ބަލިވިއިރު، ސްޕެއިންއާ ނެދަލެންޑްސް ކުޅުނު މެޗު ނިމުނީ 2-2 އިން އެއްވަރުވެގެންނެވެ.

ކްރޮއޭޝިއާގެ ދަނޑުގައި ކުޅުނު މެޗުގައި އެ ޓީމުން ޖެހި ދެ ލަނޑު ވެސް ކާމިޔާބުކުރީ ފުރަތަމަ ހާފުގައެވެ. ކްރޮއޭޝިއާގެ ލަނޑުތައް ޖަހައިދިނީ އަންޓޭ ބުޑިމީރް އާއި އިވާން ޕެރިސިޗް އެވެ.

މީގެއިތުރުން، މެޗުގެ ކުރީކޮޅު ކްރޮއޭޝިއާ އަށް ލީޑު ނަގައިދޭން އަންދްރޭ ކްރަމަރިޗް އަށް ލިބުނު ރަނުގެ ފުރުޞަތެއްގައި ފޮނުވާލި ޕެނަލްޓީ ފްރާންސްގެ ގޯލްކީޕަރު، މައިކް މައިގްނޯން ވަނީ މަތަކޮށްފައެވެ.

މި މެޗުގައި ފްރާންސްގެ ކުޅުންތެރިން ފޮނުވާލި ނުރައްކާތެރި ބޯޅަތަކެއް ކްރޮއޭޝިއާގެ ކީޕަރު، ޑޮމިނިކް ލިވަކޮވިޗް ވަނީ ހުއްޓުވައިފައެވެ.

ރޮޓަޑަމްގައި ކުޅުނު މެޗުގައި ނެދަލެންޑްސް މޮޅުވާން ދަނިކޮށް، ސްޕެއިނަށް އެއްވަރުކޮށްދިނީ އާސެނަލްގެ މިޑްފީލްޑަރު، މިކޭލް މެރީނޯ އެވެ. ސްޕެއިނުގެ އަނެއް ލަނޑު ޖަހައިދިނީ ނިކޯ ވިލިއަމްސް އެވެ. މި މެޗުގައި ނެދަލެންޑްސްގެ ލަނޑުތައް ޖަހައިދިނީ ކޯޑީ ގަކްޕޯ އާއި ޓިޖާނީ ރެއިންޑާސް އެވެ.

މެޗުގެ ފަހު ބައިގައި ނެދަލެންޑްސްގެ ސެންޓްރަލް ޑިފެންޑަރު، ޖޮރެލް ހާޓޯ އަށް ސީދާ ރަތް ކާޑު ދެއްކުމުން އެ ޓީމު މެޗު ނިންމާލީ 10 ކުޅުންތެރިންނާއެކު އެވެ.

މި މުބާރާތުގައި ރޭ ކުޅުނު އަނެއް މެޗުގައި ޕޯޗުގަލް ކޮޅަށް ޑެންމާކްގެ ހަމައެކަނި ލަނޑު ވައްދާލީ ބަދަލު ކުޅުންތެރިއެއްގެ ގޮތުގައި ކުޅެން ނުކުތް މެންޗެސްޓަރ ޔުނައިޓެޑްގެ ފޯވާޑް، ރަސްމުސް ހޮއިލުންޑް އެވެ. މި މެޗުގެ ފުރަތަމަ ހާފުގައި ޑެންމާކްގެ މިޑްފީލްޑަރު، ކްރިސްޓިއަން އެރިކްސަން އަތުން ވަނީ ޕެނަލްޓީއެއް ނާކާމިޔާބުވެފައެވެ.

މުބާރާތުގެ ކުއާޓާ ފައިނަލުގެ ދެވަނަ ލެގުގެ މެޗުތައް ކުޅުމަށް ހަމަޖެހިފައި ވަނީ މި މަހުގެ 24 ވާ ހޯމަ ދުވަހު އެވެ.