ENGLISH

04 އޭޕްރީލު 2025

Advertisement

މެޗުގެ އިތުރު ވަގުތުގައި ވިނީޝިއުސް ވައްދާލި މޮޅު ގޯލާއެކު، ބްރެޒިލަށް މުހިންމު މޮޅެއް

21 މާރިޗު 2025

|

ފަޒީލް ޢަބްދުލް ލަތީފު

ވިނީޝަސް ޖޫނިއަރ: އެންމެ ފަހުން ފިފާއިން ހޮވި އަހަރުގެ އެންމެ މޮޅުކުޅުންތެރިޔާ--ފޮޓޯ:އޭއެފްޕީ

އިތުރު ވަގުތުގެ ތެރޭގައި ވިނީޝިއުސް ޖޫނިއާ ކާމިޔާބުކޮށްދިން ލަނޑާއެކު، 2-1 އިން ކޮލަމްބިއާ ބަލިކޮށް، ބްރެޒިލުން ދެކުނު އެމެރިކާގެ ވޯލްޑް ކަޕް ކޮލިފައިންގ ގްރޫޕުގެ ދެވަނަ މަގާމަށް ޖެހިލައިފިއެވެ.

މި މޮޅާއެކު، ބްރެޒިލް ވަނީ 13 މެޗުން 21 ޕޮއިންޓް ހަމަކޮށްފައެވެ. އެންމެ ކުރީގައި އުޅޭ އާޖެންޓީނާ އަށް އެއް މެޗު މަދުން ކުޅެގެން ލިބިފައިވަނީ 25 ޕޮއިންޓެވެ. ތިންވަނައިގައި އޮތް އުރުގުއޭ އަށް ލިބިފައިވަނީ 20 ޕޮއިންޓެވެ. ޕެރަގުއޭ އަށް ވެސް މި އަދަދަށް ޕޮއިންޓް ލިބިފައިވާއިރު، އެ ޓީމަށް ހަތަރުވަނަ ލިބެނީ ފައިދާ ގޯލްގެ ތަފާތުންނެވެ.

ސައޮ ޕައުލޯގައި ކުޅުނު މެޗުގެ ކުރީކޮޅު، ބްރެޒިލުން ލީޑު ނެގީ ލިބުނު ޕެނަލްޓީއަކުން ރަފީނިއާ ކާމިޔާބުކޮށްދިން ލަނޑުންނެވެ. މިއީ ޕެނަލްޓީ އޭރިޔާ ތެރެއިން ވިނީޝިއުސް އަށް ކުރި ފައުލަކަށް ރެފްރީ ދިން ޕެނަލްޓީއެކެވެ.

ފުރަތަމަ ހާފު ނިމުމުގެކުރީން، ކޮލަމްބިއާ އަށް އެއްވަރުކޮށްދިނީ ލުއިސް ޑިއާޒް އެވެ. މި ލަނޑު ޖެހުމަށް އެހީތެރިވެދިނީ ޖޭމްސް ރޮޑްރިގޭޒް އެވެ. ބްރެޒިލް މޮޅުވި ލަނޑު، އިތުރު ވަގުތުގެ ތެރޭގައި ކާމިޔާބުކޮށްދިނީ އޭރިޔާ ބޭރުން ވިނީޝިއުސް ފޮނުވާލި ބޯޅައަކުންނެވެ.

ބްރެޒިލަށް ދެން އޮތީ ވާދަވެރި އާޖެންޓީނާއާ ދެކޮޅަށް ކުޅެން ޖެހޭ މެޗެވެ. އެ މެޗުގައި އަނިޔާގެ ސަބަބުން އާޖެންޓީނާގެ ކެޕްޓަން، ލިއޮނަލް މެސީ އާއި އިންޓަރ މިލާންގެ ފޯވާޑް، ލަޓާރޯ މާޓިނޭޒްގެ އިތުރުން ބްރެޒިލްގެ ތަރި، ނޭމާ އަށް ވެސް ނުކުޅެވޭނެ އެވެ.

ކޮލަމްބިއާ މެޗުގައި ބޮލަށް ލިބުނު އަނިޔާއެއްގެ ސަބަބުން ބްރެޒިލްގެ އެއްވަނަ ގޯލްކީޕަރު، އެލިސަން ބެކާ އަށް ވެސް ދެން އޮތް މެޗުގައި ނުކުޅެވޭނެ އެވެ. މީގެއިތުރުން، ބްރެޒިލްގެ ބްރޫނޯ ގިމަރޭޝް އާއި ގެބްރިއަލް މަގާޅައެސް އަށް ސަސްޕެންޝަނުގެ ސަބަބުން އެ މެޗުގައި ނުކުޅެވޭނެ އެވެ.

ކޮލިފައިންގައި މިއަދު ކުޅުނު އެހެން މެޗުތަކުގެ ނަތީޖާއަށް ބަލާއިރު، ޕެރަގުއޭގެ ދަނޑުގައި އެ ޓީމު ވަނީ 1-0 އިން ޗިލީ ބަލިކޮށްފައެވެ. އަމިއްލަ ދަނޑުގައި ބޮލީވިއާ އަތުން ޕެރޫ މޮޅުވީ 3-1 އިންނެވެ.

ކިޔުންތެރިންގެ ހިޔާލު