އިޒްރޭލުން ފަލަސްތީނުގެ ޣައްޒާއަށް މިހާރު ދެމުންދާ ލާއިންސާނީ ޢުދުވާނުތަކުގައި ޝަހީދުވި މީހުންގެ އަދަދު 500 އަށް ވުރެ މަތިވެފައިވާ ކަމަށް ޣައްޒާގެ ދިފާޢީ ވުޒާރާއިން ބުނެފިއެވެ.

ޙަމާސް ޖަމާޢަތުގެ ބެލުމުގެ ދަށުގައި ތިބި އަސީރުން މިނިވަންކުރުމުގެ އެންމެ ފަހުގެ އިންޒާރު ދިނުމަށްފަހު، އިޒްރޭލު ސިފައިން މިހާރު ވަނީ އެއްގަމުން ވެސް ޣައްޒާއަށް އަނެއްކާވެސް ވަދެގެންފައެވެ. މިގޮތުން، މިޞްރުގެ ބޯޑަރު ކައިރިން ރަފާޙްގައި އިޒްރޭލު ސިފައިން ދަނީ ވަރުގަދަ އޮޕަރޭޝަނެއް ހިންގަމުންނެވެ.

އެއްގަމުން ސިފައިން ވަދެގަތުމުގެ އިތުރުން، އިޒްރޭލުން ދަނީ ހުއްޓުމެއް ނެތި ޣައްޒާގެ މީހުން ދިރިއުޅޭ ސަރަޙައްދުތަކަށް ވެސް ވައިގެ ޙަމަލާތައް އަމާޒުކުރަމުންނެވެ.

ޣައްޒާގެ ދިފާޢީ ވުޒާރާއިން ބުނީ، އިޒްރޭލުގެ ރަހުމްކުޑަ ޙަމަލާތަކުގައި މިހާތަނަށް 504 މީހުން ޝަހީދުވެފައިވާއިރު، އޭގެ ތެރެއިން 190 އަކީ 18 އަހަރު ނުފުރޭ ކުޑަކުދިން ކަމަށެވެ.

އިޒްރޭލުން ޣައްޒާއަށް އަނެއްކާވެސް ޙަމަލާދޭން ފަށާފައިމިވަނީ، މިދިޔަ ޖެނުއަރީ މަހުގެ 19 ވަނަ ދުވަހުން ފެށިގެން ސުލްޙައިގެ އެއްބަސްވުމަކަށް ޢަމަލުކުރަމުންދަނިކޮށެވެ.

ގިނަ ޤައުމުތަކެއް މެދުވެރިވެގެން ޙަމަލާތައް ހުއްޓައިލަން އެއްބަސްވީ، އިޒްރޭލުން ހުއްޓުމެއް ނެތި ލާއިންސާނީ ޢުދުވާނުތައްދީ، ފަލަސްތީނުގެ ބައި ލައްކައެއްހާ މީހުން ޝަހީދުކޮށްލައި، ޣައްޒާގެ ގިނަ ސަރަޙައްދުތައް ސުންނާފަތިކުރަން ފެށިތާ 15 މަސް ފަހުންނެވެ.

އެއްބަސްވުމުގެ ފުރަތަމަ މަރުޙަލާގެ ދަށުން މިނިވަން ކުރާނެ ކަމަށް ބުނި ދިރިތިބި އަސީރުންނާއި ޤައިދީން ވަނީ މިނިވަންކޮށް ނިމިފައެވެ.

ނަމަވެސް، ދެވަނަ ފިޔަވަހީގެ ދަށުން ހަނގުރާމަ ދާއިމީކޮށް ހުއްޓާލައި، ޣައްޒާގެ ސަރަޙައްދުތަކުން އިޒްރޭލު ސިފައިން ފައިބަން ހިމަނާފައިވާތީ، އެކި ބަހަނާތައް ދައްކައިގެން އިޒްރޭލުން ވަނީ ދެވަނަ ފިޔަވަހި ފެށުމުގެ މަޝްވަރާ ވެސް ކުރަން ދެކޮޅު ހަދައިފައެވެ.

އޭގެ ބަދަލުގައި އިޒްރޭލުން ބޭނުންވީ، އެއްބަސްވުމުގެ ފުރަތަމަ ފިޔަވަހީގެ މުއްދަތު އިތުރުކުރާށެވެ. އެކަމަށް ޙަމާސްއިން އެއްބަސްނުވުމުން، އިޒްރޭލުން އެންމެ ފުރަތަމަ ވެސް ޣައްޒާއަށް އެހީ ވެއްދުމުގެ މަގުތައް ބަންދުކުރީއެވެ.

ޣައްޒާއަށް މިހާރު ދެމުންދާ ޙަމަލާތަކުގެ ރައްދުގައި ޙަމާސްއިން ވެސް ވަނީ އިޒްރޭލުގެ ވެރިރަށް ތެލްއަވީވްއަށް މިސައިލް ޙަމަލާއެއް ފޮނުވައިފައެވެ. ނަމަވެސް، އެ ޙަމަލާ ދިފާޢުކޮށްފައިވާ ކަމަށް އިޒްރޭލުގެ އަސްކަރިއްޔާއިން ބުންޏެވެ.

ޙަމާސްގެ އިތުރުން، ފަލަސްތީނުގެ ހައްޤުގައި ޔަމަނުގައި ހަރަކާތްތެރިވާ ހޫތީން ވެސް ވަނީ އިޒްރޭލަށް އަމާޒުކޮށް ޙަމަލާތައް ދޭން ފަށައިފައެވެ.