އިންޑޮނީޝިޔާގައި ޓޫރިސްޓުންގެ މެދުގައި އެންމެ މަޤުބޫލު ބާލީ ކައިރީގައި އަލިފާން ފަރުބަދައެއް ގޮވައި، ގިނަ ފްލައިޓުތައް ކެންސަލްކޮށްފިއެވެ.

ލެވަޓޯބީ ލަކިލަކި އަލިފާން ފަރުބަދަ އިއްޔެ 11 މިނެޓަށް ގޮވައި، ބޯދުމާއި އަޅިތައް 8 ކިލޯމީޓަރަށް ވުރެ މައްޗަށް އެރި ކަމަށް ކަމާގުޅޭ އިދާރާތަކުން ބުންޏެވެ.

އެއާއެކު، ބާލީއަށް ދަތުރުކުރަން އޮތް ހަތް ބައިނަލްއަގުވާމީ ފްލައިޓެއް މިއަދު ކެންސަލްކޮށްފައިވާ ކަމަށް އެއާޕޯޓުގެ އޮފިޝަލަކު ވިދާޅުވިއެވެ.

އެ ފަރުބަދައިގެ ނުރައްކަލުގެ ދަރަޖަ މިހާރު ވަނީ އެންމެ މަތިކޮށްފައެވެ. ފަރުބަދަ ގޮވައިގެން މިހާތަނަށް މީހަކަށް ގެއްލުމެއް ލިބިފައިނުވި ނަމަވެސް، ކުރިއަށް އޮތް ދުވަސްތަކުގައި މޫސުން ގޯސްވާނެކަމަށް ލަފާކުރެވޭތީ، އެކަމަށް ސަމާލުވާން އާންމުންނަށް ވަނީ އިލްތިމާސްކޮށްފައެވެ.

ލެވަޓޯބީ ލަކިލަކި މިދިޔަ އަހަރުގެ ނޮވެމްބަރު މަހު ވެސް ގޮވައި، ނުވަ މީހަކު ވަނީ މަރުވެފައެވެ.