ސްޕޯޓިންގ ލިޒްބަން އަށް ކުޅެމުން އަންނަ ޕޯޗުގީޒް މިޑްފީލްޑަރުން ކަމަށްވާ، ޖިއޮވާނީ ކުއެންޑާ އާއި ޑާރިއޯ އެސޫގޯ ގަތުމަށް ޗެލްސީން އެ ކުލަބާއެކު އެއްބަސްވުމަކަށް އަތުވެއްޖެއެވެ.

ސްޕޯޓިންގެ ވެބްސައިޓުން ހާމަކުރިގޮތުގައި، ޗެލްސީން ވަނީ އެ ދެ ކުޅުންތެރިންގެ ޓްރާންސްފަރ ފީގެ ގޮތުގައި ގާތްގަނޑަށް 62.4 މިލިއަން ޕައުންޑް (80 މިލިއަން އެމެރިކާ ޑޮލަރު ) ދޭން އެއްބަސްވެފައެވެ.

އެގޮތުން، ސްޕޯޓިންގެ 17 އަހަރުގެ ވިންގް، ކުއެންޑާ، ޗެލްސީއާ ގުޅޭނީ 44 މިލިއަން ޕައުންޑްގެ ޑީލެއްގައެވެ. ނަމަވެސް، ފެށޭ ސީޒަނުގެ ނިޔަލަށް ސްޕޯޓިންގައި އޭނާ މަޑުކުރާނެ އެވެ.

ސްޕޯޓިންގެ އުމުރުން 20 އަހަރުގެ ޑިފެންސިވް މިޑްފީލްޑަރު، އެސޫގޯ ލޯނެއްގައި މިހާރު ކުޅެމުންއަންނަނީ ސްޕެއިނުގެ ލަސް ޕަލްމާސް އަށެވެ. މި ސީޒަނަށްފަހު ޗެލްސީއަށް ބަދަލުވުމަށް ހަމަޖެހިފައިވާއިރު، އޭނާގެ ޓްރާންސްފަރ ފީ އަކީ ގާތްގަނޑަކަށް 18.4 މިލިއަން ޕައުންޑެވެ.

ކުއެންޑާ އާއި އެސޫގޯގެ އިތުރުން ޗެލްސީން ވަނީ، މިދިޔަ ހޫނު މޫސުމުގައި ބްރެޒިލްގެ އެސްޓެވާއޯ ވިލިއަން އާއި އެކުއޭޑޯގެ ކެންޑްރީ ޕައެޒްގެ ސޮއި ހޯދައިފައެވެ. މި ދެ ކުޅުންތެރިން ވެސް މި ސީޒަނަށްފަހު ޗެލްސީއާ ގުޅޭނެ އެވެ.