ޗައިނާ ސަރުކާރުގެ އެހީގައި މާލެ އަދި ވިލިމާލޭގެ މަގުތައް އަލުން ތަރައްޤީކުރުމުގެ މަޝްރޫޢުގެ މަސައްކަތް އަވަސް ކުރުމަށް ޗައިނާގެ މާހިރުންގެ ޓީމެއް މިހާރު މަސައްކަތް ކުރަމުންދާ ކަމަށް ރާއްޖޭގައި ހުންނަ ޗައިނާގެ ސަފީރު ވަންގް ލިސިން ވިދާޅުވެއްޖެ އެވެ.

އެކްސްގައި ކުރެއްވި ޕޯސްޓެއްގައި ސަފީރު ވިދާޅުވި ގޮތުގައި މި މަޝްރޫޢުގެ ދަށުން މާލެ އަދި ވިލިމާލޭގެ ނަރުދަމާ ނިޒާމާއި މަގުތަކުގެ ހާލަތު ވަރަށް ބޮޑަށް ރަނގަޅުވެގެންދާނެއެވެ. ޗައިނާގެ މާހިރުންގެ ޓީމުން މިހާރު ދަނީ މަޝްރޫޢު ހިންގާނެ ސަރަހައްދުތައް ބަލައި، ފީސިބިލިޓީ ދިރާސާ ކުރުމުގެ މަސައްކަތް އަވަސް ކުރަމުންނެވެ.

މި މަޝްރޫޢަކީ ޗައިނާގެ އެހީގެ ދަށުން ކުރިއަށްގެންދާ މަޝްރޫޢެއް ކަމަށާއި ޗައިނާ އާއި ދިވެހި ރާއްޖެއާ ދެމެދު އޮތް ރަހުމަތްތެރިކަމުގެ އާ ހެއްކެއް ކަމުގައި ވެސް ސަފީރު ވިދާޅުވިއެވެ.